Esdras 4 - Tayta Diospa Wilakuynin

Templuta sharkasiyaptin chikiqkuna michäyashqan

¹ Judá trïbuta y Benjamín trïbuta chikiq runakunami mayayarqan juklächo täyashqanpita chaykamur Tayta Diospa templunta yapay sharkaykäsiyashqanta.

² Saymi Zorobabel kaqman y mayor runakuna kaqman aywaykur niyarqan: <>.

³ Sayno niyaptinmi Zorobabel, Jesúa y mayor runakuna niyarqan: <>.

⁴ Sayno niyaptinmi say runakuna rabyakuyashpan Judá runakuna aruyta mana sïguiyänanpaq desanimasiyta tïrayarqan.

⁵ Templu sharkasiqkunata michäyänanpaqmi autoridäkunatapis wakintaqa pakaylapa sobornuyarqan. Sayno michäyarqan Persia nacionpa mandaqnin rey Ciro mandashqan wisanpita pasa hasta rey Darío mandashqanyaqmi.

Jerusalén markata alsayaptin chikiqkuna michäyashqan

⁶ Persia nacioncho rey Asuero mandayta qalaykushqan wisanpis Judácho taq runakunata y Jerusaléncho taq runakunata desanimasiyänanpaq manakaqkunata jitaparmi reyman cartata apasiyarqan.

⁷ Saynölami Persia nacionpa mandaqnin rey Artajerjes kaykashqan wisanpis Bislam, Mitrídates, Tabeel y mandaq mayinkuna manakaqkunata jitapar cartata apasiyarqan. Say cartata arameo idiömachömi qelqayarqan. Rey kaqman chaptinmi Persia runakuna parlayashqan idiömaman traduciyarqan.

⁸ Saypitanami Jerusaléncho taq runakunata manakaqkunata jitapäyashpan gobernador Rehum y secretariu Simsai rey Artajerjesman juk cartata cartakuyarqan.

⁹ Gobernador Rehum y secretariun Simsaimi say cartata qelqayarqan juezkunawan, gobernadorkunawan y autoridäkunawan wilanakurir. Say autoridäkunami kayarqan Persiapita, Erecpita, Babiloniapita y Elamcho kaykaq Susapita.

¹⁰ Cartacho nishqantami awniyarqan Samaria markakunacho taq runakuna y wakin provinciakunacho taq runakunapis. Say provinciakunaqa karqan Éufrates mayupita hasta lamaryaqmi. Saycho taq runakunapa unay ayllunkunataqa rey Asnapar wakin nacionkunapita prësu apashpanmi saycho täyänanpaq churarqan.

¹¹ Gobernador Rehum y secretariu Simsai apasiyashqan cartachömi nirqan: Tayta rey Artajerjes, Éufrates mayu kay simpa provinciacho taq sirvishuqnikikuna karmi kay cartata apaykäsiyämü.

¹² Qam kaqpita kayman shamuq Israel runakunami Jerusalén markata alsaykäyan. Say markachöqa mana wiyakuq yaqa runakunalami imaypis täyarqan. Say markatami intëru kuchunpa cimientunkunata alsar perqa murällata sharkaykäsiyan.

¹³ Say markata alsar murällata sharkarasirqa manami impuestukunatapis pägayanqanasu.

¹⁴ Qampa sirvishuqnikikuna kaykarqa manami rikaräkuyämansu say runakuna contrayki sharkuyänanta. Saymi kay cartata musyanaykipaq apaykäsiyämü.

¹⁵ Niyashqä rasunpaypa kashqanta shumaq musyanaykipaq unay acta librukunata rikaykulay, taytay. Saykunata liyirmi musyanki Jerusaléncho taqkuna mana cäsukuq kayashqanta. Paykunaqa reypa y nawpan provinciacho taq runakunapa contran sharkuyaptinmi say markata ushakäsiyarqan.

¹⁶ Jerusalén markata alsar murällanta sharkasiyta ushayaptinqa Éufrates mayu kay simpancho taq lapan runakunapis manami munaynikichönasu kayanqa. Sayta musyanaykipaqmi kay cartata apaykäsiyämü, tayta rey.

¹⁷ Saypitanami rey Artajerjes cartakur nirqan: Gobernador Rehum, secretariu Simsai, Samariacho taq runakuna y Éufrates mayu wak simpan provinciacho taq runakuna, qamkunatami winchikü.

¹⁸ Apasiyämushqayki cartata parlashqä idiömaman traducirmi liyipämash.

¹⁹ Cartacho nimashqaykinölami Jerusaléncho taq runakuna imano kayashqantapis musyanäpaq churaraykaq acta librukunata liyisishkä. Niyashqaykinömi qelqaraykan say runakuna reykunapa contran imaypis sharkuyashqan.

²⁰ Saynöpis musyashkämi Jerusaléncho munayyuq reykuna nawpata kayashqanta, intëru Éufrates mayu wak simpan provinciata munaynincho sararäyashqanta y say provinciacho taq runakunata impuestukunata pägasiyashqanta.

²¹ Kananqa say aruqkunata niyay manana aruyänanpaq. Yapay aruyänanpaq nishqäyaq Jerusalén markata amana sharkasiyäsunnasu.

²² Mandashqätaqa jukla cumplisiyay. Mana cumplisiyaptikiqa mandashqä provinciakunacho conträmi sharkuyanqa.

²³ Rey Artajerjes apasishqan cartata chaskirmi Rehumta, secretariu Simsaita y mandaq mayinkunatapis liyiparqan. Say cartacho nishqanta wiyaykurmi Jerusalénman aywayashpan Israel runakunata rabyash michäyarqan Jerusalén markata manana sharkasiyänanpaq.

Templuta sharkasiyta yapay qalaykuyashqan

²⁴ Jerusaléncho templuta sharkaykäsiyaqta michäyaptinmi kachaykuyarqanna Persia nacionpa mandaqnin rey Darío ishkay wata rey kashqan wisanyaq.