Eclesiastés 6 - Tayta Diospa Wilakuynin1 Kay pasacho mastapis mana alikunata maysaychömi rikashkä. 2 Rikashkämi imaykayuqpis kananpaq y respitash kananpaq pitapis Tayta Dios yanapashqanta. Sayno yanapaptinmi imatapis munashqanta tarin. Sayno tarirpis manami kikinqa provichansu, sinöqa jäpa runakunami imaykantapis provichayan. Sayqa kaykan fiyupa lakikuypaqmi. 3 Aybësis cäsu kanmanmi juk runa pachak (100) suriyuq karpis y aska wata kawash karpis lakishla kawashqan y wanuptin shumaq mana pampayashqan. Say runapaqqa mas alimi kanman karqan manaraq yurir shulu wamrano wanukuptin. 4 Shuluqa mas alimi kaykan waläla kash karpis, mana musyakayla pampash karpis, jutiynaqla kash karpis, 5 asikyay pasata mana rikash karpis y imata mana musyash karpis. 6 Say runa ishkay waranqa (2,000) wata kawash karpis kushish mana kawarqa shulupitapis peormi kaykan. Ishkanpis wanukuqlami kaykäyan. 7 Runaqa pachalanpaqmi waran waran arun. Sayno kaptinpis nisidäninqa manami imaypis ushakansu. 8 Saynölami tantiyakuq karpis y mana tantiyakuq karpis, pobri karpis y rïcu karpis imalatapis nistansi. 9 Sayno kaykaptinqa imansipis kashlanwan contentakushun. < 10 Lapan päsaqkunatapis unaypitanami Tayta Dios kamakäsirqan. Imano kanansipaq kaqtapis Tayta Dios maynami destinarqan. Noqansipita mas munayyuq kaykaptinqa yarpashqanno kamakäsishqanpita Tayta Diospa contran ama parlashunsu. 11 Aläpa parlarqa mana conviëniqkunatami parlansi. Sayno parlarqa manami imatapis jorqunsisu. 12 Kay pasacho kawashqansi lantuyno päsaqla kaptin manami pipis musyansu noqansipaq ima mas ali kashqantapis. Saynöpis manami pipis musyansu wanukuptin kay pasacho ima päsananpaq kashqantapis. |
© 2003, Wycliffe Bible Translators, Inc. All rights reserved.
Wycliffe Bible Translators, Inc.