2 Corintios 8 - Tayta Diospa Wilakuynin

Ofrendata shuntayänanpaq nishqan

¹ Wawqi panikuna, wilapäyäshayki Macedoniacho kaq wawqi panikunata Tayta Dios kuyapar imano yanapashqantapis.

² Paykunaqa fiyupa nakarpis y pasaypa muchuycho karpis kushishqami saysika ofrendata shuntayash.

³ Kikïmi rikashkä ofrendata churayänanpaq kaqpita masta churayashqanta. Sayno churayash voluntäninkunapitami.

⁴ Paykuna yaparir yaparirmi ruwakayämash wakin markakunacho ofrendata shuntayashqanno Jerusaléncho yärakuq mayinsikunapaq shuntayänanpaq.

⁵ Ofrendata shuntarnami yarpäyashqäpitapis mas askata shuntayash. Puntataqa Señor Jesucristupa munaynincho kawayänanpaqmi promitiyash. Saypitanami imata yäsiyashqätapis Tayta Dios munashqanno cumpliyänanpaq niyämash.

⁶ Qamkunapis ofrendata shuntar qalaykuyänaykipaq Titumi shakyäsiyäshushkanki. Saymi payta ruwakurqä qamkuna kaqman kutimur saynöla mas shakyäsiyäshunaykipaq.

⁷ Tayta Dios alimi yanapaykäyäshunki payman yärakuyänaykipaq, shumaq parlayänaykipaq, ali yachayänaykipaq, yanapäkuq kayänaykipaq y yachasiyashqäno pïmaytapis kuyayänaykipaq. Saynöla aska ofrendata shuntayänaykipaqpis Tayta Dios yanapaykuyäläshunki.

⁸ Wakinkuna kushish shuntayashqanta nikä manami mana munaykaqta obligarsu, sinöqa kuyapäkuq kayashqaykita pïmaypis musyananpaqmi.

⁹ Qamkuna musyayankimi Señor Jesucristupis kuyapäkuq kashqanta. Paymi gloriacho rïcu kayninta kacharishpan kay pasaman shamur muchuqnöla rikakurqan. Sayno rikakurqan qamkunapis gloriaman char Tayta Diospa nawpancho rïcu kayänaykipaqmi.

¹⁰ Kanan yäsishqäta chaskikuyay: Qanyan wata ofrendata shuntar qalaykuyashna kaykarqa

¹¹ tariyashqaykiman tupu shuntar sïguiyay.

¹² Lapan shonquykikunawan kushish shuntayaptikiqa ofrendayashqaykita Tayta Dios chaskiyäshunkimi. Isanqa kashlanpita shuntayay. Ama lakikuyaysu shuntayashqayki ofrenda walkala kaptinpis.

¹³ Manami muchuyman churayta munarsu sayno nikä, sinöqa lapansipis yanapänakunansita munarmi.

¹⁴ Jerusaléncho yärakuq mayinsikuna kanan muchuyaptinpis qamkunapaqa kanraqmi. Qamkuna muchuycho kayaptikinami paykunapis yanapäyäshunki. Jukninsi jukninsi sayno yanapänakurqa manami pishipakushunnasu.

¹⁵ Tayta Diospa palabranchöpis kaynömi qelqaraykan: <>.

Yanapaqninkunawan Corintuman Tito aywayänanpaq nishqan

¹⁶ Titupis noqanöla qamkunapaq yarparaptinmi Tayta Diosta agradëcikü.

¹⁷ Saymi qamkuna kaqman kutimunanpaq niptï kushish awnimash. Qamkunawan kayta munarmi manaraq niptïpis shamuyta munaykan.

¹⁸ Tituwanmi juk wawqitapis kachaykämü. Tayta Diospa wilakuyninta ali wilakuq kaptinmi kaycho kaq lapan wawqi panikuna niyan ali wawqi kashqanta.

¹⁹ Saymi Jerusalénman ofrendata apayaptï yanapäyämänanpaqpis payta akrayash. Ofrendata chäsiyaptïnami yanapäkuq kashqansita tantiyar Tayta Diosta alabayanqa.

²⁰ Saysika ofrendata chäsiyänäpaq yanapäyämaptinmi pipis lutanta parlanqasu.

²¹ Tayta Diospa nawpanchöpis y runakunapa nawpanchöpis alilatami rurayta munä.

²² Tituwanmi mas juk wawqitapis kachaykämü. Paypis Tayta Dios munashqanno kawaq wawqimi. Ali chaskiyänaykipaq kashqanta musyarmi paypis yanapäyäshunaykipaq kushish shamuykan.

²³ Tito pï kashqantapis tapuyäshuptiki wilayanki noqawan wilakur puriq kashqanta. Manami noqalata yanapämänanpaqsu sayno purin, sinöqa qamkunatapis yanapäyäshunaykipaqmi. Saynöla paywan shamuq ishkay wawqikunapita tapuyäshuptikipis wilayanki kaycho kaq wawqi panikuna paykunata kachayämushqanta y Cristo munashqanno ali kawaykäyashqanta.

²⁴ Qamkuna kaqman chäyämuptin paykunata shumaq chaskiykuyälay. Saynöpami maysaychöpis wawqi panikuna musyayanqa nishqänöla kuyapäkuq kayashqaykita.