Eclesiastés 2 - Tayta Diospa Wilakuynin

Shonqunsi munashqanno kawashqansi manakaqlapaq kashqan

¹ Saynöpis yarpaylächo nirqä: <>. Sayno kawashqäpis walälami kaykan.

² Saymi kushikushqäpis y gustüta rurashqäpis manakaqlapaq kashqanta tantiyakushkä.

³ Saynölami ali ruraykuna y lutan ruraykuna imano kashqantapis musyanäpaq mana tantiyakuq runano vïnuta upyayman churakarqä. Sayno rurarqä upyashqansi ali o mana ali kashqantapis tantiyanäpaqmi.

⁴ Saynöpis imayka obratami rurasishkä. Palaciukunatapis arusishkä. Üvatapis askatami plantasishkä.

⁵ Huertata ruraykasirmi imayka niraq waytakunatapis plantasishkä. Saynölami tukuy casta frütakunatapis plantasishkä.

⁶ Plantäkunata parqusinäpaqpis jatusaq pözukunatami rurasishkä.

⁷ Ashmaytapis askatami olqutapis warmitapis rantishkä. Makïcho yuriq ashmaynïkunapis kayashqami. Jerusaléncho taq unay runakunapa wäkankunapita y uyshankunapitapis mas askami wäkäkuna y uyshäkunapis kash.

⁸ Wakin reykunapata y wakin provinciakunapatami qorintapis qellaynintapis muntun muntun impuestuta cobrar shuntashkä. Cantapämaqkunapis askaqmi olqupis warmipis kayash. Gustükunata rurarmi warmitapis askaqta sararashkä.

⁹ Jerusaléncho taq unay runakunapitapis mas reqish y mas rïcumi kashkä. Imaypis tantiyakuqmi kashkä.

¹⁰ Imatapis shonqü munashqantaqa lapantapis kushishqami rurashkä. Say kushikushlämi pägü kash lapan rurashqäkunapita.

¹¹ Sayno kaptinpis yarpachakurmi tantiyakurqä kay pasacho fiyupa nakar rurashqansikuna manakaqlapaq kashqanta. Saymi rurashqansikunaman atiënikurqa wayrata sariyta munaqnöla kaykansi.

Tantiyakuq y mana tantiyakuq runapis ushakaqla kashqan

¹² Noqa musyashqäpita mastaqa trukä yaykuq rey manami imatapis musyanqasu. Saymi tantiyakuq kay y mana tantiyakuq kay imano kashqantapis tantiyasinäpaq yarpachakushkä.

¹³ Yarpachakurmi tantiyakushkä sakaypita aksi mas ali kashqanno tantiyakuq kay mas ali kashqanta.

¹⁴ Tantiyakuq runaqa imatapis tantiyakunmi. Mana tantiyakuq runami isanqa sakäpakushno kar imatapis tantiyansu. Sayno kaptinpis tantiyakushkämi tantiyakuq y mana tantiyakuq runapis iwal ushakashqanta.

¹⁵ Saymi yarpachakur nirqä: Mana tantiyakuq runanöla noqapis wanunäpaq kaykaptinqa tantiyakuq kashqäpis ¿imapaqtaq välin? Saymi tantiyakurqä tantiyakuq kaypis manakaqlapaq kashqanta.

¹⁶ Wanuptinqa tantiyakuqtapis y mana tantiyakuqtapis qonqaykuyanqami. Tantiyakuq runa y mana tantiyakuq runapis ushakaqlami kaykäyan.

¹⁷ Sayta tantiyakurirmi fiyupa lakikur ima ruraytapis munarqänasu. Saykunata tantiyayta munar wayrata sariyta munaqnölami kaykansi.

Arushqansipis ushakaqla kashqan

¹⁸ Saynöpis tantiyakushkä wanukuptï trukä yaykuq rey lapan rurasishqäkunata provichananpaq kashqantami. Sayta tantiyakurmi fiyupa lakikushkä.

¹⁹ Kay pasacho sayjina nakar y shumaq tantiyakuykur rurasishqäkuna ¿tantiyakuq o mana tantiyakuq runapa makinchösuraq kanqa? Shumaq tantiyakushqaqa kay vïdacho lapan rurashqansipis manakaqlapaqmi kaykan.

²⁰ Kay pasacho pasaypa nakar rurashqäkuna ushakaqla kashqanta tantiyakurmi shonqüpis nanayparaq lakikurqan.

²¹ Shumaq yarpachakuykur arushqansitapis wanukurqa mana yanapämaqninsikunatami kachapaykunsi. Saypis manakaqlapaq y mana alimi kaykan.

^22-23 Runaqa waran waran pasaypa yarpachakularmi kawan. Aruytapis nakarmi arun. Aybësis punuytapis manami tarinsu. Sayno kaptinpis kay pasacho fiyupa nakar arushqanpita ¿imatataq jorqun? Sayno kaptinqa arushqansikunapis manakaqlapaqmi kaykan.

²⁴ Sayno kaykaptinqa kawashqansiyaq tarishqansita kushish mikushun y upushun. Kushish kawanansipaqmi Tayta Dios kamamashkansi.

²⁵ Tayta Dios mana yanapämashqaqa manami pipis kushish kawanmansu.

²⁶ Kuyashqan kaqtami Tayta Dios yanapan tantiyakuq, yachaq y kushish kawananpaq. Jusalikur kawaq runatami isanqa kachariykun. Saymi say runa arun Tayta Dios munashqanno kawaq runa provichanalanpaq. Mayjina arurpis wayrata sariyta munaqnölami kaykan.