Apocalípsis 6 - Tayta Diospa Wilakuynin

Röllucho cërakuna laqaraykaqta Jesucristo jorqushqan

¹ Saychömi rikarqä röllucho punta kaq laqaraykaq cërata Carnish jorquqta. Jorquriptinmi nawpancho kaq chusku kawaykaqkunapita juknin maqakuynöraq qayakamur nimurqan: <<¡Shamuy!>>

² Sayno nimuptin rikärishqächömi yuraq cawalluta rikarqä. Loqaraqninmi flëchan aptash kaykarqan. Paymi corönata chaskirkur Tayta Diospa contran kaqkunata majaypa majar ushakäsinanpaq aywarqan.

³ Röllucho ishkay kaq laqaraykaq cërata Carnish jorquriptinmi nawpancho kaq chusku kawaykaqkunapita juknin qayakamur nimurqan: <<¡Shamuy!>>

⁴ Sayno nimuptinmi puka cawallu yarqamurqan. Loqaraqninmi jatun espädata chaskiskir runakuna chikinakur kikinpura wanusinakuyänanpaq aywarqan.

⁵ Röllucho kimsa kaq laqaraykaq cërata Carnish jorquriptinmi nawpancho kaq chusku kawaykaqkunapita juknin qayakamur nimurqan: <<¡Shamuy!>> Sayno nimuptin rikärishqächömi yana cawallu shamuykaqta rikarqä. Loqaraqninmi balanzan aptash kaykarqan.

⁶ Saymi say chusku kawaykaqkunapa chawpinpita kayno nimuqta wiyarqä: <<¡Muchuymi kanqa! Saymi juk junaq arur gänayashqan aypanqa juk kïlu trïguta o kimsa kïlu cebädata rantiyänalanpaq. Muchuy kaptinpis aceititawan vïnutaqa ama ushakäsiysu>>.

⁷ Röllucho chusku kaq laqaraykaq cërata Carnish jorquriptinmi nawpancho kaq chusku kawaykaqkunapita jukninna qayakamur nimurqan: <<¡Shamuy!>>

⁸ Sayno nimuptin rikärishqächömi bäyu cawalluta rikarqä. Loqaraqninpa jutinmi karqan Wanuy. Paypa qepantanami Hades shamurqan. Ishkanmi yarqayämurqan runakunata espädawan, muchuywan, qeshyawan y munti uywakunawan wanusiyänanpaq. Saymi munayyuq kayarqan pulanpa pulannin runakunata wanusiyänanpaq.

⁹ Röllucho pisqa kaq laqaraykaq cërata Carnish jorquriptinmi almakuna altar chakincho kaykäyaqta rikarqä. Say almakuna kayarqan Diospa wilakuyninta wiyakuyashqanpita y Jesucristuman yärakuyashqanpita wanusiyash runakunapa almankunami.

¹⁰ Paykunami sinchipa niyarqan: <>

¹¹ Sayno niyaptinmi Tayta Dios nirqan: <>. Sayno nirmi say almakunata yuraq mödanata jatiparqan.

¹² Röllucho soqta kaq laqaraykaq cërata Carnish jorquriptinmi pasa fiyupa suksukyarqan. Say hörami rikarqä inti yanayar lütu tëla niraq rikakuqta y killapis yawar niraq rikakuqta.

¹³ Fiyupa wayraptin hïgus shikwamuqnöraqmi qoyllarkunapis jana pasapita shikwayämurqan.

¹⁴ Jana pasapis rölluno luylukarkur luylukarkurmi elaqakäkurqan. Jirkakuna y lamarcho islakunapis juklämanmi witikuyarqan.

¹⁵ Kay pasacho reykuna, rïcukuna, mandaq soldädukuna, ashmaykuna y wakin runakunapis qaqakunaman y machaykunamanmi pakakuyarqan.

¹⁶ Saychömi jirka puntakunata y qaqakunatapis niyarqan: <<¡Janäkunaman juchumuy! ¡Trönucho jamaraykaqpis y Carnishpis fiyupa rabyashqami kaykäyan! ¡Paykunapita pakaykayälämay!

¹⁷ ¡Lapan runakunata castigananpaq kaq tiempu chämushnami! ¡Tayta Diospa castïgunta manami pipis awantanqasu!>>