2 Tesalonicenses 3 - Tayta Diospa Wilakuynin

Tayta Diosta manakuyänanpaq yäsishqan

¹ Wawqi panikuna, ali wilakuyninta maysaymanpis chäsiyänäpaq Tayta Diosta manakuyay. Saynöpis manakuyay qamkunata wilapaptï kushish chaskikuyashqaykinöla wakin runakunapis chaskikuyänanpaq.

² Saynöpis fiyu runakunapita sapämänanpaq Tayta Diosta manakuyay. Musyayashqaykinöpis manami lapan runakunasu Jesucristuman yärakuyan.

³ Tayta Diosmi imaypis yanapaykäyäshunki payman yärakuyänaykipaq y ima jusamanpis Satanás mana ishkisiyäshunaykipaq.

⁴ Tayta Dios sayno yanapäyäshuptikimi musyayä yachasiyashqäta imaypis cäsukuyänaykipaq kashqanta.

⁵ Tayta Dios yanapaykuyäläshunki pay kuyakuq kashqanno qamkunapis kuyakuq kayänaykipaq. Saynöpis yanapaykuyäläshunki imano nakarpis Jesucristuno pacienciakur kawayänaykipaq.

Wawqi panikuna arukuyänanpaq yäsishqan

⁶ Wawqi panikuna, Señor Jesucristupa jutinchömi qamkunata nikä: Yachasiyashqäta mana cäsukuq qela wawqi panikunapita witikuyay.

⁷ Musyayankimi noqakunata rikakayämashqaykino qamkunapis kawayänaykipaq kashqanta. Qamkuna kaqcho kar manami imaypis jitaräkushkäsu.

⁸ Dembaldilaqa manami mikuyashkäsu, saypa trukanqa mana afanakuyänaykipaq paqasta junaqtami aruyashkä.

⁹ Apóstol kar yanapäyämänaykipaq manakuyänä kaptinpis manami manakuyashkäsu, saypa trukanqa arukuyashkä qamkunapis rikakamar arukuyänaykipaqmi.

¹⁰ Qamkuna kaqcho kar maynami yachasiyarqä pipis aruyta mana munaptinqa pachanta mana qarayänaykipaq.

¹¹ Sayno yachaykäsiyaptïpis ¿imanirtaq wakin wawqi panikuna arukuyänanpa trukanqa runa imano kawakushqantapis rikapar puriykäyan?

¹² Señor Jesucristupa jutinchömi sayno kawaq wawqi panikunata nï: Wayin wayin puriyänaykipa trukanqa mikuyänaykipaq arukuyay.

¹³ Wawqi panikuna, mana ajayaypa ali kaqkunalata imaypis rurayay.

¹⁴ Kay cartacho qelqamushqäta mayqanpis mana chaskikuptinqa paywan amana shuntakäyaynasu. Saynöpa capazmi penqakur tantiyakuyanman.

¹⁵ Isanqa ama chikiyaysu, saypa trukanqa wawqikitano y panikitano shumaq tantiyasiyay.

Carta ushanan

¹⁶ Ima päsayäshuptikipis ali kawayta qomaqninsi Tayta Dios yanapaykuyäshunki ali kawayänaykipaq. Tayta Dios qamkunawan imaypis kaykuläsun.

¹⁷ Kay cartata dictashqänöla juk qelqapämash kaptinpis ushanantaqa noqa Pablumi qelqarkamü. Lapan cartakushqäkunachöpis ushanantaqa kikïmi qelqä.

¹⁸ Señorninsi Jesucristo kuyapäyäshushpayki imaypis yanapaykuyäläshunki. [Amén.]