Esdras 3 - Tayta Diospa Wilakuynin

Altarta sharkaykasir Tayta Diosta adorayta qalaykuyashqan

¹ Unay ayllunkunapa markankunacho täyashpannami Israel runakunaqa say yarpayla Jerusalénman shuntakäyarqan. Say karqan chäyashqan wata qanchis kaq killachömi.

² Saymi Josadacpa surin Jesúa y Salatielpa surin Zorobabel Tayta Diospa altarninta rurar qalaykasiyarqan. Paykunatami yanapäyarqan Jesúapa ayllun cürakuna y Zorobabelpa ayllunkunapis. Tayta Diosta sirviq Moisés qelqashqan leykunacho nishqannömi sacrificiukunata rupasiyänanpaq altarta rurayarqan.

³ Vecïnun marka runakuna atacayänanta mansariykarpis nawpata kashlanmanmi altarta sharkasiyarqan. Saychömi tutapapis y tardipapis Tayta Diospaq sacrificiukunata rupasiyarqan.

⁴ Ramäda fiestatapis leykunacho nikashqannömi rurayarqan. Say fiestachömi aykata rupasiyänanpaqpis leykunacho nishqanno cada junaq sacrificiukunata rupasiyarqan.

⁵ Fiesta rurayta ushaskirnami Tayta Dios mandashqannöla sacrificiukunata waran waran rupasiyarqan. Saynölami lulu killachöpis y fiestakunachöpis sacrificiukunata rupasiyarqan. Runakuna lapan voluntäninwan apayämushqantapis Tayta Diospaq altarcho rupasiyarqan.

⁶ Qanchis kaq killa qalaykunan junaqpita pasami Tayta Diospaq sacrificiukunata rupasir qalaykuyarqan. Sayno rupasiyarqan templuta sharkasiyänanpaq cimientuta manaraq churarmi.

Templuta sharkasir qalaykushqan

⁷ Saypitanami templuta sharkasiyänanpaq albañilkunata y carpintërukunata pägayarqan. Tiro y Sidón runakunatapis mikuywan, aceitiwan y vïnuwan pägayaptinmi lamar janalanpa Líbano nacionpita Jope markayaq cedru qerukunata apapäyämurqan. Israel runakuna lapanta rurayarqan Persia nacionpa mandaqnin rey Ciro mandashqannölami.

⁸ Saynöpami Salatielpa surin Zorobabel y Josadacpa surin Jesúa Diospa templunta sharkasir qalaykuyarqan. Paykunatami yanapäyarqan cüra mayinkuna, levitakuna y Babiloniapita Jerusalénman lapan chämuq runakuna. Sayno sharkasir qalaykuyarqan Jerusalénman chäyämushqanpita juk watata cumplirkur ishkay kaq killachömi. Levitakunatanami ishkay chunka (20) watayuqpita janaman kaqkunata churayarqan Tayta Diospa templunta aruyaptin capataz kayänanpaq.

⁹ Say capatazkunami kayarqan Jesúa, Cadmiel, surinkuna y ayllunkunapis. Paykunaqa Hodavíaspita miraqkunami kayarqan. Saynölami paykunata yanapäyarqan Henadadpita miraqkunapis.

¹⁰ Tayta Diospa templunta aruqkuna cimientu perqayta qalaykuyaptinmi cürakuna chäyarqan sagrädu sotänan jatish y cornëtan aptash. Saynölami levitakuna churanakuyarqan platïllunkunata tukar Tayta Diosta alabayänanpaq. Say levitakunaqa kayarqan Asafpita miraq runakunami. Paykuna churanakuyarqan Israel runakunapa mandaqnin rey David ordenashqannömi.

¹¹ Tayta Diosta agradëcikurmi alabayarqan kayno nir: <<¡Tayta Diosqa alilata ruraqmi! ¡Kuyapäkuyninqa Israel runakunapaq manami imaypis ushakansu!>> Sayno nirmi cimientu churayta kushikuyashpan lapan runakuna Tayta Diosta sinchipa alabayarqan.

¹² Saycho kaykaq aska cürakuna, levitakuna y mayor runakuna awkin kayashpanmi yarparaykäyarqan unay kaq templu imano kashqantapis. Paykunaqa mushuq templuta sharkasiyänanpaq cimientu churayashqanta rikayashpanmi punta kaq templupaq yarparkur fiyupa lakikur waqayarqan. Wakinnami cimientuta churayaptin seqaypa kushikuyarqan.

¹³ Sayno shakuypa shakur büllata rurayaptinmi runakuna tantiyayarqansu mayqankuna kushikuypita qaparaykäyashqanta ni mayqankuna lakikur waqaykäyashqantapis. Sayno büllata rurayashqan karuyaqmi wiyakarqan.