Apocalípsis 7 - Tayta Diospa Wilakuynin

Payman yärakuqkunata Tayta Dios señalashqan

¹ Saypitanami chusku angilkuna kay pasapa chuskun kuchuncho ichiraykäyaqta rikarqä. Say angilkunami wayrata saparäyarqan kay pasamanpis ni lamarmanpis ni ima jachamanpis mana wayrämunanpaq.

² Paykunami munayyuq kayarqan kay pasatapis lamartapis castigayänanpaq. Saynöpis rikarqä inti yarqamunan kaqpita imayyaqpis kawaq Tayta Diospa sëllun aptash juk ángel shamuykaqta. Say angilmi pasapa kuchunkunacho kaykaq chusku angilkunaman sinchipa qayakur

³ nirqan: <<¡Tayta Diosninsipa sirviqninkunata urkunkunacho manaraq señalaptïqa amaraq ushakäsiyayraqsu kay pasacho kaqkunata, lamarcho kaqkunata ni jachakunatapis!>>

⁴ Saypitanami ayka runakunata señalashqantapis wiyarqä. Say runakuna kayarqan pachak chusku chunka chusku waranqa (144,000) runakunami. Paykuna kayarqan lapan Israel trïbu runakunapitami:

⁵ Judá trïbupitami chunka ishkay waranqa (12,000) kayarqan. Rubén trïbupitami chunka ishkay waranqa (12,000) kayarqan. Gad trïbupitami chunka ishkay waranqa (12,000) kayarqan.

⁶ Aser trïbupitami chunka ishkay waranqa (12,000) kayarqan. Neftalí trïbupitami chunka ishkay waranqa (12,000) kayarqan. Manasés trïbupitami chunka ishkay waranqa (12,000) kayarqan.

⁷ Simeón trïbupitami chunka ishkay waranqa (12,000) kayarqan. Leví trïbupitami chunka ishkay waranqa (12,000) kayarqan. Isacar trïbupitami chunka ishkay waranqa (12,000) kayarqan.

⁸ Zabulón trïbupitami chunka ishkay waranqa (12,000) kayarqan. José trïbupitami chunka ishkay waranqa (12,000) kayarqan. Benjamín trïbupitami chunka ishkay waranqa (12,000) kayarqan.

Saysika runakuna yuraq mödanash jana pasacho kayashqan

⁹ Saypitami rikarqä Tayta Dios jamarashqan trönupa nawpancho y Carnishpa nawpancho yupaytapis mana atipaypaq saysika runakuna palmankuna aptash y yuraq mödanan jatish kaykäyaqta. Paykuna kayarqan maysay nación runakuna, maysay trïbu runakuna, maysay marka runakuna y tukuy idiömata parlaq runakunami.

¹⁰ Paykunami sinchipa niyarqan: <<¡Trönucho jamaraykaq Tayta Dios y nawpaykicho kaykaq Carnish, qamkunami salvayämashkanki!>>

¹¹ Saymi Tayta Diospa puntancho kaykaq chusku kawaykaqkuna, ishkay chunka chusku (24) mayor runakuna y lapan angilkunapis lätakuykur Tayta Diosta alabar

¹² niyarqan: <<¡Amén! ¡Tayta Diosninsi alabash kaykuläsun! ¡Pay japalanmi lapantapis musyan! ¡Imayyaqpis payta agradëcikushun! ¡Pay japalanmi lapanpaq munayyuq kaykan! ¡Imayyaqpis payta alabashun! ¡Amén!>>

¹³ Saymi Tayta Diospa nawpancho kaykaq ishkay chunka chusku (24) mayor runakunapita juknin tapumarqan: <<¿Pïkunataq say yuraq mödanan jatish runakuna kaykäyan? ¿Maypitataq shayämush?>> nir.

¹⁴ Sayno nimaptinmi nirqä: <>. Sayno niptïmi nimarqan: <

¹⁵ Say runakunaqa Tayta Dios jamarashqan trönun nawpanchömi kaykäyan. <

¹⁶ Paykunaqa imaypis mananami mikanäyanqanasu ni yakunäyanqanasu. Intipis paykunata manami rupanqanasu. Shanaypis mananami ajayäsinqanasu.

¹⁷ Tayta Dios jamarashqan trönun nawpancho Carnishmi paykunata misinqa. Imaypis mana yakunäyänanpaqmi kawasikuq yakuman pushanqa. Kikin Tayta Diosmi shoqashpan weqinkunatapis pisapanqa>>.