Esdras 6 - Tayta Diospa Wilakuynin

Rey Darío ordinta apasishqan

¹ Cartakuyashqanta liyiskirmi rey Darío Babilonia nacionpa väliq documentunkuna churaräkunancho actata ashisirqan.

² Media provinciacho Acmeta markacho kaykaq palaciuchömi ashishqan actata tariyarqan. Say actachömi qelqaraykarqan:

³ Persia nacionpa mandaqnin rey Ciro juk watana mandaq kaykarmi kayno ordenarqan: Tayta Diospaq sacrificiukunata rupasiyänaykipaq cimientuta shumaq churaykur Jerusaléncho Tayta Diospa templunta yapay sharkasiyay. Say templupa altuyninpis anchuyninpis ishkay chunka qanchis (27) metru kasun.

⁴ Cada kimsa fïla jatusaq laqlash rumikunawan perqarkur juk fïlaqa alinnin mushuq tablakunawan entablasiyay. Lapan gastukunapaqqa tesorërümi qellayta sararanqa.

⁵ Qoripita y qellaypita rurash manëjukunata Tayta Diospa templunpita Nabucodonosor Babiloniaman apamushqantapis Jerusalénman kutisir Tayta Diospa templunman churayäsun.

⁶ Sayno liyiskirmi rey Daríuqa Éufrates mayu wak simpan provinciapa gobernadornin Tatnaita, Setar-boznaita y mandäsiqninkunata kayno ordenarqan: Jerusalénpita witikuyay.

⁷ Tayta Diospa templun puntata kashqancho yapay sharkasiyänanpaq Israel runakunapa gobernadorninta y mayor runakunatapis ama michäyaysu.

⁸ Israel mayor runakuna Tayta Diospa templunta yapay sharkasiyänanpaq kaynömi ordenä: Éufrates mayu wak simpan provinciacho noqapaq shuntayashqayki impuestukunapita lapan gastunkunapaq qellayta kamaripäyay. Saynöpami ushayashqanyaq arusiyanqa.

⁹ Saynöpis Jerusaléncho kaykaq cürakunata waran waran lapan nistäyashqanta kamaripäyay. Tayta Diospaq sacrificiukunata rupasiyänanpaqpis turïtukunata, carnikunata y carnishkunatapis kamaripäyay. Saynöpis trïguta, kachita, vïnuta y aceitita kamaripäyay.

¹⁰ Saynöpami jana pasacho kaykaq Tayta Diospaq sacrificiukunata rupasir noqapaqpis surïkunapaqpis Tayta Diosta manakuyanqa.

¹¹ Noqa nishqäta pipis mana cäsukuptinqa wayinpa terrädunta jorquskir ayanta sayman tuyriyanki. Nirkurna wayintapis chipyaq juchusiyanki.

¹² Tayta Diosmi Jerusalénta akrash saycho tänanpaq. Sayno kaykaptinqa mayqan nacionpa mandaqnin reytapis sapata churapaq kaqtaqa Tayta Dios ushakäsisun. Noqa Daríumi rey kar sayno kananpaq ordenä. Nishqänöla lapantapis rurayanki.

¹³ Saymi rey Darío apasishqan cartacho nikashqannöla say provinciapa gobernadornin Tatnai, Setar-boznai y mandäsiqninkunapis cumpliyarqan.

¹⁴ Saymi Israel mayor runakuna Tayta Dios nishqannöla templu rurasiyta ushayarqan. Saynöpami profëta Hageo y Iddupa surin profëta Zacarías wilakuyashqan cumplikarqan. Saynölami cumplikarqan Persia nacionpa mandaqninkuna rey Ciro, rey Darío y rey Artajerjes ordenayashqanpis.

¹⁵ Saymi rey Darío soqta watana Persia nacionpa mandaqnin kaykaptin Adar killa kimsa kaq junaqcho templu sharkasiyta ushayarqan.

¹⁶ Ushaskiyaptinmi cürakuna, levitakuna y Babiloniapita Judáman chämuq lapan Israel runakuna Diospa templunta inaugurar kushish fiestata rurayarqan.

¹⁷ Say fiestachömi Tayta Diospaq sacrificiuta rupasiyarqan pachak (100) turïtukunata, ishkay pachak (200) carnikunata, chusku pachak (400) carnishkunata y chunka ishkay chïvukunata. Say chïvukunataqa Israel runakunapa cada trïbunpaqmi jukta rupasiyarqan purificasina sacrificiu kananpaq.

¹⁸ Nirkurmi Moisés qelqashqancho nishqannöla Tayta Diosta Jerusaléncho sirviyänanpaq cürakunata según turnun töcayashqanpita churayarqan. Saynölami levitakunatapis churayarqan.

¹⁹ Saynömi Babiloniapita Judáman chämuqkuna Pascua fiestata wata qalaykunan killa chunka chusku junaqcho rurayarqan.

²⁰ Say fiestapaqqa cürakuna y levitakuna purificakushnami kaykäyarqan. Saymi Pascua fiestapaq carnishta pishtar sacrificiuta rupasiyarqan Babiloniapita Judáman chämuq Israel mayinkunapaq, cüra mayinkunapaq y kikinkunapaqpis.

²¹ Babiloniapita chämuq Israel runakunawanmi wakin mana Israel runakunapis say carnishkunata Pascua fiestacho mikuyarqan. Say runakunaqa jusalikur kawaq runakunapa mana ali costumbrinkunata kacharishna karmi Israel runakunata kuyaq Tayta Diosta ashiyarqan.

²² Saypita qanchis junaqyaqmi Levadüraynaq Tantata Mikuna fiestata kushish rurayarqan. Sayno kushikuyarqan templunta yapay sharkasiyänanpaq Asiria nacionpa mandaqnin reyta Tayta Dios yarpayta qosh kaptinmi.