Eclesiastés 4 - Tayta Diospa Wilakuynin

¹ Rikashkämi kay pasacho munayyuq runakuna humildi runakunata nakasiyashqanta. Pipis mana shoqaptin y mana yanapaptin waqaykäyaqtami rikashkä.

² Saymi tantiyakushkä kawaq runakunapitapis wanukuq runakuna mas ali kaykäyashqanta.

³ Wanukuqkunapitapis y kawaqkunapitapis mas ali kaykan manaraq yuriqkunami. Paykunaqa manami rikayanraqsu kay pasacho mana ali ruraykunata.

⁴ Saynöpis rikashkämi ali arukuqta chikipäyashqanta. Sayno karqa wayrata sariyta munaqnölami kaykansi.

⁵ Runakunaqa niyan: <>.

⁶ Noqami isanqa nï: Askata gänar mana jamaypa arunansipa trukanqa walkalata gänarpis jamashqansimi mas ali kaykan. Mana jamaypa arurqa wayrata sariyta munaqnölami kaykansi.

Japala kay mana ali kashqan

⁷ Saypitanami mastapis rikashkä. Say rikashqäpis walälami kaykan.

⁸ Rikashkämi wakin runa japala kaykarpis suriynaq y wawqiynaq kaykarpis mana jamaypa arushqanta. Aykata gänarpis masta mastami munan. Imaypis manami yarpachakunsu sayjina arushqan pipaq quëdananpaq kashqanta ni imanir aläpa nakar arushqantapis. Sayno aläpa nakar arushqanpis walälami kaykan.

⁹ Japalan arunanpa trukanqa ishkaq aruyashqanmi mas ali kaykan.

¹⁰ Ishkaq karqa juknin ishkiptinpis juknin sharkasinmi. Kikilan kaykar ishkiptinqa manami pïninpis kansu sharkasinanpaq. Kikilan runa ishkirqa lakipaypaqmi kaykan.

¹¹ Saynöpis ishkaq punurqa qoñüsinakuyanmi. Juklayla punurqa ¿imanöparaq qoñurinqa?

¹² Juklaylataqa pelyarpis vincinmi. Ishkaq kaptinmi isanqa pipis vinciyta puëdinsu. Waskapis kimsapash karqa manami asïlaqa rachinsu.

Rey kaypis päsaqla kashqan

¹³ Mana tantiyakuq y yäsishqanta mana chaskikuq awkin reypitaqa tantiyakuq maqtami pobrila karpis mas ali kaykan.

¹⁴ Say maqtapaqa awkin reypa trukan yaykuptin carcilpita yarqush kaptinpis y pobrila yurish kaptinpis

¹⁵ lapan runakunami favornin kaykäyan.

¹⁶ Rey kayman yaykushqan wisan saysika runakuna favornin karkurpis tiempu päsarkuptinqa paypapis contranmi rikakuyan. Lapan saykunapis wayrata sariyta munaqnölami kaykan.