Apocalípsis 11 - Tayta Diospa Wilakuynin

Tayta Diospa ishkay wilakuqninkuna

¹ Saychömi shoqushpita rurash värata ángel aptaparkamashpan nimarqan: <

² Templu waqtancho kaykaq patiuta isanqa ama tupumunkisu. Say patiuta kachariykushkä mana cäsukamaq runakuna munaynincho sararäyänanpaqmi. Paykunami chusku chunka ishkay (42) killa sagrädu Jerusalén markata munaynincho sararäyanqa.

³ Say wisanmi ishkay wilakuqnïkunata noqa nishaq juk waranqa ishkay pachak soqta chunka (1,260) junaq wilakuynïta wilakuyänanpaq. Paykunaqa qachqa mödanankuna jatishqami wilakuyanqa>>.

⁴ Say ishkay wilakuqkunaqa kay pasata kamaq Tayta Diospa nawpancho kaykaq ishkay olïvukuna y ishkay candelabrukunami kaykäyan.

⁵ Pipis paykunata wanusiyta munayaptinqa shiminkunapita nina yarqamurmi rupar ushanqa. Paykunawan churaqkunaqa saynömi wanuyanqa.

⁶ Say ishkay wilakuqkunaqa munayyuqmi kayanqa tamyatapis mana tamyasiyämunanpaq, yakutapis yawarman tikrasiyänanpaq y munayashqan höra pestiwan runakunata ushakäsiyänanpaqpis.

⁷ Tayta Dios munashqanno wilakuyninta wilakur ushaskiyaptinnami wanwanyaykaqpita anticristo yarqamur paykunapa contran sharkur wanusinqa.

⁸ Wanusiptinmi ayankuna jatun markapa pläzancho jitaräyanqa. Say markachömi Señor Jesucristutapis wanusiyarqan. Say markapaqmi Sodomano y Egiptuno kashqanta niyan.

⁹ Kimsa junaq pulanyaqmi maysay marka runakunapis, maysay trïbu runakunapis, ima idiömata parlaq runakunapis y maysay nación runakunapis wanush jitaraykäyaqta rikayanqa. Ayankunatapis pampayänanta manami kachapäyanqasu.

¹⁰ Say wilakuqkuna aläpa rabyanäsish kayaptinmi runakuna kushikuyashpan regäluta jukninpis jukninpis qaranakuyanqa.

¹¹ Wanush jitaraykäyashqanpita kimsa junaq pulantami say ishkay wilakuqninkunata Tayta Dios kawarisimunqa. Sayta rikaqkuna lapanmi pasaypa mansakäyanqa.

¹² Kawarirkamurnami wiyayanqa <<¡kayman shayämuy!>> nir jana pasapita qayakamuqta. Chikiqninkuna rikaraykäyaptinmi pukutay rurinpa jana pasaman aywakuyanqa.

¹³ Say höra pasa fiyupa suksukyaptinmi say markacho cada chunka wayipita juk wayi juchunqa y qanchis waranqa (7,000) runakuna wanuyanqa. Kawaykar quëdaqkunaqa pasaypa mansakashqami Tayta Diosta alabayanqa.

¹⁴ Ishkay kaq nakay päsaptinpis juk masraqmi chämunanpaq kaykan.

Qanchis kaq ángel cornëtata tukamushqan

¹⁵ Qanchis kaq ángel cornëtata tukamuptinmi jana pasacho angilkuna sinchipa kayno niyämushqan wiyakämurqan: <<¡Lapan nacionkunapis Señorninsi Tayta Diospa y Cristupa makinchönami kaykäyan! ¡Paymi imayyaqpis rey kanqa!>>

¹⁶ Saymi Diospa puntancho kaykaq ishkay chunka chusku (24) mayor runakuna trönunkunacho jamaraykäyashqanpita lätakuykur Tayta Diosta adorayashpan

¹⁷ niyarqan: <

¹⁸ Nishqaykita wiyakuyta mana munarmi maysaychöpis runakuna fiyupa rabyanäyarqan. Kananqa kikikimi rabyakur wanushkunata juzganki. Tiempu chämushnami sirvishuqniki profëtakunata y qamman yärakur mansapakushuqnikikunata rïcu kayaptinpis pobri kayaptinpis premiuta qonaykipaq. Runa mayinta wanusiqkunataqa ushakäsinkimi>>.

¹⁹ Saymi jana pasacho kaykaq templu kichakaskiptin rikarqä saycho kaykaq Pactu Babulta. Elqukuypis, maqakuypis y runtu tamyapis fiyupami karqan. Kay pasapis fiyupami suksukyarqan.