Deuteronomio 34 - Tayta Diospa Wilakuynin

Moisés wanushqan

¹ Saypitanami Moab pampapita Moisés aywar Nebo jirkacho kaykaq Pisga niyashqan jirkaman wisarqan. Say jirkaqa Jericó simpanchömi kaykan. Say jirkapitami Tayta Dios rikasirqan Galaad partipita hasta Dan partiyaq.

² Saynöpis rikasirqan Neftalí partita, Efraín partita, Manasés partita y Judá partita hasta Mediterráneo Lamaryaq.

³ Saynöpis rikasirqan Neguevta y Jordán mayupa aywaq pampatapis Jericó markapita hasta Zoar markayaq. Jericópa jukaq jutinmi karqan Palmëra Marka.

⁴ Nirkurmi Tayta Dios nirqan: <>.

⁵ Tayta Dios nishqannölami sirviqnin Moisés say jirkacho wanukurqan. Say jirkaqa Moab nacionchömi kaykan.

⁶ Wanuykuptinmi Bet-peor cercancho kaykaq Moab pampacho pampakurqan. Kananyaq manami pipis musyansu maynincho pamparashqantapis.

⁷ Pachak ishkay chunka (120) watayuq kaykarmi Moisés wanurqan. Wanushqanyaqpis nawin manami sakarqanraqsu ni kalpanpis ushakarqanraqsu.

⁸ Wanushqanta musyaykurmi Israel runakuna juk killa intëru Moab pampacho lütuyarqan.

⁹ Manaraq wanukurmi Nunpa surin Josuépa umanman makinta churaykur Tayta Diosta Moisés manakurqan tantiyakuq kananpaq. Saymi Tayta Dios nishqannöla Moiséspa trukan Josuétana Israel runakuna respitar wiyakuyarqan.

¹⁰ Tayta Diospa wilakuqnin Moisésnöqa manami pipis karqansu. Paywanmi Tayta Dios imaypis cära cära parlayaq.

¹¹ Paytami Tayta Dios kacharqan Egipto runakunata mansariypaq castïgukunawan castigananpaq. Say castïgukunawanmi Tayta Dios castigarqan Faraónta, mandäsiqninkunata y lapan Egipto nacionta.

¹² Lapan Israel runakuna rikaymi Tayta Dios poderninwan mansariypaq castïgukunawan castigarqan.