Cantares 2 - Tayta Diospa Wilakuynin

Jipash:

¹ Saróncho rösa waytami noqaqa kaykä. Pampacho winaq liriu waytami kaykä.

Maqta:

² Kuyaynï, kashakuna chawpincho kaykaq liriu waytami kaykanki. Qamqa lapan jipashkunapitapis mas kuyaylapaqmi kaykanki.

Jipash:

³ Munti rurincho manzäna wayuraykaqnömi qamqa lapan maqtakunapitapis mas kuyaylapaq kaykanki, kuyaynï. Nawpaykiman jamaykurqa manami yarquytapis munäsu. Mishkinömi kuyakuynikipis kaykan.

⁴ Banquëti wayikimanmi pushamashkanki. Saychömi kuyamashpayki makalarämashkanki.

⁵ Qamta kuyaptïmi shonqüpis shonqunasu. Päsasnikitawan manzänaykita jukla qaramay.

⁶ Isuq kaq rikraykita jawnaparkamay. Aluq kaq rikraykiwan makalarkamay.

Maqta:

⁷ Jerusalén jipashkuna, luychukunapa jutincho y tarushkunapa jutincho promitiykayälämay kuyaynï punukuykaqta mana rikchasiyänaykipaq. Punuyta jimashqanyaq punukusun.

Ishkay kaq cantu Jipash:

⁸ ¡Kuyashqä maqta parlamushqanta wiyaykänami! ¡Payqa shamuykannami! ¡Puntakunapa y jirkakunapa pañaykacharraqmi shamuykan!

⁹ Kuyashqä maqtaqa luychunöraqmi. Payqa kuyaylapaq tarushnöraqmi. ¡Wayï waqtanchönami kaykan! ¡Ventänapanami watqaraykämun! ¡Rejïllanpanami rikapaykäman!

Maqta:

¹⁰ Kuyaynï, jukla sharkuy. Kuyashqä jipash, jukla aywakushun.

¹¹ Tamya tiempupis päsashnami. Tamyananpa trukanqa usyaykannami.

¹² Intëru jirkachömi waytakunapis pashtaraykäyan. Cantanansi tiempupis chämushnami. Kulkushkuna cantayashqanpis maysaychönami wiyakaykan.

¹³ Hïgus jachakunapis wayuraykäyannami. Üva jachakunapapis mushkuynin mayakaykämunnami. Kuyaynï, jukla sharkur aku aywakushun.

¹⁴ Kuyashqä palumita, qaqakunacho y sunyaq jirkakunacho amana pakakuynasu. Parlashqaykita wiyaytami munä; qaqlaykita rikaytami munä. Qam parlashqaykiqa maypis wiyaräkuy munaymi. Qaqlaykipis kuyaylapaqmi.

Maqtawan jipash:

¹⁵ Üva jachansikunaqa tukturaykäyannami. Saykunata cuidä atuq malwakuna ushayanman. ¡Say atuqkunata wanusishun!

Jipash:

¹⁶ Kuyaynïqa noqalapaqmi. Noqapis paylapaqmi kaykä. Payqa liriu waytakuna kaqchömi misikun.

¹⁷ Kuyaynï, manaraq pasa waraptin y lantuypis manaraq päsaptin luychunöraq y tarushnöraq Beter puntakunaman kutikalämuy.