Éxodo 39 - Tayta Diospa Wilakuynin

Cürakunapa mödanankunata rurayashqan

¹ Moisésta Tayta Dios nishqannölami Tinkuna Sagrädu Tolduman cüra yaykunanpaq mödanata rurayarqan azul, granäti y puka milwa jïlukunapita. Saynölami Aarónpaq sagrädu mödanatapis rurayarqan.

Efodta rurashqan

² Efodta rurayarqan qori jïlupita, azul, granäti y puka milwa jïlukunapita y llanula puskash lïnu jïlupitapis.

³ Qoripita jïluta rurayänanpaqmi qorita takaypa llapshasarkur llanulata rutuyarqan. Say jïlupita, azul, granäti y puka milwa jïlukunapita y llanula puskash lïnu jïlupitami efodta shumaq awayarqan.

⁴ Efodpa ishkan kuchunchömi tirantikunata rurayarqan umrunman shawananpaq.

⁵ Wachkuwan efodqa say piëzalami karqan. Saytapis rurayarqan qori jïlupita, azul, granäti y puka milwa jïlukunapita y llanula puskash lïnu jïlupitami. Lapanta rurayarqan Moisésta Tayta Dios nishqannölami.

⁶ Saynöpis ónice rumikunata kamarishpanmi sararänanta qoripita ruraykur sigurayarqan. Nirkurnami sëlluta rumipita ruraqno say rumikunaman Israelpa surinkunapa jutinkunata qelqayarqan.

⁷ Say rumikunatami efodpa tirantinkunaman churapäyarqan Israel trïbukunapa jutinkunata imaypis yarparänanpaq. Lapan saykunata rurayarqan Moisésta Tayta Dios nishqannölami.

Pectoralta rurayashqan

⁸ Saynölami kuyaylapaq awash pectoraltapis rurayarqan. Efodta rurayashqannölami qori jïlupita, azul, granäti y puka milwa jïlukunapita y llanula puskash lïnu jïlupitapis rurayarqan.

⁹ Pectoralta rurarkurmi doblayarqan bolsano cuadrädu kananpaq. Larguyninpis anchuyninpis ishkay chunka ishkay (22) centïmetrumi karqan.

¹⁰ Pectoral jananmannami churayarqan chusku fïla kuyaylapaq rumikunata. Punta kaq fïlamanmi churayarqan sárdica rumita, topacio rumita y carbunclo rumita.

¹¹ Ishkay kaq fïlamanmi churayarqan esmeralda rumita, zafiro rumita y diamanti rumita.

¹² Kimsa kaq fïlamanmi churayarqan jacinto rumita, ágata rumita y amatista rumita.

¹³ Chusku kaq fïlamanmi churayarqan berilo rumita, ónice rumita y jaspe rumitapis. Say rumikuna mana yarqunanpaqmi qoriwan sararänanta ruraykasir sigurayarqan.

¹⁴ Fïlakunaman churayashqan rumikuna karqan chunka ishkaymi. Sayno chunka ishkay karqan Israelpa surinkuna chunka ishkay kayaptinmi. Cada rumimanmi juk surinpa jutinta qelqayarqan rumipita rurash sëlluno kananpaq.

¹⁵ Saynöpis pectoralpaq cordonkunata qori jïlupitami piltayarqan.

¹⁶ Nirkurmi rumikunata sigurayänanpaq ishkay sararaqkunata y ishkay taksha arguëllakunata qoripita rurayarqan. Say arguëllakunatami tanayarqan pectoralpa jana kaq ishkan esquïnanman.

¹⁷ Nirkurnami say arguëllakunaman qoripita piltash cordonta päsasiyarqan.

¹⁸ Cordonpa ishkan puntankunatanami sigurayarqan umruncho kaq sararänankunaman. Sayqa qasqunchömi watararqan.

¹⁹ Saynöpis ishkay taksha arguëllakunata qoripita ruraykurmi pectoralpa ura kaq kuchunkunaman churayarqan. Say arguëllakuna pectoral rurincho karmi efod janancho karqan.

²⁰ Saynöpis ishkay taksha arguëllakunata qoripita ruraykurmi efodpa wachkun janaläninman churayarqan. Saykunami efodpa tirantinkunacho kar pectoralpa costüranman tinkurarqan.

