Colosenses 4 - Tayta Diospa Wilakuynin

¹ Patronkuna, qamkunapapis patronniki jana pasachömi kaykan. Saymi ashmaynikikunata ali rikar imachöpis yanapäyänayki.

² Wawqi panikuna, Tayta Diosta agradëcikuyashpayki payta imaypis manakuyay.

³ Noqakunapaqpis Tayta Diosta manakuykuyälay Jesucristupa ali wilakuyninta wilakuyaptï shumaq chaskikuyänanpaq. Say wilakuyninta wilakushqäpitami carcilcho wichqaraykä.

⁴ Saynöpis manakuykuyälay ali wilakuyninta pïmaytapis shumaq tantiyasinäpaq.

⁵ Jesucristuta mana chaskikuq runakunawan ali kawayay. Alikunalata imaypis rurayay.

⁶ Piwanpis parlarqa ali shimilaykipa shakya shakyala parlapäyanki.

Carta ushanan

⁷ Kuyay wawqinsi Tíquico chämurmi imano kaykashqätapis wilayäshunki. Paypis Señor Jesucristupa wilakuqninmi kaykan.

⁸ Saymi payta kachaykämü imano kaykashqätapis wilayäshunaykipaq. Paymi shakyäsiyäshunki Tayta Diosman shumaq yärakuyänaykipaq.

⁹ Tíquicuwanmi Tayta Diosman yärakuq marka mayiki kuyay wawqinsi Onésimutapis kachaykämü. Paykunami wilayäshunki kaycho ima päsashqankunatapis.

¹⁰ Noqawan prësu kaykaq wawqinsi Aristarcumi salüdunta apasikamun. Saynömi Bernabépa prïmun Marcuspis salüdunta apasikamun. Marcos chämuptin yäsishqänöla shumaq chaskikuykuyay.

¹¹ Saynölami Justo niyashqan Jesúspis salüdunta qamkunapaq apasikamun. Aristarco, Marcos y Justumi Tayta Dios mandaykashqancho ali yanapämar shumaq shakyäsiyäman. Paykunalami Israel mayïkunapitaqa yanapaykäyäman.

¹² Jesucristupa sirviqnin marka mayiki Epafraspis salüduntami apasikamun. Paymi lapan shonqunwan qamkunapaq imaypis manakuykan Tayta Dios munashqanno ali kawayänaykipaq.

¹³ Qamkunapaq seqaypami lakikuykan. Saynölami lakikuykan Laodiceacho y Hierápolischo kaykaq wawqi panikunapaqpis.

¹⁴ Kuyanakuyashqä mëdicu Lucaswan Demaspis salüduntami qamkunapaq apasikayämun.

¹⁵ Laodiceacho kaykaq wawqi panikunatapis salüdüta qoykuyälanki. Saynöpis salüdüta qoykuyälanki Ninfasta y wayincho shuntakaq wawqi panikunatapis.

¹⁶ Kay cartata liyiskir apasiyanki Laodiceacho kaq wawqi panikunaman paykunapis liyiyänanpaq. Saynömi Laodiceaman apasishqä cartata liyirkur paykunapis apasiyämunqa qamkunapis liyiyänaykipaq.

¹⁷ Wawqinsi Arquiputa niyanki: <>.

¹⁸ Kay salüdütaqa kikïmi qelqarkamü. Mana qonqaylapa Tayta Diosta manakuyay prësu kaykashqäpita yarqunäpaq. Tayta Dios lapaykita kuyapaykuyäläshunki. [Amén.]