Efesios 6 - Tayta Diospa Wilakuynin

Taytanwan surinkuna imano kawayänanpaqpis yäsishqan

¹ Wamrakuna, Señor Jesucristuta chaskikush kaykarqa mamaykita y taytaykita imaypis cäsukuyay. Sayno cäsukuyänaykitami Tayta Dios munan.

² Promësayuq punta kaq mandamientupis kaynömi nin: <

³ Saynöpami kay pasacho aska wata kawanki>>.

⁴ Wamrayuqkuna, wamraykikunata ama rabyanäsiyaysu. Saypa trukanqa Señor Jesucristo munashqanno kawayänanpaq shumaq tantiyasiyay.

Ashmaywan patrón ali rikanakuyänanpaq yäsishqan

⁵ Ashmaykuna, kay pasacho kaq patronnikikunata cäsukur mandayäshushqaykita lapan voluntänikiwan rurayay. Jesucristuta cäsukuyashqaykinöla patronnikikunatapis cäsukuyay.

⁶ Patronnikikuna rikanalanchöqa ama aruq tukuyaysu, saypa trukanqa Jesucristupa sirviqnin kar lapan voluntänikikunawan aruyay. Saynöpami Tayta Dios munashqanta rurayanki.

⁷ Patronnikikuna mandayäshushqaykita lapan voluntänikikunawan rurayay. Ama runakunapaq aruqnölaqa aruyaysu, saypa trukanqa Señor Jesucristupaqno aruyay.

⁸ Ashmay kashqapis mana ashmay kashqapis alita rurashqansipitami Jesucristo gloriacho premiuta qomäshun.

⁹ Patronkuna, qamkunapis ashmaynikikunata ali rikayay. Qayapäyänaykipa trukanqa ali shimilaykipa shakyäsiyay. Tantiyakuyay ashmay karpis patrón karpis jana pasacho kaykaq patronninsipa makincho kaykashqansita. Payqa lapansitapis iwalmi rikaykämansi.

Supaykunata ichipänansipaq yäsikuy

¹⁰ Wawqi panikuna, Señor Jesucristo munayninwan yanapaykäyäshuptikiqa firmi kawayay.

¹¹ Diabluta ichipäyänaykipaq Tayta Dios kamaripäyäshushqaykikunata jatikuyay.

¹² Noqansi manami runa mayinsiwansu guërracho kaykansi, saypa trukanqa munayyuq supaykunawanmi. Paykunaqa mana rikakaq karpis intëru kay pasachömi imaykatapis mana alikunata ruraykäyan.

¹³ Sayno kaykaptinqa Tayta Dios kamaripäyäshushqaykikunata jatikuyay. Sayta jatikuyaptikimi supaykuna shamurpis vinciyäshunkisu.

¹⁴ Wachkuykiqa rasun kaqlata parlayashqaykimi kaykan. Chalëcuykiqa runa mayikita ali rikayashqaykimi kaykan.

¹⁵ Bötasnikiqa Jesucristupa wilakuyninta wilakuyashqaykimi.

¹⁶ Escüduykiqa Tayta Diosman lapan shonquykikunawan yärakuyashqaykimi. Say escüduwanmi nina rataykaq flëchawanno Satanás atacayäshuptikipis sapakuyanki.

¹⁷ Cascuykiqa Tayta Dios salvayäshushqaykimi. Espädaykiqa Tayta Diospa palabranmi. Saywanmi Espíritu Santu imaypis yanapäyäshunki.

¹⁸ Imay hörapis Espíritu Santu tantiyasiyäshushqaykino Tayta Diosta manakuyay. Mana ajayaypa imaypis ruwakuyay. Yärakuq mayikikunapaqpis mana qonqaypa manakuyay.

¹⁹ Noqapaqpis Tayta Diosta manakuykuyälay wilakur shumaq parlanäpaq y pitapis mana mansapaypa Jesucristupa ali wilakuyninta wilapänäpaq.

²⁰ Tayta Diospa wilakuqnin kar wilakuyninta wilakushqäpitami prësu kaycho wichqaraykä. Sayno kaptinpis Tayta Diosta manakuyay mana mansapaypa pitapis wilapänäpaq.

Carta ushanan

²¹ Kuyay wawqinsi Tíquico chämurmi imano kaykashqäta y imata rurashqätapis wilayäshunki. Paypis Señor Jesucristupa wilakuqninmi kaykan.

²² Saymi payta kachaykämü imano kaykashqätapis wilayäshunaykipaq. Paymi shakyäsiyäshunki Tayta Diosman shumaq yärakuyänaykipaq.

²³ Tayta Dios y Señor Jesucristo yanapaykuyäläshunki payman yärakur kuyanakuyänaykipaq y jawka kawayänaykipaqpis.

²⁴ Señor Jesucristuta lapan shonqunwan kuyaqkunata Tayta Dios kuyapar imaypis yanapaykuläsun. [Amén.]