Cantares 7 - Tayta Diospa Wilakuynin

Maqta:

¹ 1 (2) Reypa surinnöraq kuyaylapaq jipash, sandaliayki jatish kaptiki chakikipis kuyaylapaqmi kamaran. Adornu rurayta yachaqkuna rurayashqan adornunömi seqlaykipis kuyaylapaq kaykan.

² 2 (3) Pupuykipis ali vïnu juntaraykaq cöpanömi. Pachaykipis liriu waytawan intëru kuchunpa sapash trïgu qoturaykaqnömi.

³ 3 (4) Chuchuykipis milish luychu malwakunano kuyaylapaqmi.

⁴ 4 (5) Kunkaykipis marfilpita rurash törrino kuyaylapaqmi. Nawikipis Hesbón markacho kaykaq Bat-rabim punku nawpancho ishkay yaku kitanömi. Senqaykipis Damascuman rikaraykaq Líbanucho kaykaq törrinömi kuyaylapaq.

⁵ 5 (6) Umaykipis Carmelo puntano kuyaylapaqmi. Aqsaykipis fïnu jïluno karmi reytapis löcutäsin.

⁶ 6 (7) Kuyaynï, qamqa kanki pasaypa kuyaylapaqmi. Mana kachaypa maypis kuyakuylapaqmi kaykanki.

⁷ 7 (8) Palma jacha ichiraykaqnömi kuyaylapaq jatunkaray kaykanki. Chuchuykipis palma jachapa wayuynin warkuraykaqnömi kaykan.

⁸ 8 (9) Wayuyninta palakurkunäpaq palma jachamanmi wisayta munä. Saychömi tarishaq sartanpa üvano chuchuyki kaykaqta, jämayniki poqush manzänano mushkuykaqta

⁹ 9 (10) y shimiki alinnin vïnuno seqaypa mishkiykaqta. Musamaptikimi vïnuta upuptï kirüpa y qallüpa mishkir päsarpuqno kaykan.

Jipash:

¹⁰ 10 (11) Noqaqa kuyayläpaqmi kaykä. Paypis nawpalächo kaytami munan.

¹¹ 11 (12) Kuyaynï, markapita jukla yarqushun. Kuyaylapaq mushkuq waytakunapa chawpincho warämushun.

¹² 12 (13) Pasa wararkuptinnami üva chakrakunapa aywashun. Saycho rikamushun mä üvakuna maynakush mukluraykan y granädapis maynakush tukturaykan. Saychömi munashqaykita yawasishayki.

¹³ 13 (14) Saychömi mandrägorapis mushkuraykan. Saychömi tukuyläya frütakuna kaykan. Kuyaylä, reqishqayki y mana reqishqayki frütakunatami saycho yawasishayki.