Cantares 3 - Tayta Diospa Wilakuynin

Jipash:

¹ Sakaypapis cämächömi ashishkä shonqü kuyashqan maqtata. Yataykacharpis manami tarishkäsu.

² Pasaypa yarpachakuykashqächömi sharkur yarqushkä. Intëru markapa aywarmi cällikunapa y pläzakunapapis kuyashqä maqtata ashishkä. Mayjina ashirpis manami tarishkäsu.

³ Sayno puriykaqtami marka täpaq wardiakuna tariyämash. Paykunawan tinkurmi tapukushkä: <<¿Manaku rikayälashkanki kuyashqä maqtata?>> nir.

⁴ Paykunapita päsaskilarmi kuyanakushqäwan tinkushkä. Makalakurkurmi mana kachaypa mamäpa wayinman chäsishkä. Yurishqä cuartumanmi yaykasishkä.

Maqta:

⁵ Jerusalén jipashkuna, luychukunapa jutincho y tarushkunapa jutincho promitiykayälämay kuyaynï punukuykaqta mana rikchasiyänaykipaq. Punuyta jimashqanyaq punukusun.

Kimsa kaq cantu Yanasankuna:

⁶ Sunyaq jirkapita ¿imataq shamuykan? ¿Imataq qoshtatarraq aywaykämun? Mïrra perfümino, inciensuno y tukuyläya kuyaylapaq perfümikunano ¿imataq mushkuykämun?

⁷ ¡Sayqa kaykan Salomónpa andanmi! Soqta chunka (60) soldädukunapa chawpilantami shamuykan. Say soldädukunaqa Israelcho alinnin kaq soldädukunami kaykäyan.

⁸ Lapanpis espäda manijaq y pelyay yachaq soldädukunalami kaykäyan. Sakaypa imapis kaptin jukla pelyayänanpaqmi seqlancho espädata purisiyan.

⁹ Andantaqa Líbanupita apasimushqan alinnin kaq qerukunapitami rey Salomón rurasish.

¹⁰ Andanpa jorconninkunapis qellaypitami. Jorconkuna jawiräkunanpis qoripitami. Reypa jamakunanpis granäti tëlapitami. Rurinpaqa Jerusalén warmikuna kushish bordayashqanmi kaykan.

¹¹ Sión warmikuna, ¡rey Salomón corönan jatish shamuykaqta rikayänaykipaq shayämuy! Say corönataqa casarakunan junaqmi maman jatipash. Say junaqmi Salomónpa shonqun pasaypa kushikush.