Ester 2 - Tayta Diospa Wilakuynin

Esterta reina kananpaq churashqan

¹ Rabyanaynin päsaskiptinnami rey Asueruqa warmin Vastipaq seqaypa lakikurqan. Saynöpis lakikurqan nawpanman mana kutinanpaq juk leyta rurashqanpita.

² Sayno lakikushqanta musyaykurmi mandäsiqninkuna niyarqan: <

³ Cada mandashqayki provinciakunacho runakunata churashun say jipashkunata akraykur pushayämunanpaq. Susaman chaykasimur pushayäsun makikicho kaykaq warmikuna täyashqan palaciuman. Saycho täyaptinnami yärakushqayki eunucu Hegaipa makinman churashun wakin warmikikunata cuidashqannöla paykunatapis cuidananpaq. Say jipashkuna mas kuyanaylapaq kayänanpaq ima nistashqantapis Hegai kamaripäsun.

⁴ Paykunapitami mayqan jipashtapis kuyaylapaq kaqta akranki Vastipa trukan reina kananpaq>>. Sayno niyaptinmi rey Asuero kushikur yäsiyashqannöla jipashkunata shuntayämunanpaq nirqan.

⁵ Susa markachömi Israel runa Jairpa surin Mardoqueo tarqan. Jairpa taytanmi karqan Simei. Simeipa taytanmi karqan Cis. Paykunaqa Benjamín trïbu runakunami kayarqan.

⁶ Mardoqueutami aska runakunatawan rey Nabucodonosor prësu aparqan Jerusalénpita Babilonia nacionman. Paykunatawanmi Judá nacionpa mandaqnin rey Jeconíastapis prësu aparqan.

⁷ Mardoqueupami prïma panin karqan Hadasa jutiyuq jipash. Paypa jukaq jutinmi karqan Ester. Payqa kuyaylapaq ali jipashmi karqan. Esterpa maman y taytan wanuykuyaptinmi Mardoqueuqa legitimakushpan surintano ashmakurqan.

⁸ Rey Asuero nishqannömi Susa markaman jipashkunata shuntaykur reypa palaciunman apayarqan. Nirkurmi say jipashkunata y Estertapis Hegaipa makinman churayarqan cuidananpaq.

⁹ Esterwan yachanänakurmi Hegaiqa mas kuyaylapaq kananpaq ima nistashqankunatapis y ali mikuykunatapis puestuparqan. Nirkurmi Esterta shumaq atiendiyänanpaq mas yärakushqan qanchis warmikunata ordenarqan. Say qanchis warmikunawanmi Estertapis pusharqan palaciucho kaq mas alinnin cuartukunaman saycho täyänanpaq. Say cuartukuna karqan reypa warminkuna y concubïnankuna täyashqan palaciuchömi.

¹⁰ Mardoqueo yäsishqannömi Esterqa wilakurqansu Israel warmi kashqanta.

¹¹ Ester imano kaykashqantapis musyananpaqmi warmikuna täyashqan palaciu patiu punkuman Mardoqueo aywaq.

¹² Say palaciuchömi lapan jipashkunata kuyaylapaq kayänanpaq juk wata shumaq ashmayarqan. Saymi mïrrawan talush aceitiwan soqta killantin lushikuyaq. Saypita mastami crëmakunawan y perfümikunawan soqta killantin lushikuyaq. Saypitanami turnun chämuptin rey Asueruman aywayaq.

¹³ Tashqan wayipita reypa palaciunman aywayaptinmi mas kamaraqla kayänanpaq mödanatapis y alhäjakunatapis kamaripaq.

¹⁴ Rey Asueruwan punushqanpita waraynin tutanami reypa concubïnankuna täyashqan kaq cuartukunamanna jipash aywaq. Saychömi Saasgaz jutiyuq eunucu runana paykunata atiendiq. Payqa rey yärakushqan runami karqan. Saypita mayqan jipashpis manami kutiqsu rey Asuero mana qayasiptinqa. Kuyashqan kaqlatami mayqan jipashtapis qayasiq.

¹⁵ Saypitanami Mardoqueupa prïma panin Esterta töcarqan rey Asuerupa nawpanman aywananpaq. Esterqa Abihailpa surinmi karqan. Sayno töcaptinmi mas kamaraqla kananpaq Esterqa jatikurqan eunucu Hegai yäsishqan kaqkunalata. Shakya kaptinmi Estertaqa lapanpis kuyayaq.

¹⁶ Saymi qanchis watana rey kaykaptin chunka kaq killacho Esterta pushayarqan rey Asuero kaqman. Say killapa jutinmi kaykan Tebet.

¹⁷ Esterta rikaykurmi rey Asueruqa pasaypa kuyakurkurqan. Paytanöqa manami mayqan jipashtapis kuyarqansu. Saymi Estertana Vastipa trukan reina kananpaq corönata jatiparqan.

¹⁸ Reina kananpaq Esterta churarmi rey Asueruqa fiestata rurarqan. Say fiestamanmi mandäsiqninkunatapis yanapaqninkunatapis qayasirqan. Kushikuypitami mandashqan provinciakunacho impuestuta bäjasirqan. Saynöpis aska regälukunatami runakunata aypurqan.

¹⁹ Concubïnankuna täkuyänan cuartukunacho täyänanpaq jipashkunata pushaykashqan wisanmi reypa mandäsiqninkuna jamaräyashqan punkucho Mardoqueo jamaraykarqan.

²⁰ Mardoqueo yachasishqannölami Esterqa wilakurqansu Israel warmi kashqanta. Mardoqueupa makincho kaykar cäsukushqannölami imaypis Esterqa payta cäsukuq.

Rey Asuerupa contran wilanakuyashqanta Mardoqueo musyashqan

²¹ Juk junaqmi reypa mandäsiqninkuna jamaräyashqan punkucho jamarar Mardoqueo wiyarqan rey Asueruta wanusiyänanpaq ishkay runakuna fiyupa rabyash wilanakuykäyashqanta. Say runakunaqa kayarqan Bigtawan Teresmi. Paykunaqa kayarqan say punkuta täpakuq soldädukunapa capitanninkunami.

²² Sayno wilanakuyashqanta wiyaykurmi Mardoqueuqa Esterta wilarqan. Saytanami Esterqa rey Asueruta wilar nirqan: <>.

²³ Sayno wilanakuyashqanta shumaq musyaykurnami rey Asueruqa say ishkay runakunata wanuykasir ayanta qeruman tuyrisirqan. Nirkurmi Mardoqueo sayno wilakushqanta qelqasirqan acta libruman.