Éxodo 40 - Tayta Diospa Wilakuynin

Sagrädu Tolduta ichisiyashqan

¹ Saypitanami Moisésta Tayta Dios nirqan:

² <

³ Tinkunansi Toldu ruriman Pactu Babulta churaykur cortïnata churanki pipis waqtapita babulta mana rikananpaq.

⁴ Mësatapis ruriman yaykaskasir manëjunkunata jananman shumaq churanki. Candelabrutapis yaykaykasir mechërukunata puntankunaman churanki.

⁵ Inciensuwan qoshnisiyänanpaq qori altartapis churanki Pactu Babulta saparaq cortïna nawpanman. Sagrädu Tolduman yaykuna cortïnatapis churanki.

⁶ <

⁷ Broncipita lavatoriutapis Tinkunansi Toldupita altarman aywana chawpinman jamaykasir sayman yakuta winanki.

⁸ Sayta ruraykurna Tinkunansi Sagrädu Toldupa patiunta cortïnawan tumaypa sapanki. Sayman yaykuna punkuta saparänanpaq kaq cortïnatapis churanki.

⁹ <

¹⁰ Saynöpis sagrädu aceitita winapanki sacrificiuta rupasina altarman y manëjunkunamanpis. Saynöpami say altar sagrädu kanqa.

¹¹ Jamanantinta lavatoriumanpis sagrädu aceitita winapanki. Saynöpami sagrädu kanqa.

¹² <

¹³ Nirkurna sagrädu mödanata Aarónta jatiparkur sagrädu aceitita umanman winapanki. Saynöpami noqata sirvimaq cürana kanqa.

¹⁴ Saynöla Aarónpa surinkunatapis qayaykur tünicankunata jatipanki.

¹⁵ Nirkur papäninpa umanman winapashqaykinöla surinkunatapis sagrädu aceitita winapanki. Saynöpanami paykuna y paykunapita miraqkunapis sirvimaq cürakuna imayyaqpis kayanqa>>.

¹⁶ Tayta Dios nishqannölami lapantapis Moisés rurarqan.

¹⁷ Egiptupita yarqayämushqan wata cumplirkuptinmi mushuq wata qalaykunan killa punta kaq junaqcho Sagrädu Tolduta ichisiyarqan.

¹⁸ Sagrädu Tolduta ichisinanpaqqa puntata jawiräkunantaraqmi Moisés churasirqan. Say jawiräkunanmannami marcukunata ichirkasir travesäñukunata churasirqan. Saynölami jorconkunatapis ichirkasir

¹⁹ say jananman toldukunawan qatasirqan. Nirkur say jananmannami janay janay wakin toldukunawan qatasirqan. Tayta Dios nishqannölami lapan saykunata Moisés rurasirqan.

²⁰ Nirkurnami Israel runakunawan Tayta Dios rurashqan pactuta babul rurinman churarqan. Babul wintukuna qerukunatapis arguëllankunapa päsarkasir sapananwan saparkurqan.

²¹ Saypitanami Pactu Babulta aparqan Sagrädu Toldu ruriman. Sayman churaykurmi mana rikakänanpaq cortïnata churarqan. Moisésta Tayta Dios nishqannölami lapan saykunata rurarqan.

²² Saypitanami Tinkuna Tolduman mësata aparqan Pactu Babulta saparaq cortïnapa jukaq lädunman churananpaq. Saytami churarqan norti kaqläman.

²³ Mësa jananmanmi tantatapis churarqan Tayta Diospa nawpancho kananpaq. Moisésta Tayta Dios nishqannölami lapan saykunata rurarqan.

²⁴ Candelabrutapis Tinkuna Toldu ruriman aparmi mësa nawpan sur kaqläman churarqan.

²⁵ Nirkurnami Tayta Diospa nawpancho rataränanpaq mechërukunaman aksita sarisirqan. Moisésta Tayta Dios nishqannölami lapan saykunata rurarqan.

²⁶ Qoripita rurashqan altartapis Tinkuna Tolduman apaykurmi saparaq cortïnapa jukaq lädunman churarqan.

²⁷ Nirkurnami say altarcho mushkuq inciensuwan qoshnisirqan. Moisésta Tayta Dios nishqannölami lapan saykunata rurarqan.

²⁸ Saypitanami Sagrädu Tolduman yaykuna punkuman cortïnata churarqan.

²⁹ Nirkurnami sacrificiuta rupasina altarta Moisés churarqan Tinkuna Toldu yaykunan nawpanman. Saychömi rupasina sacrificiuta y saki mikuy ofrendatapis rupasirqan. Moisésta Tayta Dios nishqannölami lapan saykunata rurarqan.

³⁰ Saypitanami lavatoriuta churarqan Tinkuna Toldupita altarman aywana chawpinman. Nirkurnami maylakuyänanpaq say lavatoriuman yakuta winasirqan.

³¹ Say yakuwanmi Moisés, Aarón y Aarónpa surinkunapis makinkunata y chakinkunata maylakuyarqan.

³² Moisésta Tayta Dios nishqannölami paykunaqa imaypis sayno maylakuyaq Tinkuna Tolduman yaykunanpaq y altarman aywananpaqpis.

³³ Nirkurnami Sagrädu Toldupa patiunta cortïnawan tumaypa sapasirqan. Sayman yaykuna punkuta saparänanpaq kaq cortïnatapis churasirqan. Saynömi Sagrädu Tolduta Moisés ichisiyta usharqan.

Tinkuna Tolduman Tayta Dios chashqan

³⁴ Tinkuna Sagrädu Tolduta Moisés ichirkasiptinmi pukutay sapakurkuptin kikin Tayta Dios sayman charqan.

³⁵ Pukutay sapakurkuptinmi Moisés yaykuyta kamäpakurqansu.

³⁶ Sagrädu Toldupita pukutay sharkuptinnami Israel runakuna toldunkunata shuntarkur aywayaq.

³⁷ Pukutay mana sharkuptinqa jinalanchömi täkuyaq.

³⁸ Junaqpanami Sagrädu Toldu janancho pukutay qenqiraq. Sakaypanami Sagrädu Toldu janancho nina rataraq. Saytaqa lapan Israel runakunami rikayarqan. Pukutaypis ninapis sayno karqan Israel runakuna sunyaq jirkapa purir Canaánman chäyashqanyaqmi.