Daniel 3 - Tayta Diospa Wilakuynin

Qoripita rurash monumentuta adorayashqan

¹ Saypitanami rey Nabucodonosor qoripita juk monumentuta rurasirqan kimsa chunka (30) metru altuta y kimsa metru anchuta. Nirkurmi say monumentuta ichisirqan Babilonia provinciacho kaykaq Dura niyashqan pampaman.

² Saypitanami qayasirqan nacionta mandäsiqninkunata, prefectukunata, gobernadorkunata, yäsikuqkunata, tesorërukunata, juezkunata, marka autoridäkunata y provinciakunacho kaykaq wakin autoridäkunatapis. Paykunata qayasirqan monumentuta ichisishqanpita kushikur fiestata rurayänanpaqmi.

³ Sayno qayasiptinmi nacionta mandäsiqninkuna, prefectukuna, gobernadorkuna, yäsikuqkuna, tesorërukuna, juezkuna, marka autoridäkuna y provinciakunacho kaykaq wakin autoridäkunapis monumentu ichisishqan kaqman lapan shuntakäyarqan.

⁴ Saychömi wilakuq runa sinchipa qayakur nirqan: <

⁵ Imay hörapis cornëta, këna, taksha arpa, guitärra, jatun arpa, zampöña y mas wakin instrumentukunapis waqamushqanta wiyar juk yarpayla lapayki rey Nabucodonosor ichisishqan monumentuta adorayänaykipaq qonqurpakuyanki.

⁶ Mayqaykipis say monumentuta qonqurpaykur mana adorayaptikiqa jinan hörami fiyupa waylash jornuman qaykuyäshunki>>.

⁷ Órden mansariypaq kaptinmi instrumentukuna waqamushqanta wiyar intëru markakunapita y nacionkunapita shamuq runakuna ima idiömata parlaq karpis qonqurpakuykur rey Nabucodonosor ichisishqan qori monumentuta adorayarqan.

⁸ Saypitanami juk ishkay Babilonia runakuna aywayarqan rey kaqman. Chaykurmi Israel runakunapa contran

⁹ Nabucodonosorta kayno niyarqan: <<¡Qamla imayyaqpis rey kaykulay!

¹⁰ Qammi ordenashkanki cornëtata, kënata, taksha arpata, guitärrata, arpata, zampöñata y mas wakin instrumentukunatapis tukamuqta wiyayashpan qoripita rurasishqayki monumentupa puntanman qonqurpaykur lapanpis adorayänanpaq.

¹¹ Saynöpis ordenashkanki qonqurpakuykur monumentuta mana adoraq kaqtaqa waylash jornuman qaykasinaykipaqmi.

¹² Sayno ordenaykaptikipis kanmi Babilonia provinciacho mandäsiyäshunaykipaq churashqayki juk ishkay Israel runakuna nishqaykita mana cäsukuq. Tayta rey, qam adorashqayki dioskunata paykunaqa manami adorayansu. Say runakunaqa rurasishqayki qori monumentuta adorayänanpaq ordenaykaptikipis manami adoraykäyansu. Say runakunami Sadrac, Mesac y Abed-nego kaykäyan>>.

¹³ Sayno niyaptinmi Nabucodonosor fiyupa rabyash qayasirqan Sadracta, Mesacta y Abed-neguta. Say maqtakuna reypa nawpanman chaykuyaptinmi

¹⁴ Nabucodonosor nirqan: <<¿Rasunpaku qamkuna diosnïkunatapis y qoripita rurasishqä monumentutapis adorayankisu?

¹⁵ Kananqa cornëtata, kënata, taksha arpata, guitärrata, arpata, zampöñata y wakin instrumentukunatapis tukamuqta wiyayashpayki jukla qonqurpakuykur rurasishqä monumentuta adorayay. Mana adorayaptikiqa fiyupa waylaykaq jornumanmi qaykasiyäshayki. Sayno ruraptï ¿ima diosraq salvayäshunki?>>

¹⁶ Niptinmi Sadrac, Mesac y Abed-nego Nabucodonosorta niyarqan: <

¹⁷ Waylash jornuman qaykayämaptikipis sirviyashqä Tayta Diosnïmi say jornupita y makikipitapis salvayämanqa.

¹⁸ Jina mana salvayämaptinpis noqakuna manami diosnikikunata sirviyäshaqsu ni say rurasishqayki monumentutapis adorayäshaqsu>>.

Waylaykaq jornupita Tayta Dios salvashqan

¹⁹ Sadrac, Mesac y Abed-nego sayno niyaptinmi Nabucodonosor pukayayparaq rabyashpan jornu waylasiqkunata ordenarqan qanchis kuti mas waylasiyänanpaq.

²⁰ Nirkurmi ali chölunnin soldädukunata mandarqan Sadracta, Mesacta y Abed-neguta pankarkur waylash jornuman qaykuyänanpaq.

²¹ Sayno rurarkurmi say jornuman qaykuyarqan cäpantinta, lanqintinta, uman wankukunantinta y lapan jatiräyashqan mödanantinta.

^22-23 Qaykuyaptinmi say maqtakunaqa makin chakin pankash jornu rurinman jeqarpuyarqan. Apurä qaykuyänanpaq rey ordenaptin y pasaypa waylash jornu karmi qaykuq soldädukunata rupariykurqan. Saymi Sadracta, Mesacta y Abed-neguta qaykuq soldädukuna jukla wanuyarqan.

²⁴ Sayta rikaykurmi jamaraykashqanpita sharkurkur Nabucodonosor fiyupa espantash yäsiqninkunata nirqan: <<¿Manaku kimsan maqtakunata pankarkur jornuman qaykasishkansi?>> Sayno niptinmi paykuna niyarqan: <>.

²⁵ Saymi nirqan: <<¡Jornu rurincho chusku runakuna kachayla y mana rupakuypa puriykäyaqtami rikaykä! ¡Paykunawan kaykaq runaqa juk dios niraqmi kaykan!>>

²⁶ Saymi Nabucodonosor jornu kaqman aywaykur qayakurqan: <<¡Munayyuq Diosta adoraq Sadrac, Mesac y Abed-nego! ¡Yarqayämuy!>> Saymi kimsan maqtakuna jornupita yarqayämurqan.

²⁷ Yarqayämuptinmi paykuna kaqman nación mandäsiqninkuna, prefectukuna, gobernadorkuna y yäsikuqkuna rikaq shuntakäyarqan. Saychömi rikayarqan say maqtakunata ichiklatapis nina mana rupashqanta. Ni aqsalanpis ni mödanankunalapis mana rupash kaptinmi ni rupa rupalapis asyäyarqansu.

²⁸ Saymi Nabucodonosor nirqan: <

²⁹ Manami ima diospis saynöqa salvansu. Pï runatapis Sadrac, Mesac y Abed-nego adorayashqan Diospa contran parlaq kaqtaqa ichik ichikla roquykar ushakäsiyäsun. Wayinkunatapis rupasiyäsun. Sayno kasun may nacionpita kaptinpis y ima idiömata parlaptinpis>>.

³⁰ Saypitanami Sadracta, Mesacta y Abed-neguta Nabucodonosor churarqan Babilonia provinciacho munayyuq autoridä kayänanpaqmi.