2 Pedro 3 - Tayta Diospa Wilakuynin

Jesucristo kutimunanpaq kashqan

¹ Kuyay wawqi panikuna, kaywanqa ishkay kutinami cartakaykämü. Ishkan cartachöpis ali kawayänaykipaqmi yäsiykä.

² Saynöpis yäsiykä santu profëtakuna wilakuyashqanta y salvamaqninsi Señor Jesucristupa mandamientunta mana qonqäyänaykipaqmi. Say mandamientutaqa apostolninkunami yachasiyäshurqayki.

³ Ultimu tiempukunacho Diosta mana cäsukuq runakuna yurimunanpaq kashqanta tantiyakuyay. Say runakunaqa asipäyäshushpaykimi

⁴ niyanqa: <<¿Imanirtaq Jesucristo nirkur kutimunraqsu? Paywan puriqkunapis shuyakuykäyashlanchömi wanukuyash. Kay pasapis qalaykushqanpita pasa kashqannölami kaykan>>.

⁵ Sayno nir manami tantiyayansu kay pasatapis jana pasatapis Tayta Dios <> nilar kamashqanta. Kamaptinmi yaku rurinpita saki pasa yarqamurqan.

⁶ Saypitanami kay pasata diluviuwan ushakäsirqan.

⁷ Saynölami juiciu finalcho Tayta Dios niptilan kay pasa, inti, killa y lapan qoyllarkunapis ninawan ushakäyanqa. Say junaqmi jusalikur kawaq runakunapis ushakäyanqa.

⁸ Kuyay wawqi panikuna, shumaq tantiyakushun: Tayta Diospaqqa juk junaq waranqa (1,000) watanömi kaykan y waranqa watapis juk junaqnölami kaykan.

⁹ Sayno kaykaptinqa wakin runakuna yarpäyashqanno ama yarpäshunsu Señor Jesucristo mana kutimunanpaq kashqanta. Payqa manami munansu pipis jusalancho wanunanta. Saymi shuyaraykan runakuna jusalikuyta wanakuyänanta.

¹⁰ [Sakaypa] elaqpita suwa shamushqannömi Señor Jesucristupis elaqpita shamunqa. Pay shamuptinmi intipis, killapis y lapan qoyllarkunapis mansariypaq bunrurur ninawan rupaykar ushakäyanqa. Saynölami kay pasapis y kay pasacho kaqkunapis rupaykälar chipyaq ushakanqa.

¹¹ Imaykapis ushakänanpaq kaykaptinqa mana jusalikuypa Tayta Dios munashqanno santu kawayay.

¹² Sayno shuyakuyaptikimi Tayta Dios juzganan junaq ras chämunqa. Say junaqmi intita, killata y qoyllarkunatapis nina rupaykar ushanqa. Saynölami lapan imaykapis suluykälar ushakanqa.

¹³ Noqansimi isanqa Tayta Dios promitishqannöla mushuq ciëluta y mushuq pasata shuyakuykansi. Saychöqa Tayta Dios munashqannömi lapanpis ali kanqa.

¹⁴ Kuyay wawqi panikuna, saykunata shuyakuykarqa jusalikuykunata kacharir pïmaywanpis ali kawayay. Saynöpami Jesucristo kutimur jusaynaqta tariyäshunki.

¹⁵ Yarpäyay Señor Jesucristo imanir manaraq kutimushqanta. Pay shuyaraykan runakuna salvakuyänantami. Saytaqa kuyay wawqinsi Pablupis Tayta Dios tantiyasiptin qelqashqami.

¹⁶ Lapan cartankunachömi sayta qelqarqan. Say cartankunacho aja tantiyaypaq kaptinmi yachaq tukuqkuna y Tayta Diosman janan shonqula yärakuqkuna lutanta yachasiyan. Saynölami lutanta yachasiyan Tayta Diospa palabrancho wakin kaq yachasikuykunatapis. Say runakunaqa infiernuchömi nakayanqa.

Carta ushanan

¹⁷ Kuyay wawqi panikuna, kay nishqäkunata musyaykarnaqa cuidä chaskipäyankiman lutan yachasikuqkunapa yachasikuyninta. Tayta Diosman ali yärakuykäyashqaykicho qepamantaq kutikuyankiman.

¹⁸ Saypa trukanqa waran waran tantiyakuyay kuyapäkuq y salvakuq Señor Jesucristo munashqanno kawayänaykipaq. ¡Pay kananpis y imayyaqpis alabash kaykuläsun! Amén.