2 Corintios 9 - Tayta Diospa Wilakuynin

¹ Jerusaléncho kaq wawqi panikunapaq ofrendata shuntayänaykipaqqa masta tantiyasinä manami nistakannasu.

² Musyämi ofrenda shuntayta munayashqaykita. Saymi Macedonia provincia wawqi panikunata wilarqä qanyan watapita ofrenda shuntayta qalaykuyashqaykita. Sayno wilaptïmi paykunapis shuntaykäyan.

³ Saynöpis kaycho kaq wawqi panikunata wilarqä qamkuna kaqman shamuptï ofrendata alistakushla shuyäsiyämänaykipaq kashqanta. Qamkunapaq sayno parlashqä manakaqlapaq kananta mana munarmi say kimsa wawqikunata kachaykämü.

⁴ Macedoniapita wawqikunawan shamur cuidädu sayraq shuntaykaqta tariyäman. Shuntayashqaykita wilaykaptïpis manaraq shuntayaptikiqa noqapaq y qamkunapaqpis penqakuypaqmi kanqa.

⁵ Saymi kimsaq nawpayämunqa shuntäsiyäshunaykipaq. Saynöpami shuntayänaykipaq niyashqaykinöla ofrenda listuna kanqa noqa chämur apanäpaq. Chämuptïraq shuntayaptikiqa runakuna yarpäyanqa mana munaykar shuntaykäyashqaykitami.

Yanapäkuqkunata Tayta Dios yanapashqan

⁶ Musyashqansinöpis walkalata muruq kaqqa walkalatami shuntan. Askata muruq kaqqa askatami shuntan.

⁷ Saynöla qamkunapis aykata ofrendayänaykipaqpis shumaq yarpachakurir kushishla ofrendayay. Shonquykikuna nanaykaptinqa ama ofrendayaysu. Kushish ofrendaq kaqtami Tayta Dios kuyan.

⁸ Kuyayäshushpaykimi ali kaqkunata imaypis rurayänaykipaq munayninwan lapanchöpis yanapäyäshunki.

⁹ Tayta Diospa palabranchöpis kaynömi qelqaraykan: <>.

¹⁰ Murutapis mikuytapis kamaripämaqninsi Tayta Dios bendicionninta churaykalämusun wakintapis kushishla yanapäyänaykipaq.

¹¹ Saynöpami imapis pishïyäshunkisu wakinta yanapäyänaykipaq. Qaraynikikunata chäsiyaptïmi Tayta Diosta kushishla agradëcikuyanqa.

¹² Saynölami ofrendata shuntayashqaykita chäsiptï Jerusaléncho kaq wawqi panikunapis mana pishïpakurna Tayta Diosta kushish agradëcikuyanqa.

¹³ Saynöpis Jesucristupa ali wilakuyninta cäsukuyashqaykita tantiyar Tayta Diosta alabayanqa paykunata y wakinkunatapis yanapäyashqaykipita.

¹⁴ Saynöpis kuyapäkuq kayninta qamkunaman churamushqanpitami Tayta Dios imaypis yanapäyäshunaykipaq lapan shonqunkunawan manakuyanqa.

¹⁵ ¡Tayta Diosta agradëcikushun kuyapäkuq kashqanpita! Saypita imanöpa agradëcikuytapis manami kamäpakunsisu.