Apocalípsis 19 - Tayta Diospa Wilakuynin

Jana pasacho alabayashqan

¹ Saypitanami wiyarqä jana pasacho saysika runakuna sinchipa kayno nimuqta: <<¡Aleluya! ¡Tayta Diosninsimi munayninwan runakunata salvan! ¡Payqa lapanpaq munayyuqmi kaykan! [¡Payta pïmaypis alabasun!]

² ¡Payqa pitapis shumaqmi juzgan! Lapan runakunata jusalikasiq prostitüta warmita castigashnami. Tayta Diospa sirviqninkunata wanusishqanpitami kikintana ushakäsish>>.

³ Nirkurnami yapay niyämurqan: <<¡Aleluya! Say marka rupaptinmi mana päraypa qoshtay sharkuykanqa>>.

⁴ Saypitanami trönuncho jamaraykaq Tayta Diosta adorayänanpaq puntancho kaykaq ishkay chunka chusku (24) mayor runakuna y saycho kaykaq chusku kawaykaqkunapis lätakuykur niyarqan: <<¡Amén! ¡Aleluya!>>

⁵ Sayno niyaptinnami Tayta Dios jamaraykashqan trönunpita kayno nimuqta wiyarqä: <<¡Tayta Diosninsita mansapakur sirviqkuna, rïcu karpis pobri karpis lapayki alabayay!>>

Gloriacho majasakay fiesta kashqan

⁶ Saypitanami aska runakuna alabaykäyaqta wiyarqä. Say alabayashqan wiyakarqan aska yaku aywar qaparaqno y maqakuy bunruruqnömi. Say runakunami niyarqan: <<¡Aleluya! ¡Lapanpaq munayyuq Tayta Diosninsi mandaykannami!

⁷ ¡Payta kushish alabashun! Chämushnami Carnish majasakänan fiesta. Casarananpaq kaq jipashpis kamarikushnami kaykan.

⁸ Say jipashtami fïnu lïnupita rurash chipipiykaq limpiu mödanata jatikunanpaq Tayta Dios kamaripash>>. (Say mödanaqa Tayta Diosman yärakuqkuna alikunata rurayashqanmi kaykan.)

⁹ Saymi nawpächo kaykaq ángel nimarqan: < >>. Nirkurnami nimarqan: <>.

¹⁰ Sayno nimaptinmi angilta adoranäpaq lätakuykurqä. Saymi nimarqan: <<¡Noqata ama adoramaysu! Noqapis qamnöla y yärakuq mayikikunanölami Tayta Diospa sirviqnin kaykä. ¡Tayta Dioslata adorayqa! Lapan wilakushqäpis Jesucristo alabash kananpaqmi kaykan>>.

Jesucristo kay pasaman kutimushqan

¹¹ Saypitanami jana pasa kichakämuptin rikarqä yuraq cawalluta. Loqaraqninpa jutinmi karqan Nishqanta Rasunpa Cumpliq. Paymi pitapis mana jananpaylapa juzgan. Mana ali ruraqkunata ushakäsinanpaqmi guërratapis ruran.

¹² Nawinkunapis ninanöraqmi asikyarqan. Umanchömi aska corönakunata jatirarqan. Saychömi juk jutin qelqararqan. Say jutitaqa kikilanmi musyarqan.

¹³ Yawarlana mödanan jatishqami kaykarqan. Jutinmi kaykan Diospa Palabran.

¹⁴ Paytami jana pasapita kaq soldädukuna yuraq cawallunkuna loqash qatiräyarqan. Paykunami fïnu lïnupita rurash yuraq y limpiu mödanankuna jatish kayarqan.

¹⁵ Yuraq cawallun loqaraqpa shiminpitami afilash espäda yarqamurqan. Nacionkunata say espädawan vincirkurmi fiërru väran aptakurkur mandanqa. Nacionkunata castigarmi üvata jarukunan pözucho jaruqno castiganqa. Sayno castigarmi lapanpaq munayyuq Tayta Dios fiyupa rabyashqanta musyasinqa.

¹⁶ Sotänancho y mama chankancho qelqaraq juk jutinmi nirarqan: <>.

¹⁷ Saypitanami rikarqä inti janancho juk ángel ichiraykämuqta. Say angilmi wiskurkunata qayakur nirqan: <<¡Tayta Dios kamarishqan mikuyta mikuyänaykipaq lapayki shayämuy!

¹⁸ ¡Runakunapa aysantami mikuyanki! ¡Reykunapa, soldädukunapa, soldädupa mandaqninkunapa y loqaräyashqan cawallunkunapa aysantapis mikuyankimi! ¡Ashmaypatapis, mana ashmaypatapis, rïcupatapis, muchuqpatapis lapan runakunapa aysantami mikuyanki!>>

¹⁹ Saychömi rikarqä anticristuta y lapan nacionkunapa mandaqnin reykuna soldädunkunawan kaykäyaqta. Paykunami yuraq cawallun loqash runawan y soldädunkunawan pelyayänanpaq shuntakäyarqan.

²⁰ Saychömi yuraq cawallun loqash runa anticristuta y lula profëtatapis prësu sarirqan. Manaraq prësu sariptinmi say lula profëta anticristupa nawpancho milagrukunata rurar anticristupa señalninta chaskikuqkunata y ïdulunta adoraqkunatapis criyisirqan. Say lula profëtata y anticristutaqa azufriyuq nina rupaykaq qochamanmi kawaykaqta qaykurqan.

²¹ Anticristupa soldädunkunatanami yuraq cawallun loqash runaqa shiminpita yarqamuq espädawan wanusirqan. Say wanuqkunapa aysantanami wiskurkuna pacha junta mikuyarqan.