Eclesiastés 11 - Tayta Diospa Wilakuynin

¹ Tantaykita yakuman jitay. Waray warantinqa say jitashqaykita tarinkipaqmi.

² Say nishqannöla pïmaytapis yanapay. Waray warantinkuna imapis päsashuptiki kikikitapis yanapäshunkimi.

³ Pukutay yanawyayparaq juntaptinqa musyansimi tamyamunanpaq kashqanta. Jacha wisaypa tuniptin o uraypa tuniptinpis musyansimi tunishlancho ushakänanpaq kashqanta.

⁴ Saki jirkaläpita wayra shamuptinmi musyansi manaraq murupakunansipaq kashqanta. Lamarläpita pukutay juntämuptinmi musyansi manaraq cosechanansipaq kashqanta.

⁵ Isanqa manami musyansisu wayra maypa aywashqanta, mamanpa pachancho wamra imano rurakashqanta y imaykatapis kamaq Tayta Dios imata rurashqantapis.

⁶ Saynöpis manami musyansisu punta muruy o qepa muruy mas ali wayunanpaq kashqantapis. Capazchir ishkanpis ali wayunqa. Sayno kaptinqa punta muruytapis qepa muruytapis murupakushun.

Maqtakunata yäsishqan

⁷ Asikyay pasacho kawayqa seqaypa kushikuypaqmi kaykan.

⁸ Aska wata kushish kawarpis wanukurqa asikyay pasata manami imaypis rikankinasu. Manami musyankisu wanukur imano kanaykipaq kashqantapis.

⁹ Maqtakuna, maqta kayashqaykiyaq shonquyki munashqanno kushish kawayay. Isanqa tantiyakuyay lapan rurayashqaykipitapis Tayta Dios juzgayäshunaykipaq kashqanta.

¹⁰ Maqta kaypis päsaqla kaykaptinqa mana rabyanaypa y mana jusalikuypa kawayay.