Eclesiastés 7 - Tayta Diospa Wilakuynin

Ali kawanansipaq yäsikuykuna

¹ Ali runa kashqansita pïmaypis parlashqanqa chanin perfümipitapis mas alimi kaykan. Yurishqansi junaqpitapis wanukushqansi junaqmi mas aliqa kaykan.

² Ushakaqla kaykarqa kawashqansiyaq yarpäshun wanukuqla kashqansita. Fiestaman aywanansipa trukanqa mas ali kaykan aya täpapakuq aywashqansimi.

³ Asikushqansipitaqa mas ali kaykan waqashqansimi. Lakikur qaqlansi jukniraqyaptinpis shonqunsichömi shumaq kawanansipaq yarpachakunsi.

⁴ Tantiyakuq runaqa wanukuqla kashqanta tantiyakunmi. Mana tantiyakuq runami isanqa imatapis mana yarpachakuypa fiestan fiestan purikun.

⁵ Mana tantiyakuq runa halagamashqansipitaqa tantiyakuq runa anyapämashqansimi mas ali kaykan.

⁶ Mana tantiyakuq runaqa shiraka rupar pashtaqnömi lutala imapitapis asikun. Sayno kashqanpis manakaqlapaqmi kaykan.

⁷ Tantiyakuq kashqansita yarparpis runa mayinsita nakasirqa mana tantiyakuqmi kaykansi. Pipis chaskipakurqa lutan ruraymanmi churakan.

⁸ Aruyta qalarir kushikushqansipitapis usharkurmi masqa kushikunsi. Imapitapis jukla rabyakunaykipa trukanqa mas ali kaykan pacienciakushqaykimi.

⁹ Imapitapis juklaqa ama rabyakunkisu. Mana tantiyakuq runakunalami saynöqa rabyakuyan.

¹⁰ Ama niysu: <<¿Imanirraq unayqa imapis mas ali karqan?>> Sayno nirqa mana tantiyakuq runanömi parlaykanki.

¹¹ Kay pasachöqa tantiyakuq kashqayki alimi kaykan. Tantiyakuq kashqaykiwan rïcu kashqaykimi isanqa mas ali kaykan.

¹² Tantiyakuq kay y rïcu kaymi ima peligrupitapis sapäshunki. Sayno kaptinpis tantiyakuq runaqa rïcu runapitapis mas ali kawaytami tarin.

¹³ Tayta Dios wiksusishqantaqa manami pipis derechayta kamäpakunsu. Sayno kaykaptinqa Tayta Dios kamakäsishqanta shumaq tantiyakunki.

¹⁴ Jawka kawanaykipaq kamakäsiptinqa kushish kawanki. Nakaycho kanaykipaq kamakäsiptinqa tantiyakunki kushikuypis lakikuypis Tayta Diospita kashqanta. Isanqa waray warantin imano kanaykipaq kashqantapis manami musyankisu.

¹⁵ Kay nakay pasacho rikashkämi ali runa kaykarpis manaraqpis aykäta wanukuqta. Saynöpis rikashkämi fiyu runa kaykarpis aska wata kawaqta.

¹⁶ Ama jusaynaq tukunkisu ni yachaq tukunkisu. Sayno karqa kikilaykimi mana aliman chanki.

¹⁷ Saynöpis ama jusalikunkisu ni mana tantiyakuqqa kankisu. Sayno karqa kikilaykimi wanuyta ashinki.

¹⁸ Say nishqäkunata chaskikuy. Saynöpami jusaynaq tukunkisu ni jusalikunkisu. Tayta Diosta mansapakur sayno kawaptikiqa lapanpis alimi yarqapäshunki.

¹⁹ Tantiyakuq karqa ima peligrupitapis qeshpinsimi. Saymi marka sararaq chunkantin runakunapitapis tantiyakuq runa mas ali kaykan.

²⁰ Kay pasachöqa manami pipis kansu alilata ruraq y imaypis mana jusalikuqqa.

²¹ Runakuna lapan niyashqanta ama cäsupankisu. Sayno mana cäsuparqa ashmayniki washaykita rimashqantapis manami musyankisu.

²² Qampis aska kutimi jukpa washanta rimashkanki. Sayta manami ñëgankimansu.

Tantiyakuq kananpaq yarpachakushqan

²³ Kay pasacho imanir lapan päsashqankunatapis tantiyanäpaqmi yarpachakushkä. Mayjina yarpachakurpis manami tantiyayta atipashkäsu.

²⁴ Tantiyanansipaqqa fiyupa ajami. Saykunataqa manami pipis tantiyayta atipansu.

²⁵ Sayno kaptinpis tantiyakuq kanäpaq y lapan päsashqankunata tantiyanäpaq masraqmi yarpachakurqä. Saynöpami tantiyakurqä yaqa kay y mana tantiyakuq kay mana ali kashqanta.

²⁶ Saynöpis tantiyakurqä mañösa warmi wanuypitapis mas mansaypaq kashqanta. Say warmipa shonqunqa trampanömi y rikrankunapis waskanömi kaykan. Tayta Dios munashqanno kawaq runaqa say niraq warmipita witikunmi. Jusalikur kawaq runami isanqa say warmiwan kakun.

²⁷ Yachasikuq kar shumaq yarpachakushqätami kanan nishayki:

²⁸ Kay pasacho imanir lapan päsashqankunatapis tantiyanäpaq mayjina yarpachakurpis manami shumaq tantiyayta kamäpaküsu. Isanqa tantiyashkä Tayta Dios munashqanno kawaq runakuna walkala kayashqantami. Waranqa (1,000) runakunapita juklaylatami tarishkä Tayta Dios munashqanno kawaqta. Waranqa warmikunapitaqa manami ni juklaylatapis tarishkäsu Tayta Dios munashqanno kawaqta.

²⁹ Saynöpis tantiyakushkämi jusaynaq kawanansipaq Tayta Dios kamamashqansita. Sayno kawanansipaq kamash kaykarmi lutan rurayman churakashkansi.