Eclesiastés 8 - Tayta Diospa Wilakuynin

¹ Tantiyakuq kayqa kushikuypaqmi kaykan. Tantiyakuq runaqa kushishqami imaypis kaykan.

² Tayta Diospa nawpancho promitishqaykinöla rey nishushqaykita imaypis cäsukuy.

³ Reypa contran ama sharkuysu ni yaqa runakuna rurayashqanta ama ruraysu. Reyqa sayno kaqkunata fiyupami castiganqa.

⁴ Saynöpis rey nishqanqa nishqanmi kaykan. Paytaqa imata ruraptinpis manami pipis michayta kamäpakunsu.

⁵ Rey nishqanta wiyakuq runaqa manami castigashsu kanqa. Tantiyakuq karqa rey mandashqanta imano cumplinanpaqpis yarpachakunmi.

⁶ Cumplinanpaq aja kaptinpis yarpachakurqa y pacienciakurqa cumplinqami.

⁷ Isanqa manami musyankisu ni pipis wilashunkisu waray warayninkuna ima päsananpaq kashqantapis.

⁸ Manami pipis wanuypita qeshpinsu ni imay junaq wanunanpaq kashqantapis akrayta kamäpakunsu. Wanuypitaqa manami imapis sapansu. Yaqa kashqanpis manami wanuypitaqa salvanqasu.

⁹ Kay pasacho imanir lapan päsashqankunatapis tantiyanäpaq yarpachakur y runakuna runa mayinta imanir nakasiyashqanta yarpachakurmi saykunata tantiyashkä.

Ali runa y yaqa runa imano kayashqanpis

¹⁰ Saynöpis rikashkämi wakin runakuna sagrädu templuman aywarpis yaqa kayashqanta. Wanuptinnaqa yaqa kashqanta qonqaykurmi ali runa kashqanta niyashpan pampayan. Saypis lakikuypaqmi kaykan.

¹¹ Yaqa runata jusanpita jinan höra mana castigaptinqa wakinpis lutanta rurayänalanpaqmi yarpachakuyanqa.

¹² Yaqa runakuna pachak (100) kuti jusalikuyaptinpis y aska wata kawayaptinpis noqa musyämi Tayta Diosta mansapakuqkuna alipaq cäsukuyashqanta.

¹³ Yaqa runaqa Tayta Diosta mana mansapakur manami alisu kawanqa ni aska watasu kawanqa. Saypa trukanqa lantuy päsaqnölami ushakanqa.

¹⁴ Saynöpis rikashkämi ali runakuna jusalikuqnöpis pasaypa nakaykäyaqta. Saynöpis rikashkämi yaqa runakuna alita ruraqnöpis ali kawaykäyaqta. Saypis lakikuypaqmi kaykan.

¹⁵ Saymi nï: Saykunapita lakikunansipa trukanqa kushish kawashun. Kay pasacho nakarpis mikushun, upushun y kushish kawashun.

¹⁶ Kay pasacho imanir lapan päsashqankunatapis musyayta munarmi shumaq yarpachakushkä. Saymi rikashkä punuytapis mana tariypa runakuna aruyashqanta.

¹⁷ Saynöpis tantiyashkämi Tayta Dios kay pasacho lapan rurashqantaqa pipis mana tantiyashqanta. Imanöpa yarpachakurpis manami tantiyashunsu. Yachaq runa <> nirpis manami rasunpaypaqa tantiyansu.