Cantares 6 - Tayta Diospa Wilakuynin

Yanasankuna:

¹ Pïmaypitapis mas kuyaylapaq jipash, ¿maypataq kuyashqayki maqta aywash? ¿Maypataq aywanan kash? Wilayämay ashïsiyänäpaq.

Jipash:

² Kuyaynïqa huertanmanmi urash. Mushkuraykaq wayta huertanmanmi yaykush. Huertakuna kaqcho mikunanpaqmi aywash. Saychömi liriu waytakunata palanqa.

³ Kuyaynïqa noqalapaqmi. Noqapis paylapaqmi kaykä. Payqa liriu waytakuna kaqchömi misikun.

Pisqa kaq cantu Maqta:

⁴ Kuyaynï, qamqa Tirsa markanöpis y Jerusalén markanöpis kuyaylapaqmi kaykanki. Aska soldädukuna pelyaman aywayashqan admiraypaq kashqannömi kuyaylapaq kashqaykipis admiraypaq kaykan.

⁵ Amana rikapämaynasu. Rikapämashpaykiqa löcutäsimankimi. Aqsaykipis aska kapishkuna Galaad jirkakunapa pañar puriqnöraqmi.

⁶ Kiruykikunapis majädacho sayraq armash yuraq uyshakunanömi kaykäyan. Parninpa parninpa kuyaylapaqmi. Manami juklaylapis pishinsu.

⁷ Shukutarashqayki jaku rurincho qaqlaykipis granädanöraqmi ishkanlä kuyaylapaq pukaraykan.

⁸ Mandaq reypa soqta chunka (60) warminkuna kayaptinpis puwaq chunka (80) concubïnankuna kayaptinpis y yupaytapis mana atipaypaq jipashninkuna kayaptinpis

⁹ kuyashqä palumalämi lapanpitapis mas kuyaylapaqqa. Paytami mamanpis pasaypa kuyan. Jipashkunapis rikayashpanmi kuyaylapaq kashqanpita felicitayan. Reypa warminkunapis y concubïnankunapis ali warmi kashqantami parlayan.

Yanasankuna:

¹⁰ Manami pipis kansu kuyashqayki jipashnöqa. Waraq qoyllar aksiyaqnömi y killa kuyaylapaq kashqannömi kaykan. Inti chipipiykaqnömi kuyaylapaq kaykan. Aska soldädukuna pelyaman aywayashqan admiraypaq kashqannömi kuyaylapaq kashqanpis admiraypaq kaykan.

Maqta:

¹¹ Nogal jachakuna kaykäyashqan huertamanmi yaykushkä. Sayman yaykushkä mayu kuchun pampa verdiraykaqta rikanäpaq, üva chinkiraykaqta rikanäpaq y granäda tukturaykaqta rikanäpaqmi.

¹² Saychömi elaqpita rikakushkä reypa carrëtancho kaykaqnöraq.

Yanasankuna:

¹³ 13 (7.1) ¡Kutikamuy, Sulamita, kutikamuy! ¡Qamta rikaytami munayä! ¡Kutikamuy! ¡Kutikamuy! ¿Imano kaykaqtataq rikamayta munaykäyanki? ¡Campamentucho tushuykaqtanömi rikayta munayä!