Éxodo 37 - Tayta Diospa Wilakuynin

Pactu Babulta rurashqan

¹ Saynöpis acacia qerupita juk babulta Bezaleel rurarqan. Say babulpa larguynin karqan juk metru chunka centïmetrumi. Saynölami anchuyninpis altuyninpis karqan soqta chunka pisqa (65) centïmetru.

² Rurinpa y jananpapis qoriwanmi enchaparqan. Saynöpis intëru kuchunpa qoripita rebëtita rurarkurmi tumaypa churaparqan.

³ Qoripita chusku arguëllakunata rurarkurmi chuskun chakinkunaman tanaparqan: ishkayta babulpa jukaq lädunman y ishkaytana babulpa jukaq lädunman.

⁴ Saynöpis acacia qerupitami ishkay largu qerukunata rurarqan. Say qerukunata qoriwan enchaparkurmi

⁵ arguëlla uchkunpa päsasirqan babulta wintuyänanpaq.

⁶ Babulpa sapanantapis rurarqan qori pürulapitami. Larguyninmi karqan juk metru chunka centïmetru. Anchuyninnami karqan soqta chunka pisqa (65) centïmetru.

⁷ Saynöpis martilluwan takaylapami ishkay querubinkunata qoripita rurarqan. Say angilkunatami babulpa sapanan ishkan kuchunkunaman ichisirqan.

⁸ Sapanantawan querubinkunataqa rurarqan say piëzalatami. Jukaq querubín karqan isuq kaqlänincho y jukaqnami karqan aluq kaqlänincho.

⁹ Say ishkan querubinkunami riprankuna mashtash frenti frenti babulpa sapananta rikaraykäyarqan. Saynöpami ishkanpa riprankuna sapananta lantupäyarqan.

Tanta churakuna mësata rurashqan

¹⁰ Saynölami acacia qerupita mësatapis rurarqan. Say mësapa larguyninmi esqun chunka (90) centïmetru karqan. Anchuyninnami karqan chusku chunka pisqa (45) centïmetru y altuyninnami karqan soqta chunka pisqa (65) centïmetru.

¹¹ Say mësapa jananta, rurinta y chakinkunatapis qoriwanmi enchaparqan. Kuchunkunapapis tumaypami qoripita rurash rebëtita churaparqan.

¹² Saynöpis qanchis centïmetru anchuta listunta tumaypa churaparqan. Say jananmannami qoripita rurash juk rebëtita churarqan.

¹³ Saynöpis chusku arguëllakunata qoripita rurarkurmi mësapa chuskun chakinkunaman tanaparqan.

¹⁴ Say arguëllakunata tanaparqan chakinpita rebëtinman tinkuraqmanmi. Say arguëllakunapami ishkay largu qerukunata päsasirqan mësata wintuyänanpaq.

¹⁵ Mësa wintukuna qerukunata acacia qerupita rurarkurmi qoriwan enchaparqan.

¹⁶ Say mësapa manëjunkunatami qori pürulapita rurarqan plätukunata, wishlakunata, järrakunata y pucillukunata. Say järrakuna y pucillukunaqa vïnuta altarman winapäyänanpaqmi karqan.

Candelabruta rurashqan

¹⁷ Saynölami candelabrutapis qori pürulapita martilluwan takaylapa rurarqan. Say candelabrupa jamakunan, chakin, cöpankuna y waytankunapis juk piëzalami kayarqan.

¹⁸ Say candelabru soqta rikrayuqmi karqan. Kimsa rikranmi jukaq lädunpa y kimsami jukaq lädunpa karqan.

¹⁹ Cada rikranchömi kimsa waytakunata rurarqan. Say waytakuna kayarqan almendrupa waytan niraqmi.

²⁰ Candelabrupa chakinchöpis chusku waytankunami kayarqan. Say waytakunapis almendrupa waytan niraqmi kayarqan.

²¹ Cada rikran tinkuraqchömi juk wayta karqan.

²² Waytankunapis rikrankunapis say piëzalami kayarqan. Lapanpis qori pürulapita martilluwan takaylapa rurashqami kayarqan.

²³ Saynölami candelabrupaq qanchis mechërukunata, mëchapa liptanta jorqunanpaq taksha alicätikunata y lipta shuntakunan plätu malwakunatapis qori pürulapita rurarqan.

²⁴ Say candelabruta y lapan manëjunkunata kimsa chunka kimsa (33) kïlu qoripitami rurarqan.

Inciensuwan qoshnisikuna altarta rurashqan

²⁵ Inciensuwan qoshnisikuna altartapis acacia qerupitami rurarqan. Say altarpa larguyninpis anchuyninpis chusku chunka pisqa (45) centïmetrumi karqan. Altunmi karqan esqun chunka (90) centïmetru. Chuskun kuchunkunachömi altarwan juk piëzala kananpaq waqratano rurarqan.

²⁶ Say altarta jananpa, lädunkunapa y waqrankunatapis qori pürulawanmi enchaparqan. Saynöpis intëru kuchunpa qoripita rebëtita rurarkurmi tumaypa churaparqan.

²⁷ Say churapashqan rebëti chakinpanami cada esquïnanman qoripita arguëllakunata tanaparqan. Say arguëllakunami kayarqan qeruta päsasir altarta wintuyänanpaq.

²⁸ Altar wintukuna qerukunata acacia qerupita rurarkurmi qoriwan enchaparqan.

²⁹ Saynölami perfümita ruraqkuna rurayashqanno sagrädu aceitita y mushkuq inciensutapis rurarqan.