Apocalípsis 8 - Tayta Diospa Wilakuynin

Röllucho qanchis kaq laqaraykaq cërata jorqushqan

¹ Röllucho qanchis kaq laqaraykaq cërata Carnish jorquriptinmi jana pasacho pulan hörano pipis parlakurqansu.

² Nirkurnami Tayta Diospa nawpancho qanchis angilkuna ichiraykäyaqta rikarqä. Paykunami cada ünun cornëtata chaskiyarqan.

³ Saypitanami Tayta Diospa trönun nawpancho kaykaq altarman juk ángel charqan inciensu qoshnisikunan aptash. Altarpis inciensu qoshnisikunanpis qoripitami karqan. Saychömi aska inciensuta chaskirqan Diosman yärakuqkuna manakuyashqantawan altarman churananpaq.

⁴ Altarcho rupasiptinmi yärakuqkuna manakuyashqanpis y inciensupa qoshtayninpis Tayta Diosman charqan.

⁵ Say angilmi inciensu qoshnisikunanman altarcho kaykaq shanshata winarkur kay pasaman jitaramurqan. Saymi asikyaypa asikyar elqukurqan, maqakuypis seqaypami bunrurumurqan y pasapis fiyupami suksukyarqan.

Chusku angilkuna cornëtakunata tukayämushqan

⁶ Saypitanami cornëtata chaskiq qanchis angilkuna tukayänanpaq kamarikuyarqan.

⁷ Punta kaq ángel cornëtata tukamuptinmi ninawan yawar talush runtu tamya pasaman tamyarqan. Saywanmi cäsi pulan pasa rupar ushakarqan. Say runtu tamya chashqan kaqqa jachapis qewapis lapanmi ushakäyarqan.

⁸ Saypita ishkay kaq ángel cornëtata tukamuptinmi jatunkaray jirkano rupaykar lamarman kuchparqan. Saymi cäsi pulan lamar yawarman tikrarqan.

⁹ Yawarman tikrashqan kaqchöqa lapanmi wanuyarqan. Saynölami saycho kaykaq büquikunapis talpukar ushakäyarqan.

¹⁰ Kimsa kaq ángel cornëtata tukamuptinmi jatunkaray rupaykaq qoyllar shikwamurqan. Say qoyllarmi cäsi pulan mayukunaman y cäsi pulan pukyukunaman charqan.

¹¹ Qoyllarpa jutinmi karqan Ayaq. Ayaq kaptinmi say qoyllar chashqan kaq yakuqa ayaq rikakurqan. Say yakuta upuq kaqkunaqa saysikami wanuyarqan.

¹² Chusku kaq ángel cornëtata tukamuptinmi intipis killapis qeshyarqan. Saymi intipis ni killapis shumaq asikyarqannasu. Saynölami cäsi pulan qoyllarkunapis chipipïyarqannasu.

¹³ Saypitanami rikarqä juk anka junaqpa tumaykaqta. Say hörami wiyarqä say anka sinchipa kayno nimuqta: <<¡Wawalaw, wawalaw, wawalaw! Pasacho kawaqkuna ¡imanöraq kayanqa! ¡Kimsaraqmi angilkuna cornëtata tukayämunan pishin!>>