Apocalípsis 9 - Tayta Diospa Wilakuynin

Pisqa kaq ángel cornëtata tukamushqan

¹ Saypitanami pisqa kaq ángel cornëtata tukamuptin pasaman qoyllar shikwamuqta rikarqä. Say qoyllarmi chaskirqan supaykuna wichqaraykäyashqan wanwanyaykaq pasapa shiminpa llävinpa wawanta.

² Pasapa shiminta kichaskiptinmi jatun jornupita qoshtay yarqamuqnöraq qoshtay yarqamurqan. Say qoshtay intita sapaptinmi pasa sakakäkurqan.

³ Say qoshtaypitanami kay pasaman juntaqpaq chukluskuna yarqayämurqan. Say chukluskunami alacranno seqaypa venënuyuq kayarqan.

⁴ Paykunatami nirqan qewatapis ni jachatapis mana ushakäsiyänanpaq. Saypa trukanqa Tayta Diospa sëllunwan urkuncho mana señalaraq runakunalata nakasiyänanpaqmi nirqan.

⁵ Saynöpis nirqan runakunata nakasirpis mana wanusiyänanpaqmi. Wanusiyänanpa trukanqa pisqa killa nanaywan nakasiyänalanpaqmi nirqan. Saymi alacrán picaptin nakashqannöraq nanaywan nakayarqan.

⁶ Say wisan runakuna seqaypa nakar wanuyta munarpis manami imanöpapis wanuyanqasu. Wanuyta ashirpis manami tariyanqasu.

⁷ Say chukluskuna kayarqan guërraman aywayänanpaq kamarish cawallukunanömi. Umancho qori corönan jatishnömi kayarqan. Qaqlanpis runapa qaqlanömi karqan.

⁸ Aqsankunanami imayka warmipa aqsanno y kirunkunanami imayka leonpa kirunno karqan.

⁹ Cuerpunkunaqa läta chalëcushnömi karqan. Pajayaptin riprankuna sapsapyashqanpis wiyakarqan carrëtan qarachash cawallukuna guërraman aywaqnöraqmi.

¹⁰ Chupannami alacranpa chupanno awja punta karqan. Chupanwan chiwiptinmi runakuna pisqa killa qeshyar nakayarqan.

¹¹ Say chukluskunapa mandaqnin karqan wanwanyaykaq raqracho angilmi. Say angilpa jutinmi hebreo idiömacho Abadón y griego idiömacho Apolión.

¹² Say punta kaq nakay päsaskiptinpis ishkay nakaykunaraqmi chämunanpaq kaykan.

Soqta kaq ángel cornëtata tukamushqan

¹³ Soqta kaq ángel cornëtata tukamuptinmi wiyarqä Tayta Diospa nawpancho kaykaq qori altarpa chuskun waqran chawpinpita parlamuqta.

¹⁴ Saychömi say cornëta tukamuq angilta nirqan: <<Éufrates mayu kuchuncho wataraykaq chusku angilkunata paskamuy>>.

¹⁵ Paskariykamuptinmi say chusku angilkuna mayu kuchunpita aywayarqan kay pasacho cäsi pulan runakunata wanusiyänanpaq. Say angilkuna puestukush kayarqan say höra, say junaq, say killa, say wata runakunata wanusiq yarquyänanpaqmi.

¹⁶ Kayno niqtami wiyarqä: <<¡Say angilkunawanmi ishkay pachak millón (200,000,000) soldädukuna cawallunkuna loqash aywaykäyan!>>

¹⁷ Soldädukunapa chalëcunkunami karqan ninano puka, zafiruno azul y azufrino qarwash. Cawallunkunapa umankunami karqan leonpa umanno. Shiminpitami yarqamurqan ninapis, qoshtaypis y azufripis. Saynömi soldädukunata y cawallunkunata revelacioncho rikarqä.

¹⁸ Shiminpita yarqamuq azufri, nina y qoshtaymi kay pasacho cäsi pulan runakunata ushakäsirqan.

¹⁹ Manami shiminpita yarqamuqkunalawansu runakunata cawallukuna wanusiyarqan, saypa trukanqa culebra niraq umayuq chupankunawanpis wachirmi wanusiyarqan.

²⁰ Sayno kaptinpis mana wanuq runakunaqa jusalikuyashqankunata manami wanakuyarqansu. Saypa trukanqa supaykunata y ïdulukunatami imaypis adorayarqan. Say ïdulukunaqa qoripita, qellaypita, broncipita, rumipita y qerupita rurash karmi rikayansu ni wiyayansu ni puriyansu.

²¹ Saynöpis manami kachariyarqansu wanusikuq kayta, brüju kayta, fornicación jusata y suwakuytapis.