Colosenses 3 - Tayta Diospa Wilakuynin

Mushuq kawayta chaskikushqansi

¹ Jesucristuwan kawarimushna kaykarqa gloriacho kaqkunata ashiyay. Saychömi Tayta Diospa aluq kaq nawpancho Jesucristo jamaraykan.

² Kay pasalacho kawayänaykipaq yarpachakuyänaykipa trukanqa gloriacho kawayänaykipaq yarpachakuyay.

³ Qamkunaqa jusalikuypaq wanushna karmi Jesucristuwan Tayta Diospa nawpancho kawaykäyanki. Sayno kawayashqaykita runakuna kanan mana rikarpis

⁴ kawayta qomaqninsi Jesucristo kutimuptinmi qamkunapis paywan gloriacho kayankipaq.

⁵ Sayno kaykaptinqa mana jusalikuypa kawayay. Fornicación jusata ama jusalikuyaysu ni shonquykikuna mana alikunata munashqanta rurayaysu. Rïcuyaylapaqpis ama yarpachakuyaysu. Rïcuyaylapaq yarpachakurqa ïdulukunata adoraqnömi kaykäyanki.

⁶ Sayno jusalikuqkunataqa Tayta Dios rabyashpanmi castiganqa.

⁷ Qamkunapis nawpataqa saynömi kawayarqayki.

⁸ Kananqa pitapis ama rabyapäyaynasu, nanaparäyaynasu ni chikiyaynasu. Ama pipa washantapis rimayaynasu ni manakaqkunata parlayaynasu.

⁹ Saynöpis jukniki jukniki lulapänakuyaynasu. Makwa mödanata jitariqno unay kawayashqaykita kacharir

¹⁰ pay qoyäshushqayki mushuq kawaytana kawayay. Mushuq kawayta chaskikuyaptikimi kamamaqninsi Tayta Dios waran waran tantiyaykäsiyäshunki pay kashqanno kayänaykipaq.

¹¹ Saymi Israel runa o mana Israel runa karpis, señalash o señaläni karpis, mana yachaq karpis, jäpa runa karpis, ashmay o libri karpis Jesucristuta chaskikurqa lapansipis paypa makinchöna kawaykansi.

¹² Tayta Dios akrashqan y kuyashqan santu runakuna kaykarqa jukniki juknikipis kuyapänakur kawayay. Saynöpis yanapänakuyay, mana yachaq tukuypa kawayay, pïmaypaqpis ali shonqu kayay y pacienciakuyay.

¹³ Imalapitapis rabyanänaykipa trukanqa awantakuyay. Jaqayäsinakur imarqa perdonanakuyay. Jesucristo perdonayäshushqaykinöla qamkunapis perdonanakuyay.

¹⁴ Imano karpis kuyanakur jukniki juknikipis juk shonqula kawayay.

¹⁵ Jesucristupita ali kawayta chaskikush kaykarqa pïmaywanpis ali kawayay. Juk shonqula kawayänaykipaqmi Tayta Dios qayayäshushkanki. Saynöpis Tayta Diosta imaypis päkilä niyay.

¹⁶ Jesucristupa ali wilakuyninta imaypis yarparäyay. Say wilakuyninta shumaq tantiyakur yachasinakuyay y cäsukuyänaykipaq shakyäsinakuyay. Salmukunata, himnukunata y cörukunata cantar Tayta Diosta lapan shonquykikunawan agradëcikur alabayay.

¹⁷ Imata rurarpis y imata parlarpis Señor Jesucristupa jutincho rurayanki y parlayanki. Jesucristo salvayäshushqaykipita Tayta Diosta imaypis päkilä niyay.

Jesucristuta chaskikuqkuna imano kawayänanpaqpis nishqan

¹⁸ Warmikuna, Señor Jesucristuta chaskikushna kaykarqa runaykikunata cäsukuyay.

¹⁹ Runakuna, warmikikunata kuyayay. Olqutupänaykipa trukanqa ali shimilaykipa tantiyasiyay.

²⁰ Wamrakuna, mamaykita y taytaykita imaypis cäsukuyay. Sayno cäsukuyänaykitami Señor Jesucristo munan.

²¹ Wamrayuq kaqkuna, wamraykikuna mana jaqayäyänanpaq lutalaqa ama olqutupäyaysu.

²² Ashmaykuna, kay pasacho kaq patronnikikuna niyäshushqaykita rurayay. Rikayäshuptikilaqa ama aruq tukuyaysu, saypa trukanqa Tayta Diosta mansapakur lapan voluntänikiwan aruyay.

²³ Imata rurarpis runakunapaqnölaqa ama rurayaysu, sinöqa Señor Jesucristupaqno lapan shonquykikunawan rurayay.

²⁴ Musyayankimi Señor Jesucristupita gloriacho herenciata chaskiyänaykipaq kashqanta. Señor Jesucristumi rasunpa kaq patronniki kaykan.

²⁵ Mana alita ruraqkunataqa pï kaptinpis mana kuyapaypami Tayta Dios castiganqa.