²¹ Pectoralpa y efodpa arguëllankunata azul cordonwanmi watayarqan efodpita mana yarqukänanpaq. Lapanta rurayarqan Moisésta Tayta Dios nishqannölami.

Cürapa wakin mödanankunata rurayashqan

²² Saynölami efodpa rurinman jatikunanpaq azul jïlupita sotänata awayarqan.

²³ Uman yaykunanpaq kunkayuqta ruraykurmi sotänapa kunkan mana rachikänanpaq rebëtita jirapäyarqan. Say rebëtitaqa qara casäcapa rebëtintanömi jirapäyarqan.

²⁴ Sotänapa ura kuchunpami llanula puskash lïnu jïluwan y azul, granäti y puka milwa jïlukunawan granädatano bordayarqan.

²⁵ Saynölami say kuchunpa qoripita rurash campanillakunatapis churayarqan. Saynöpami sotäna kuchunman granädakunata y qori campanillakunata tumaypa churayarqan.

²⁶ Say sotänachömi intëru kuchunpa tumaypa karqan juk granäda, juk qori campanilla, juk granäda, juk qori campanilla. Moisésta Tayta Dios nishqannölami Tinkuna Tolduman yaykur jatikunanpaq say sotänata rurayarqan.

²⁷ Aarónpaq y surinkunapaqmi tünicakunatapis llanula puskash lïnu jïlupita awayarqan.

²⁸ Saynöpis llanula puskash lïnu jïlupitami rurayarqan görrata, görrapa adornunkunata y calzoncïllukunatapis.

²⁹ Wachkuntapis awayarqan llanula puskash lïnu jïlupita y azul, granäti y puka milwa jïlukunapitami. Awaykurmi wachkuman kuyaylapaqta bordayarqan. Lapanta rurayarqan Moisésta Tayta Dios nishqannölami.

³⁰ Saynölami qoripita sagrädu vinchatapis ruraykur rumipita rurash sëlluno kananpaq sayman qelqayarqan: <> nir.

³¹ Moisésta Tayta Dios nishqannölami say vinchata azul cordonwan görraman watapäyarqan.

Sagrädu Tolduta rurar ushayashqan

³² Saynömi Tinkuna Sagrädu Toldu rurayta ushayarqan. Israel runakunaqa lapantapis rurayarqan Moisésta Tayta Dios nishqannölami.

³³ Nirkurmi Sagrädu Toldu y lapan manëjunkunata Moisésman apayarqan. Saymi apayarqan Sagrädu Toldupaq rurayashqan ganchukunata, marcukunata, travesäñukunata, jorconkunata, jawiräkunanta,

³⁴ Tinkuna Tolduta qatananpaq pukaman tiñish uysha pirqashta, fïnu qarakunata, babulta saparaq cortïnata,

³⁵ Pactu Babulta, babul wintukuna qerukunata, babulpa sapananta,

³⁶ mësata, mësapa manëjunkunata, Tayta Diospa nawpancho churaränanpaq kaq tantata,

³⁷ qoripita rurayashqan candelabruta, candelabrupa puntankunaman churayänanpaq kaq mechërukunata, candelabrupa manëjunkunata, aksi ratananpaq aceitita,

³⁸ qoripita rurash altarta, sagrädu aceitita, mushkuq inciensuta, Tinkuna Toldupa punkunta saparaq cortïnata,

³⁹ broncipita rurash altarta, broncipita rurash rejïllata, altar wintukuna qerukunata, altarpa manëjunkunata, lavatoriuta jamakunantinta,

⁴⁰ patiupa cortïnankunata, patiupa jorconninkunata, jorconkunapa jawiräkunanta, patiupa punkunta saparaq cortïnata, patiupa estäcankunata waskantinta y Tinkuna Sagrädu Toldupa lapan manëjunkunatapis.

⁴¹ Saynöpis apayarqan Tinkuna Sagrädu Tolducho cüra jatikunanpaq kaq mödanata. Say mödanakunaqa karqan cüra Aarónpa sagrädu mödanankuna y surinkuna jatikuyänanpaq mödanakunami.

⁴² Moisésta Tayta Dios nishqannölami Israel runakuna lapantapis rurayarqan.

⁴³ Tayta Dios nishqanno lapantapis rurayashqanta rikarmi Moisés paykunata bendicionta qorqan.