Eclesiastés 5 - Tayta Diospa Wilakuynin

Tayta Diosta promitishqansita cumplinansipaq yäsishqan

¹ 1 (4.17) Tayta Diospa wayinman aywar shumaq yarpachakunki saycho yachakushqaykita cäsukunaykipaq. Mana tantiyakuq runakunanöqa ama kankisu. Paykunaqa sacrificiuta aparpis Tayta Diosta manami cäsukuyansu. Mana tantiyakuypami jusalikuyan.

² 2 (1) Lutalaqa Tayta Diosta imatapis ama promitinkisu. Ni yarpaylaykichöpis mana cumplinaykipaq kaqtaqa ama promitinkisu. Payqa jana pasachömi kaykan y qamqa kay pasalachömi kaykanki. Sayno kaykaptinqa mejor upälakunki.

³ 3 (2) Aläpa yarpachakuqkuna mana alitami sueñupäkuyan. Saynölami aläpa parlaqkunapis manakaqkunata parlayan.

⁴ 4 (3) Mana tantiyakuq runaqa lutala promitirmi Tayta Diosta rabyanäsin. Sayno kaptinqa Tayta Diosta imata promitishqaykitapis mana qonqaypa cumplinki.

⁵ 5 (4) Mana cumplinaykipaq kaptinqa ama imatapis promitinkisu.

⁶ 6 (5) Cuidädu Tayta Diosta imatapis lutala promitirkur cürapa nawpancho ninkiman: <>. Sayno nir Tayta Diosta rabyanäsiptikiqa castigashunkimi.

⁷ 7 (6) Runaqa munashqanta chaskinan kashqami aläpa parlar lutala imatapis promitin. Qamqa Tayta Diosta mansapakur sayno ama kankisu.

Mana ali autoridäkuna kayashqan

⁸ 8 (7) Maysaychöpis pobrikunata fiyupa nakaykäsiyaqta rikar o yaqa autoridäkunata rikar ama espantakuysu. Autoridäkuna sayno lutanta rurayan mas munayyuq kaq autoridäkuna favornin sharkuptinmi. Y say munayyuq autoridäkunapapis mas mandaq autoridäkunami favornin sharkuyan.

⁹ 9 (8) Autoridäkuna sayno sapänakuyaptin ¿markansikuna mejoraykansuraq? Saynöpis ¿chakra runakunata rey yanapaykansuraq?

Arur tarishqansi ushakaqla kashqan

¹⁰ 10 (9) Qellaypaq wachakash kaqkunaqa tarirpis manami contentakuyansu. Rïcukunaqa mas rïcuyarpis manami contentakuyansu. Sayno kashqanpis walälami kaykan.

¹¹ 11 (10) Imaykansikunapis mas aska kaptinqa masmi imaykachöpis gastansi. Nistashqansipita masta sarararpis manami ima provëchutapis jorqunsisu, sinöqa rikaylami rikaykunsi.

¹² 12 (11) Arukuq runaqa walkata o askata mikurpis kushishqami punun. Rïcu runami isanqa imaykanpaqpis yarpachakur punuytapis tarinsu.

¹³ 13 (12) Kay pasacho rikashkä rïcu runa imaykata shuntashqanpis afanlanpaq kashqantami. Sayqa fiyupa lakikuypaqmi kaykan.

¹⁴ 14 (13) Say runaqa mana ali negociuman jatikarmi lapan imaykantapis ushaskin. Saymi surinta kachapänanpaq imalanpis kannasu.

¹⁵ 15 (14) Kay pasaman jinayla shamushqansinölami jinayla aywakushun. Aywakurqa ima tarishqansitapis manami apashunsu.

¹⁶ 16 (15) Sayno kaykaptinqa ¿imapaqtaq välin sayjina nakar arushqansipis? Sayqa lakikuypaqmi kaykan.

¹⁷ 17 (16) Saynöpis kawashqansiyaqqa lakikushpansi fiyupa yarpachakur, nanäsikur y resientikushqami kawansi.

¹⁸ 18 (17) Sayno kaykaptinqa noqapa tantiyaynïpitaqa mikushun, upushun y kay vïdacho nakar tarishqansikunata kushish gastashun. Sayno kawashqansimi pägunsi kaykan.

¹⁹ 19 (18) Sayno kaptinqa Tayta Dios kamaripämashqansita mikur upur kushish kawashun. Sayno kushish kawashqansimi Tayta Diospa bendicionnin kaykan.

²⁰ 20 (19) Kushish kawanansipaq Tayta Dios yanapämashqaqa manami yarpachakunsinasu imayyaqla kawanansipaq kashqantapis.