Apocalípsis 12 - Tayta Diospa Wilakuynin

Warmipa wawanta Satanás wanusiyta munashqan

¹ Saypitanami jana pasacho rikakämurqan intino chipipiykaq warmi. Say warmipa chakin uraläninchömi killa kaykarqan. Jatirashqan corönachömi chunka ishkay qoyllarkuna karqan.

² Say warmimi qeshyakuy nanaywan fiyupa qaparaykarqan.

³ Saypitanami jana pasacho rikakämurqan qanchis umayuq y chunka waqrayuq jatunkaray puka dragón. Cada umanchömi corönata jatirarqan.

⁴ Chupanwan qarashtarmi cäsi pulan qoyllarkunata kay pasaman jitariykamurqan. Warmi qeshyakunanpaqna kaykaptinmi nawpanman ichikuykurqan wamra yuriskiptin mikukurkunanpaq.

⁵ Saypitanami say warmi qeshyakurqan olqu wamrata. Paymi lapan nacionkunata fiërru värawan mandananpaq yurirqan. Saypitami say wamrata Tayta Dios nawpanman pushakurqan.

⁶ Mamannami qeshpirqan Tayta Dios kamarishqan sunyaq jirkaman. Saychömi Tayta Dios mikuyta kamariparqan juk waranqa ishkay pachak soqta chunka (1,260) junaq.

Jana pasapita Satanásta qarqamushqan

⁷ Jana pasachönami guërrata rurayarqan Miguel jutiyuq angilwan say puka dragón. Miguelta yanapäyarqan angilninkuna y dragontanami yanapäyarqan qatiraqnin angilkuna.

⁸ Dragonta y qatiraqnin angilkunatapis guërracho vincirkurmi jana pasapita qarqayämurqan.

⁹ Say jatunkaray dragonqa diablu nishqan Satanásmi. Paymi maysaychöpis runakunata engañaq unay culebra kaykan. Payta y qatiraqnin angilkunata vinciskiyaptinnami Tayta Dios kay pasaman qarqamurqan.

¹⁰ Saypitami wiyarqä jana pasapita sinchipa nimuqta: <<¡Kananqa yärakuqkunata Tayta Diosninsi salvananpaq kaq höra chämushnami! ¡Tayta Diosninsi munayninwan mandaykashqanqa chämushnami! ¡Kananpitaqa Jesucristunami lapantapis makincho sararanqa! ¡Satanásqa jana pasapita qarqushnami kaykan! ¡Tayta Diosman yärakuqkunata paqasta junaqta tumpaq Satanás vincishnami kaykan!

¹¹ Tayta Diosman yärakuqkunami payta vinciyarqan yawarninta Carnish jichar wanushqanpita y Tayta Diospa wilakuynin nishqanno kawayashpan. Manami wanuytapis mansariyarqansu. Saypa trukanqa listumi kayarqan Carnishman yärakuyashqanpita wanuyänanpaqpis.

¹² ¡Jana pasacho taqkuna, kushikuyay! ¡Wawalaw, kay pasacho y lamarcho kaqkuna! Jana pasapita qarqaytakamush karmi diablu fiyupa rabyash puriykan. Pay musyaykanmi walka tiempulana runakunata engañananpaq kashqanta>>.

Jesucristuman yärakuqkunata Satanás nakasishqan

¹³ Kay pasaman jitaskamuptinmi dragonqa olqu wamrata qeshyakuq warmita qatikacharqan.

¹⁴ Saymi say warmita Tayta Dios kamariparqan ankapa älantano qeshpir sunyaq jirkaman aywakunanpaq. Saychömi say warmita Tayta Dios shumaq rikarqan kimsa wata soqta killa.

¹⁵ Saymi dragonqa mayutanöraq yakuta aqtumurqan warmita apananpaq.

¹⁶ Warmita mana apananpaqmi pasapa shimin kichakar say yakuta ultakurkurqan.

¹⁷ Saymi dragonqa fiyupa rabyakushpan warmipa wakin wawankunatana ushakäsinanpaq aywarqan. Warmipa wawankunaqa Jesucristo wilakushqanta chaskikur Tayta Diospa mandamientunkunata cumpliq runakunami kaykäyan.

¹⁸ Nirkurnami dragonqa lamar kuchunman aywaykur ichikuykurqan.