Efesios 5 - Tayta Diospa Wilakuynin

Tayta Diospa wamrankuna imano kawayänanpaqpis kashqan

¹ Tayta Dios kuyashqan wamrankuna kaykarqa pay jusaynaq kashqanno qamkunapis jusaynaq kayay.

² Jesucristo kuyakuq kashqanno qamkunapis kuyakuq kayay. Kuyakuq karmi noqansi rayku wanur Tayta Diospaq mushkuq sacrificiuno kash.

³ Tayta Dios kuyashqan santu runakuna kaykarqa fornicación jusata ama jusalikuyaysu, wachakash ama kayaysu, ni ima jusatapis ama jusalikuyaysu. Saykunapaqqa parlaylapis ama parlayaysu.

⁴ Lutankunata, manakaqkunata ni lutan yarpayman apakuq bujunädakunatapis ama parlayaysu. Saypa trukanqa imapitapis Tayta Diosta agradëcikuyay.

⁵ Shumaq tantiyakuyay: fornicación jusata jusalikuqkuna y wachakash kaqkunaqa manami Tayta Dios y Jesucristo mandashqanman yaykuyanqasu. (Wachakash kaqkunaqa ïduluta adoraqnömi kaykäyan.)

⁶ Mana cäsukuypa jusalikuqkunataqa Tayta Diosmi rabyashpan castiganqa. Sayno kaykaptinqa jusalikuyänaykipaq pï shakyäsiyäshuptikipis ama chaskipäyankisu.

⁷ Wakin runakuna jusalikuyaptinpis paykunanöqa ama kayankisu.

⁸ Nawpataqa qamkunapis jusalikuyashpayki sakaqcho kaykaqnömi kawayarqayki. Kananmi isanqa Jesucristuta chaskikur asikyaqchöna kawaykäyanki. Sayno kaykarnaqa Tayta Dios munashqanno waran waran kawayay.

⁹ Asikyaqchöna kawarqa kuyapäkuqmi kayanki, alilatanami rurayanki y rasun kaqlatanami parlayankipis.

¹⁰ Tayta Diospa shonqunpaqno kawayänaykipaq imaypis yarpachakuyay.

¹¹ Tayta Diosta mana cäsukuq runakuna lutankunata rurayaptinpis qamkunaqa ama rurayaysu. Saypa trukanqa lutan ruraykunata kachariyänanpaq tantiyasiyanki.

¹² Paykuna pakaylapa jusalikuyashqan pasaypa penqakuypaqmi kaykan. Saykunataqa ama parlaylapis parlayaysu.

¹³ Asikyaptin ima kashqanpis rikakashqannömi paykuna jusalikuyashqanpis musyakanqa.

¹⁴ Jusalikuqkuna tantiyakuyänanpaq parlapis kaynömi nin: <>.

¹⁵ Sayno kaykaptinqa imano kawaykäyashqaykitapis shumaq tantiyakuyay. Mana tantiyakuq runano kawayänaykipa trukanqa tantiyakuq runano kawayay.

¹⁶ Runakuna mana alita rurar kawayaptinpis qamkunaqa alikunalata imaypis rurayay.

¹⁷ Mana tantiyakuq runanöqa ama kawayaysu. Saypa trukanqa Señorninsi munashqanno kawayänaykipaq shumaq tantiyakuyay.

¹⁸ Ama upyayaysu. Shinkash runaqa lutankunatami ruran. Saypa trukanqa Espíritu Santupa munaynincho kawayay.

¹⁹ Salmukunata, himnukunata y cörukunata cantar lapan shonquykikunawan Tayta Diosta alabayay.

²⁰ Ima kaptinpis Señorninsi Jesucristupa jutincho Tayta Diosta agradëcikuyay.

Majayuqkuna imano kawayänanpaqpis nishqan

²¹ Jesucristuta mansapakurqa jukninsi jukninsipis respitanakur kawashun.

²² Warmikuna, Señor Jesucristuta cäsukuyashqaykinöla runaykikunatapis cäsukuyay.

²³ Warmiqa runanpa munayninchömi kaykan. Saynölami iglesiapis Jesucristupa munaynincho kaykan. Iglesianami paypa cuerpun y paymi iglesiapa salvaqnin.

²⁴ Sayno kaykaptinqa Jesucristuta iglesian cäsukushqanno warmipis runanta cäsukusun.

²⁵ Runakuna, iglesiata Jesucristo kuyashqanno warmikikunata kuyayay. Iglesiata kuyarmi wanuymanpis Jesucristo charqan.

²⁶ Sayno wanurqan payman yärakuqkuna Tayta Diospa palabranwan maylash kar santu kayänanpaqmi.

²⁷ Saymi kikinpa nawpanman pushanqa asikyaypa asikyaykaqta, jusaynaqta, santuta y pay munashqanno kaykäyaqta.

²⁸ Pipis warminta kuyaq kaqqa kikinpa cuerpuntapis kuyanmi. Saymi cuerpunta kuyashqannöla warmintapis kuyanan.

²⁹ Manami pipis cuerpunta maltratansu, sinöqa alimentarmi cuidan. Saynölami Jesucristupis iglesianta cuidan.

³⁰ Noqansimi Jesucristupa cuerpun, [aysan y tulun] kaykansi.

³¹ Tayta Diospa palabranchöpis kaynömi nikan: <>.

³² Say qelqaraykaqqa Jesucristuwan juklaylano kashqansitami tantiyasimansi. Sayno tantiyasimashqansi seqaypa espantakuypaqmi kaykan.

³³ Saymi yapaypis nï: Cuerpuykita kuyayashqaykinöla warmikikunata kuyayay. Warmikunapis runankunata respitayäsun.