2 Pedro 2 - Tayta Diospa Wilakuynin

Lutan yachasikuqkuna imano kawayashqantapis tantiyasishqan

¹ Israel nacioncho lula profëtakuna nawpata kayashqannömi qamkunachöpis lutan yachasikuqkuna kayanqa. Paykunaqa Tayta Diospa wilakuqnin tukurmi criyisiyäshushpayki manakaqkunata yachasiyäshunki. Saynölami salvakuq Señor Jesucristutapis ñëgayanqa. Paykunatami Tayta Dios juiciu finalcho elaqpita ushakäsinqa.

² Paykuna yachasiyashqanta chaskiparmi runakunapis warmikunapis jusalikur kawayanqa. Sayno kawayaptinmi Tayta Diospa wilakuyninta pïmaypis manakaqman churayanqa.

³ Qellaypaq wachakash karmi ali tupaylapa sakyayäshunki. Paykunata infiernuman qaykunanpaq Tayta Dios unaypitanami destinarqan. Saymi paykunata fiyupa nakay shuyaraykan.

⁴ Jusalikuq angilkunatapis Tayta Dios manami perdonarqansu, saypa trukanqa infiernumanmi qaykurqan. Saychömi yanawyaykaq sakayman wichqarqan juiciu final chämuptin juzgananpaq.

⁵ Noé kawashqan wisanpis jusasapa runakunata manami perdonarqansu. Say runakunaqa Tayta Dios munashqanno kawayänanpaq Noé wilapaptinpis manami chaskikuyarqansu. Saymi Tayta Dios diluviuwan ushakäsirqan. Sayno ushakäsirpis Noéta y qanchis runakunalatami salvarqan.

⁶ Saynölami Sodoma y Gomorra markakunatapis uchpayashqanyaq Tayta Dios rupasirqan. Sayno rurarqan castigakuq kashqanta jusasapa runakuna tantiyakuyänanpaqmi.

⁷ Say markakunata rupasirpis Lottami isanqa ali runa kaptin salvarqan. Paymi say markakunacho taq fiyu runakuna jusalikuyaptin ima ruraytapis kamäpakurqansu.

⁸ Paykuna kaqcho tashpan jusalikuyashqanta rikar y manakaqkunata parlayashqanta wiyar waran waranmi fiyupa lakikurqan.

⁹ Saynöpami musyansi pay munashqanno kawaq kaqtaqa lapansitapis Tayta Dios ima nakaypitapis salvamänansipaq kashqanta. Jusalikuqkunatami isanqa juiciu finalcho fiyupa castiganqa.

¹⁰ Mas fiyupami castiganqa shanaripakur pïmaywanpis kakuqkunata. Say runakunaqa Tayta Diostapis manami cäsukuyansu. Yachaq tukuyashpanmi supaykunatapis mana mansapaypa ashliyan.

¹¹ Jana pasacho kaykaq angilkunaqa runakunapita mas munayyuq kaykarpis y Tayta Diospa nawpancho kaykarpis manami supaykunata ashliyansu.

¹² Say runakunaqa mana tantiyarmi sayno ashliyan. Uywakunano yarpayniynaq kayashpanmi wanusish kayänalanpaq yuriyash. Mana alita ruraykäyashlanchömi ushakäyanqapis.

¹³ Wakinkunata nakasiyashqanpitami kikinkunapis nakayanqa. Pïmaypa nawpancho manakaqkunata rurarpis mana penqakuypami jeqchikachäyan. Qamkuna mikuyänaykipaq shuntakäyashqaykichöpis lutankunata parlarmi kushikuyan.

¹⁴ Say runakunaqa pï warmita rikarpis munapäyanlanami. Jusalikurpis manami ajayäyansu. Manaraq shumaq tantiyakuqkunatami lutankunata yachasiyan. Runa mayinta imaykanöpapis sakyayta yachayanmi. Sayno kayashqanpitami fiyupa castigash kayanqa.

¹⁵ Tayta Dios munashqanno nawpata kawarkurpis kananqa pantakashnami puriykäyan. Beorpa surin Balaam qellay raykula lutanta rurashqannömi paykunapis lutankunata ruraykäyan.

¹⁶ Qellaypaq wachakash Balaam aywaykaptinmi china ashnun parlar mana aywananpaq micharqan.

¹⁷ Say runakunaqa sakish pukyuno y wakpa kaypa aywaq saki pukutaynömi kaykäyan. Paykunapaqqa maynami kamarish kaykan yanawyaykaq sakay [imayyaqpis] saycho wichqaräyänanpaq.

¹⁸ Paykunaqa sumäsiyashpanmi yachaq tukur imatapis parlayan. Jusankunata sayraq kacharish kaqkunatami shakyäsiyan lutankunata rurayänanpaq.

¹⁹ Runakunatami promitiyan yachasiyashqanta chaskikur libri kawayänanpaq kashqanta. Sayno promitirpis kikinkunaqa manami librisu kaykäyan, saypa trukanqa jusalikuypa munaylanchömi kaykäyan. Ima viciupis runata vinciptinqa say viciupa munayninchömi kaykan.

²⁰ Salvamaqninsi Señor Jesucristuta chaskikush kaykar jusalikuyman yapay churakarqa nawpata kashqanpita peormi say runa rikakun.

²¹ Diospa wilakuyninta chaskikush kaykar jusalikuyman kutinanpaq kaykaptinqa mejor ama say sagrädu wilakuyninta chaskikuyanmansu karqan.

²² Jusalikuyman kutiqkunapaqqa rasuntachir niyan: <>.