Eclesiastés 12 - Tayta Diospa Wilakuynin

¹ Maqta kashqaykiyaq kamamaqninsi Tayta Dios munashqanno kawanaykipaq yarpachakuy. Awkinyarnaqa manami payta shumaq sirviyta kamäpakunkinasu. Kawarpis lakikularnami kawanki.

² Sayno kaykaptinqa intita, killata, qoyllarkunata y ima asikyaqtapis rikayta puëdishqaykiyaq y nawikipis manaraq azulyashqanyaq Tayta Diosta sirviy.

³ Awkinyaptikiqa lapan cuerpuykimi suksukyanqa. Chankaykipis mirmiryanqami. Kiruykipis ushakanqami. Nawikipis sakanqanami.

⁴ Cällicho büllata ruraptinpis manami wiyankinasu. Mulinu taqrarashqantapis manami wiyankinasu. Pishqukuna cantayashqantapis manami wiyankinasu.

⁵ Wisaypa aywaytapis mansankinami. Nänipa aywarpis tuninankinami. Almendru jacha waytaraykaqnömi aqsaykipis soquyanqa. Chuklus japaylapanami purinkipaqpis. Majaykitapis manami munapankinasu. Wanukurnaqa imaypis mana kutimuqnami aywakunki. Cällichömi shuntakäyanqa waqaraykar pampaq apayäshunaykipaqpis.

⁶ Sayno kaykaptinqa qellay cadinayki manaraq rachishqanyaq, qori mankayki manaraq pakishqanyaq, uylluyki pözu kuchuncho manaraq pakishqanyaq y pözupita yakuta jorqunaykipaq waska manaraq rachikashqanyaq Tayta Diosta sirvinki.

⁷ Alpalapita rurash karmi cuerpunsi yapay alpaman tikranqa. Tayta Dios qomashqansi almansimi isanqa pay kaqman kutinqa.

⁸ Noqa yachasikuqmi nï: <<¡Imaykapis ushakaqlami kaykan! ¡Kay pasacho päsashqankuna imanir y imapaq kashqantapis manami tantiyayta kamäpakunsisu!>>

Libru ushanan

⁹ Kay libruta qelqaq runaqa waranlanta waranlanta mas tantiyakuq rikakurmi runakunata yachashqanman tupu yachasirqan. Wilapäyashqan proverbiukunata shuntaykurmi askata qelqarqan. Saynölami aska proverbiukunata kikinpa yarpaylanpitapis qelqarqan.

¹⁰ Palabrakunata shumaq kamakäsirmi lapanta qelqarqan. Say qelqashqankunaqa lapanpis rasun kaqlami kaykan.

¹¹ Picano y firmi jawiraq estäcanömi tantiyakuqkuna yäsishqankunaqa kaykan. Sayno yäsinanpaq Tayta Diosmi tantiyasin. Payqa ali misikuqmi kaykan.

¹² Hïju, juk libruta liyir cuidädu kaycho qelqaraykashqanpita mas juk yachasikuyta chaskinkiman. Runakunaqa saysika librukunatami qelqayan. Aläpa estudiaypis utikäsikunmi.

¹³ Kay lapan yachasikuyta wiyar tantiyakunki Tayta Diosta mansapakur mandamientunkunata cumplinaykipaq kashqantami. Saypaqmi kay pasacho runa kawan.

¹⁴ Tayta Diosqa imanöpis kawashqansiman tupumi juzgamäshun. Pakaylapa rurashqansipitapis juzgamäshunmi.