Eclesiastés 10 - Tayta Diospa Wilakuynin

¹ Perfümiman chinrash yaykur perdisishqannömi mana tantiyakuq runapis yachaq runa yäsishqanta perdisin.

² Tantiyakuq runaqa alitami yarpan. Mana tantiyakuq runami isanqa mana alita yarpan.

³ Mana tantiyakuq runaqa imata rurarpis lutantami ruran. Saymi pïmaypis paypaqqa upa kashqanta niyan.

⁴ Rey olqutupäshuptikipis ama rabyakuysu. Pacienciakurqa rabyash kaykaqtapis qajarpasinkimi.

⁵ Kay pasacho rikashkämi reykuna lutanta rurar

⁶ mana tantiyakuq runata mandaq kananpaq churayashqanta y tantiyakuq runatana pisapakuqla kananpaq churayashqanta.

⁷ Saynöpis rikashkämi ashmay runakuna patronno cawallunkuna loqash puriykäyaqta y patronkuna ashmayno chakilapa puriykäyaqta.

⁸ Uchkuta uchkurqa kikinmi sayman jeqanqa. Perqata paskaptinqa culebrami picanqa.

⁹ Rumita pakirqa pakipanwanmi lawakunqa. Yantata shilirqa shaklunwanmi qawsikunqa.

¹⁰ Jächa upayaptin mana afilarqa mas kalpawanraqmi mutunsi. Imatapis shumaq yarpachakuykur rurashqaqa mas alimi kaykan.

¹¹ Culebra mana picananpaq upatakäsiyta yachashqanpis picaptinqa manami välinsu.

¹² Tantiyakuq runa parlashqanqa maypis wiyakuy munaymi. Mana tantiyakuq runa parlashqanqa ajayaypaqmi kaykan.

¹³ Mana tantiyakuq runaqa imaypis manakaqkunalatami parlan.

¹⁴ Payqa manami imaypis upälakunsu. Waray warantinkuna ima päsananpaq kashqantapis mana musyaykarqa ¿piraq musyanman wanukuptin ima päsananpaq kashqantapis?

¹⁵ Tulun ushmaykaq runaqa ichiklata arurkurmi pasaypa utikan. Sayno karmi imata rurananpaqpis musyansu.

¹⁶ Kuyapaypaqmi juk nación kaykan mandaqnin rey wamrala kaptin y mandäsiqninkunapis fiestata ruralar kakuyaptinqa.

¹⁷ Kushikuypaqmi juk nación kaykan mandaqnin rey tantiyakuq kaptin. Saynöpis kushikuypaqmi kaykan mandäsiqninkunapis upyaman churakäyänanpa trukan kalpan kananpaq höralancho mikuyaptin.

¹⁸ Qela runapaqa wayinpis jutuykälarmi ushakan. Alsananpa trukan rikaräkuptinqa tuninmi.

¹⁹ Mikuyqa pacha junta mikunansipaqmi. Vïnuqa kushikunansipaqmi. Qellayqa imachöpis gastanansipaqmi.

²⁰ Shonqulaykichöpis reypa contran ama yarpaysu. Japalayki karpis rïcu runapa washanta ama parlaysu. Parlaptikiqa yukishlapis wilaykunmanmi.