Cantares 5 - Tayta Diospa Wilakuynin

Maqta:

¹ Kuyay warmilä, huertächönami kaykä. Shuntaykämi mïrra perfümitawan kuyaylapaq mushkuq waytakunatapis. Panalnincho kaykaq mishkitapis yawaykänami. Lichitapis vïnutapis upuykänami. Amïgukuna, jimayashqaykiyaq mikuyay, upuyay.

Yanasankuna: Chusku kaq cantu Jipash:

² Punurpis maya mayalami punuykarqä. Sayno punuykashqächömi kuyaynï qayakamuqta wiyarqä. ¡Kuyaylapaq palumita, punkuykita kichapaykalämay! ¡Umäpis shulyatashqami kaykan! ¡Sakay shulya yakumi umäpitapis jutuykan!

Maqta: Jipash:

³ Maynami mödanätapis loqtikushkä. ¿Yapaysuraq jatiküman? Maynami chakïtapis maylakushkä. ¿Yapaysuraq qanratäman?

⁴ Kuyashqä maqtaqa makinta jatimurqan punku uchkupami. Makinta jatimuptinmi shonqüpis tiktikyarqanraq.

⁵ Pasaypa kuyarmi jinan höra sharkurqä punkuta kichapänäpaq. Makïpitapis dëdükunapitapis mïrra perfümimi punkupa trancanmanpis juturqan.

⁶ Punkuta kichaskinäpaqqa kuyashqä maqta manami kanaqnasu. Aywakush kaptinmi fiyupa lakikurqä. Ashirpis manami tarirqäsu. Qayakuptïpis manami contestamarqansu.

⁷ Sayno ashir puriykaptïmi tariyämarqan marka täpaq runakuna. Paykunami maqamar yawarlatana rurayämash. Shukutarashqä jakütapis qechuyämash.

⁸ Jerusalén jipashkuna, qamkunatami ruwakü. Kuyaynï maqtata rikayashpaykiqa wilaykuyälay paypaq lakikur qeshyaykashqäta.

Yanasankuna:

⁹ Pïmaypitapis mas kuyaylapaq jipash, ¿imanirtaq say maqtata sayjinanpa kuyaykunki? Sayno encargakamänaykipaqqa ¿imano kaptintaq sayjinanpa kuyaykunki?

Jipash:

¹⁰ Kuyaynï maqtaqa kamaraqlami. Chunka waranqa (10,000) runakunapa chawpincho karpis payqa reqipalami kaykan.

¹¹ Umanpis qorinömi kuyaylapaq. Qoshpu aqsanpis cuervuno yanami.

¹² Nawinkunapis shumaq kuyaylapaqmi. Lichiwan armakush ishkay paluma pözu kuchuncho jamaraykäyaqnömi nawinkuna kaykan.

¹³ Qaqlanpis mushkuq waytakuna waytaraykaq huertanömi. Shiminpis liriu waytapita mïrra perfümi jutuykaqnömi.

¹⁴ Makinkunapis jacinto rumikunawan adornash qori sortïjanömi. Cuerpunpis zafiro rumikunawan adornash kuyaylapaq marfilnömi kaykan.

¹⁵ Chankankunapis qori jawiräkunan janancho marmolpita rurash jorcón ichiraykaqnömi. Líbanucho kaykaq mas altunnin cedru jachanöraqmi kuyaylapaq.

¹⁶ Parlakuyninpis maypis wiyaräkuy munaymi. Paynöqa manami pipis kansu. Jerusalén jipashkuna, saynömi kuyashqä maqtaqa. Saynömi kuyaynïqa.