2 Timoteo 3 - Tayta Diospa Wilakuynin

Runakuna imano kayänanpaq kashqantapis nishqan

¹ Timoteo, shumaq tantiyakuy ultimu tiempucho runakuna aläpa nakayänanpaq kashqanta.

² Saymi kayanqa kikilanpaq imatapis munaq, qellaylapaq wachakash, runa tukuq, Tayta Diospa contran parlaq, mamanta y taytanta mana wiyakuq, mana agradëcikuq y Tayta Diospa palabranta manakaqman churaq.

³ Manami kuyakuynin ni kuyapäkuyninpis kanqasu. Saynöpis kayanqa tumpakuq, mana tantiyakuypa imatapis lutala ruraq, runa mayinta chikiq y ali ruraqkunapa contran sharkuq.

⁴ Saynöpis kayanqa traicionëru, mana yarpachakuypa imatapis ruraq y selläma yachaq tukuq. Tayta Dios munashqanta rurayänanpa trukanqa shonqun munashlantami rurayanqa.

⁵ Runakuna rikayänalanpaqmi Tayta Diosman yärakuq tukuyanqa. Sayno karpis jusalikurmi kawakuyanqa. Sayno kawaq runakunawan ama shuntakaysu.

⁶ Say runakunaqa imaykaläya jusakunata jusalikuq warmikunapa wayinkunamanpis engañayänanpaqmi yaykuyan.

⁷ Say warmikuna cadala yachakurpis Jesucristupa wilakuynintaqa manami imaypis tantiyakuyansu.

⁸ Janeswan Jambres Moiséspa contran sharkuyashqannömi lutan yachasikuqkunapis Jesucristupa wilakuyninta wilakuqkunapa contran sharkuyan. Lutan yarpaykuna umankunacho kaptinmi Jesucristupa wilakuyninta imaypis tantiyayansu.

⁹ Imano yachasiyaptinpis lutan yachasikuq kayashqanta wawqi panikuna tantiyakuyanqami. Saymi Janestawan Jambresta mana cäsupäyashqanno say lutan yachasikuqkunatapis cäsupäyanqanasu.

Pablo kawashqanno Timoteupis kawashqan

¹⁰ Qammi isanqa yachasishqäkunata shumaq chaskikushkanki. Kawashqänömi kawaykanki, yarpashqänömi yarpanki, criyishqänömi criyinki, nakarpis awantakushqänömi awantanki, kuyakuq kashqänömi kuyakuq kanki, nakasimaptinpis pacienciakushqänömi pacienciakunki.

¹¹ Musyankimi Antioquíacho, Iconiucho y Listracho runakuna chikimar qatikachäyämashqanta. Sayno chikiyämaptinpis paykunapa makinpita Señor Jesucristumi salvamash.

¹² Saynölami Jesucristo munashqanno kawaq kaqtaqa pitapis chikir nakasiyanqa.

¹³ Yaqa runakuna y engañakuqkunaqa waran waran masmi pantakäyanqa. Wakin runakunata engañayashqannömi kikinkunatapis engañayanqa.

Tayta Diospa palabranta yachakunanpaq tantiyasishqan

¹⁴ Qam isanqa Tayta Diospa wilakuynin ali kashqanta tantiyakur yachakushqaykinöla shumaq kaway. Yachasishuqnikikuna pï kayashqantapis musyankimi.

¹⁵ Saynöpis musyankimi wamra kashqaykipita pasa Tayta Diospa palabranta yachasiyäshushqaykita. Diospa palabranmi tantiyasishushkanki Jesucristuman yärakur salvakunaykipaq kashqanta.

¹⁶ Tayta Diospa palabrancho lapan qelqaraykaqkunaqa Tayta Diospa yarpayninkunami kaykan. Saymi ali kaykan yachasinansipaq, tantiyasinansipaq, corriginansipaq y Tayta Dios munashqanno kawanansipaqpis.

¹⁷ Tayta Diospa palabranta yachakurmi Tayta Diosman yärakuqkuna imaypis kamarikush kaykäyanqa ali kaqkunata rurayänanpaq.