Cantares 4 - Tayta Diospa Wilakuynin

Maqta:

¹ Selläma kuyaylapaqmi kaykanki, kuyaynï. Maypis kuyaykuy munaymi kaykanki. Nawikipis shukutarashqayki jaku rurincho ishkay palumano kuyaylapaqmi kaykan. Aqsaykipis aska kapishkuna Galaad jirkakunapa pañar puriqnöraqmi kaykan.

² Kiruykikunapis majädacho sayraq armash y rutush yuraq uyshakunanömi kaykäyan. Parninpa parninpa kuyaylapaqmi. Manami juklaylapis pishinsu.

³ Shimikipis kuyaylapaq puka jïlunöraqmi kaykan. Parlakuynikipis maypis wiyakuy munaymi kaykan. Shukurashqayki jaku rurincho qaqlaykipis granädanöraqmi ishkanlä kuyaylapaq pukaraykan.

⁴ Kunkaykipis David rurasishqan törrino kuyaylapaqmi. Kunkaykicho walqaykipis say törricho waqiraykaq waranqa (1,000) escüdunömi. Ali chölu soldädukunapa escüdun kuyaylapaq kashqannömi walqaykipis kuyaylapaq kaykan.

⁵ Chuchuykipis milish luychu malwakuna liriu waytakunapa chawpincho mikuykaqno kuyaylapaqmi.

⁶ Noqaqa manaraq pasa waraptin y lantuypis manaraq päsaptinmi mïrra perfümi kashqan jirkaman y inciensu kashqan lömaman aywashaq.

⁷ ¡Kuyaynï, qamqa kuyaylapaqmi kanki! ¡Chaki puntaykipita uma jirkaykiyaq kamaraqlami kaykanki!

⁸ Kuyay warmilä, Líbanupita nawpäman shamuykulay. Líbano jirkakunacho kashqaykipita shamuykulay. Amaná niyashqan puntapita shamuykulay. Senir niyashqan Hermón jankapita shamuykulay. Leonkuna tänan machaypita y tigrikuna tänan puntapita shamuykulay.

⁹ Kuyay warmilä, qampaqmi shonqü pasaypa turbatan. Rikäramaptiki shonqüpis pasaypami kurun kurunyan. Walqaykipa jïlulanwanmi shonqüta suwapämashkanki.

¹⁰ Kuyamashqaykiqa shonqüyaqraqmi chaykun. Kuyamashqaykiqa vïnupitapis mas alimi kaykan. Perfümiwan lushikushqaykipis lapan perfümikunapita masmi mushkuykun.

¹¹ Shimikipis abëjapa mishkinnöraqmi mishkiykun. Musamaptiki abëjapa mishkinwan lichi mishkiqnöraqmi mishkiykun. Mödanaykipis Líbanucho kaykaq muntipa mushkuyninnöraqmi munapaypaq mushkuykun.

¹² Kuyay warmilä, intërunpa qenchash huertami kaykanki. Shumaq sapash yaku pözumi kaykanki.

¹³ Cuerpuykiqa granäda frütayuq huertami kaykan. Say huertachömi kaykan tukuyläya mishkiq frütakuna, alheña waytakuna y nardo waytakuna.

¹⁴ Saychömi kaykan nardo y azafrán, mushkuq cäña y canëla, tukuyläya inciensu jachakuna, mïrra, áloe y wakin mushkuq jachakunapis.

¹⁵ Say huertata parqunaykipaq pashtaq pukyumi kaykanki. Nawin pukyumi kaykanki. Líbanupita urämuq yakumi kaykanki.

Jipash:

¹⁶ ¡Wisaypa aywaq wayra, shumaq wayrämuy! ¡Uraypa aywaq wayra, shumaq wayrämuy! ¡Huertäman wayrämushpayki kuyaylapaq mushkuyninta kuyaynïman apaykuy! ¡Kuyaynïqa huertanman shamuykusun! ¡Mishkiq frütakunapa wayuyninta saycho mikusun!