Cantares 8 - Tayta Diospa Wilakuynin

Jipash:

¹ ¡Ima aliraq kanman mamäpa chuchunta chuchur qeshpiq turï kaptiki! Sayno kaptikiqa cällicho tinkushpansi musarkuptïpis manami pipis jamurämanmansu.

² Makipita janchakurkurmi mamäpa wayinman pushäman. Saychömi kuyakuq kayta yachasimankiman. Granädapita qapsish yakunwan talurkurmi noqapis alinnin kaq vïnuta qaräman.

³ Isuq kaq rikraykita jawnaparkamay. Aluq kaq rikraykiwan makalarkamay.

Maqta:

⁴ Jerusalén jipashkuna, promitiykayälämay kuyaynï punukuykaqta mana rikchasiyänaykipaq. Punuyta jimashqanyaq punukusun.

Soqta kaq cantu Yanasankuna:

⁵ ¡Rikayay! ¡Sunyaq jirkapita jipash shamuykan kuyayninta makalash! Manzäna jacha chakincho punukuykaqtami qamta rikchasishkä. Saychömi mamayki qeshyaq rikakush. Saychömi mamaykita wachay nanay sarish.

Maqta: Jipash:

⁶ Imaypis yarparämänaykipaq shonquykiman churaykalämay. Mana qonqämänaykipaq rikraykimanpis jutïta qelqaykulay. Kuyanakuytaqa wanuytano manami pipis sapansu. Waylunakuypitapis sepultürapitano manami qeshpinsisu. Kuyanakuyqa Tayta Diospita shamuq nina karmi imaypis upinsu.

⁷ Kuyanakuytaqa manami ni lamarpis ni mayupis upisiyta puëdinsu. Kuyanakuqkuna kacharinakunanpaq rïcu runa lapan riquëzankunata qotupaptinpis manami chaskipanqasu.

Jipashpa turinkuna:

⁸ Paninsipaqa manaraqmi chuchunpis pushkunraqsu. Pipis payta ashiq shamuptinqa ¿imatataq nishun?

⁹ Paninsi murällano kaptinqa qellaypita palaciuta rurasiqnöchi adornashwan. Adornuynaq punkuno kaptinqa cedru tablakunawan adornaqnöchi adornashwan.

Jipash:

¹⁰ Noqaqa murällanömi kaykä. Chuchükunapis rikachakuna törrikunanömi. Kuyaynïpa nawpanchöqa pasaypa kushishqami kaykä.

¹¹ Baal-hamónchömi Salomónpa üva chakran karqan. Say chakrantami runakunata arriendakuykuyarqan. Cada cosëcha ushaymi cada ünun waranqa (1,000) qellayta arriendunpita pägayaq.

¹² Salomón, say runakunapita waranqa qellayta chaskiptikipis y chakra rikaqkunata ishkay pachak (200) qellayta pägaptikipis noqaqa üva chakräta kikïmi rikakü.

Maqta:

¹³ Huertakunacho jamakuq reina, amïgükuna maya mayalami kaykäyan parlashqaykita wiyayänanpaq. Noqapis wiyanäpaq imalatapis parlarkalämuy.

Jipash:

¹⁴ Kuyaynï, luychuno karpis o tarushno karpis mushkuykaq jirkakuna jananpa cörrimuy.