2 Corintios 7 - Tayta Diospa Wilakuynin

¹ Kuyay wawqi panikuna, Tayta Dios sayno nikämashqaqa lapan jusansikunata kacharishun. Jusalikurqa cuerpunsitapis espïritunsitapis qanratansimi. Sayno kaykaptinqa Tayta Diosta mansapakur pay munashqanno imaypis kawashun.

Pablo yäsishqanta chaskikuyashqan

² Wawqi panikuna, yarparkayälämay, ari. Qamkunata manami mayqaykitapis sakyayashkäsu ni lulapäyashkäsu ni engañayashkäsu.

³ Qamkunata sayno nikä manami manakaqman churarsu, sinöqa nawpata nishqänöpis qamkunata kuyayämi. Saymi imaypis mana qonqaypa yarparäyäshayki.

⁴ Nishqäkunata chaskikuyänaykipaq kashqanta tantiyarmi qamkunaman yärakü. Saymi ima päsamaptinpis lakikunäpa trukan seqaypa kushikü.

⁵ Macedonia provinciaman chäyashqäpita pasa manami jamaytapis tariyashkäsu. Saypa trukanqa runakuna conträ sharkuyaptin y qamkunapaq y Titupaq yarpachakurmi fiyupa lakikuyashkä.

⁶ Sayno kaykäyaptïmi Tito chämuptin lakish kaykaqkunata shakyäsiq Tayta Dios shakyäsiyämash.

⁷ Manami Tito chämushlanpitasu kushikuyashkä, sinöqa qamkuna kaqpita Tito kushish kutimushqanpitapis kushikuyashkämi. Paymi wilayämash qamkunaman watukaq shamunäta munaykäyashqaykita, jaqayäsinakushqansipita lakikuyashqaykita y noqapaq yarpachakuykäyashqaykitapis. Sayno wilayämaptin masraqmi kushikuyashkä.

⁸ Apasimushqä cartata liyir lakikuyashqaykita musyarpis manami pësaküsu. Qelqamushqä hörami isanqa pasaypa lakikurqä cartacho nikashqäta liyir lakikuyänaykipaq kashqanta yarpar.

⁹ Kananqa seqaypami kushikü. Manami qamkunata lakikasishqäpitasu kushikü, saypa trukanqa tantiyakur Tayta Diosta cäsukuyashqaykipitami. Cartata apasiyämushqä manami manakaqlapaqsu kash, sinöqa Tayta Dios munashqanno lakikuyänaykipaqmi.

¹⁰ Tayta Dios munashqanno lakikurqa jusalikuyta wanakunsimi. Jusalikuyta kachariqkunatami Tayta Dios perdonan. Sayno perdonta tarirqa manami lakikunsinasu, sinöqa kushikunsimi. Mana criyiqkunami isanqa lakikurpis jusalikuyta mana kacharir wanushno kaykäyan.

¹¹ Tayta Dios lakikuyman churayäshushqayki alipaqmi kash. Saymi kananqa perdonta manakayämashkanki, conträ sharkuq runapaq rabyanäyashkanki, Tayta Diosta mansapakuykäyanki, noqawan tinkuytana munaykäyanki, noqapaq yarpachakuykäyanki y jusayuq runata corrigiyashkanki. Sayno kayaptikimi tantiyakuyä lapanta sitiunman churayashqaykita.

¹² Say apasimushqä carta manami conträ sharkuq runata corrigiyänalaykipaqsu ni noqa kushikunaläpaqsu kash, sinöqa tantiyasiyashqäta chaskikur rasunpaypa kuyayämashqaykita [y noqapis qamkunata kuyashqäta] Tayta Diospa rikanancho tantiyayänaykipaqmi.

¹³ Kuyayämashqaykita musyarmi seqaypa kushikuyashkä. Isanqa masraqmi kushikuyashkä Tituta ali chaskikuyashqaykita y shakyäsiyashqaykipita kikin wilayämaptin.

¹⁴ Manaraq qamkuna kaqman Tito shamuptinmi payta shakyäsirqä <> nir. Say nishqänölami lapanpis kamakash. Saymi qamkunata imaypis rasun kaqta nishqäno qamkunapaq payta nishqäkunapis rasun kaqla kash.

¹⁵ Kananqa Titupis qamkunapaq yarparaykan cäsukuyashqaykipita y payta ali chaskikuyashqaykipitami.

¹⁶ Saynölami yärakuypaqna kayashqaykipita noqapis kushikü.