2 Samuel 6 - Tayta Diospa Wilakuynin

Tayta Diospa babulninta Jerusalénman David apayta munashqan

¹ Saypitanami kimsa chunka waranqa (30,000) alinnin kaq Israel soldädukunata David shuntarqan.

² Paykunawanmi Judácho kaq Baala markaman aywayarqan Tayta Diospa babulninta Jerusalénman apayänanpaq. Babul janancho kaykaq ishkay querubín chawpinchömi lapanta mandaq Tayta Diospa trönun kaykan.

³ Tayta Diospa babulnin karqan Abinadabpa wayinchömi. Say wayiqa karqan juk lömachömi. Wayipita jorquskirmi mushuq carrëtaman babulta churarkur Abinadabpa surinkuna Uzawan Ahío apayarqan.

⁴ Carrëtapa puntantanami Ahío aywarqan.

⁵ Babulta apayaptinmi Israel runakunawan Davidpis fiyupa kushish tünaraykar aywayarqan. Tayta Diosta alabayashpanmi arpakunata, salteriukunata, panderëtakunata, shaqshaqyaqkunatapis platïllukunatapis tukaraykar aywayarqan.

⁶ Nacónpa ëran kaqman chaykur törukuna tinkakaptinmi Uzaqa babul mana ishkinanpaq tuknarkurqan.

⁷ Sayno sarirkuptinmi Tayta Dios fiyupa rabyakushpan Uzata jinan höra päsarpasirqan. Saymi Uza wanur babul nawpanman kuchpakaskirqan.

⁸ Uzata Tayta Dios wanusiptinmi David pasaypa rabyanarqan. Saypitami say ërata jutisirqan Pérez-uza jutin kananpaq. Say jutilami kananyaqpis kaykan.

⁹ Say junaqmi Tayta Diosta mansashpan David nirqan: <<¡Kakuläsun, taytay! Tayta Diospa babulninta ¡imapaqtaq apashaqpis!>>

¹⁰ Sayno nirmi say babulta Davidpa Markanman apayarqannasu. Saypa trukanqa paytakuykuyarqan Gat markapita kaq Obed-edompa wayinmanmi.

¹¹ Kimsa killayaqmi babul saycho paytakararqan. Saymi Obed-edomta y ayllunta Tayta Dios lapanchöpis yanaparqan.

Tayta Diospa babulninta Jerusalénman David apasishqan

¹² Saypitanami rey Davidta wilayarqan Tayta Diospa babulnin Obed-edompa wayincho kaptin lapanchöpis payta ali yanapashqanta. Saymi Tayta Diospa rabyaynin päsashqanta tantiyakushpan David sayman aywaykur Tayta Diospa babulninta Jerusalénman kushish apasirqan.

¹³ Jerusalénman apayänanpaq yarquykäyaptinmi Davidqa töruta y werannin carnita pishtarkur sacrificiupaq rupasirqan. Sayno rupasirqan babulta apaqkuna cada soqta japayta japarkuyaptinmi.

¹⁴ Davidmi lïnupita rurash efodnin jatish Tayta Diospa babulninpa puntanta kushikushpan tushuraykar aywarqan.

¹⁵ Saynömi Davidwan lapan Israel runakuna Jerusalénman babulta apayarqan kushikuypita qayaräyashpan y cornëtakunata tukayashpan.

¹⁶ Tayta Diospa babulninta Davidpa Markanman yaykaykäsiyaptinmi ventänanpita watqaykur Saúlpa surin Mical rikarqan Tayta Diospa nawpancho tushuraykar David kushish aywaykaqta. Rey kaykar saltaypa saltar tushuykaqta rikarmi shonqulancho Davidta jamurarqan.

¹⁷ Markaman chaykasirmi Tayta Diospa babulninta churayarqan David sharkasishqan toldu rurinman. Nirkurnami uywakunata David pishtarkasir rupasina sacrificiuta y jawka kawakuy sacrificiutapis Tayta Diospa nawpancho rupasirqan.

¹⁸ Rupasiyta ushaskirmi lapanta mandaq Tayta Diosta Israel mayinkunapaq manakur Davidqa Diospa jutincho bendicionta qorqan.

¹⁹ Nirkurnami olqutapis warmitapis lapan Israel runakunata aypurqan juk tantata, pedäzu aysata y päsaslan atipay juk biscöchutapis. Sayta mikukurkurnami runakuna wayinkunapa kutikuyarqan.

²⁰ Saynölami Davidpis wayinman kutikurqan ayllunkunata bendisinanpaq. Wayinman yaykuraykaptinmi Saúlpa surin Mical yarqaskamur nirqan: <<¡Israel nacionpa mandaqnin rey kaykar ashmay warmikunapa nawpancho cösaran tushuraykar aywashkanki! ¡Mana tantiyakuq runanömi pasaypa penqakuypaq sikiki rikakashqanyaq qarikaypa qarikar tushushkanki!>>

²¹ Niptinmi David nirqan: <

²² Tayta Diosta adorar tushushqäpita jamurämaptikipis masraqmi payta adorashaq. Jamurämaptikipis say ashmay warmikunaqa respitayämanqami>>.

²³ Davidta sayno jamurashqanpitami Mical qoluq rikakurqan.