2 Corintios 5 - Tayta Diospa Wilakuynin

Mushuq cuerputa chaskinansipaq nishqan

¹ Musyansimi kay cuerpunsi ushakaptinpis mana ushakaq mushuq cuerputa Tayta Dios qomänansipaq kashqanta. Kay pasachöqa cuerpunsi ushakaq suklanölami kaykan. Gloriachömi isanqa mushuq cuerpunsi Tayta Dios rurashqan ali wayinöna kanqa.

² Kay pasacho kawashqansiyaqqa mushuq cuerputa jukla chaskikuyta munarmi yarpachakur lakikunsi.

³ Mushuq cuerputa chaskikurqa manami qarapächunösu kashun, sinöqa ali mödanashnönami.

⁴ Kay pasacho cuerpunsi ushakaqla kaptin lakikurpis manami wanuyta munansisu, saypa trukanqa cuerpunsi mana ushakaq cuerpuman jukla tikranantami munansi.

⁵ Mana ushakaq cuerpuyuq kanansipaqmi Tayta Dios kamamashkansi. Mushuq cuerputa chaskinansipaq kashqanta musyanansipaqmi Espíritu Santuta qomashkansi.

⁶ Saymi Tayta Diosman imaypis yärakunsi. Musyansimi kay pasacho kashqansiyaqqa Tayta Diosta manaraq rikashqansita.

⁷ Payta manaraq rikarpis paymanmi yärakunsi.

⁸ Payman yärakurmi cuerpunsita kacharir nawpanman jukla chayta munansi.

⁹ Saymi kawarpis o wanurpis imaypis yarpachakunsi Tayta Diospa shonqunpaqno kawanansipaq.

¹⁰ Jesucristupa nawpanman chaptinsi lapansitami juzgamäshun. Kay pasacho kashqansiyaq alita o mana alita rurashqansiman tupumi premiutapis o castïgutapis chaskishun.

Tayta Dioswan runakuna amistayänanpaq wilakuyashqan

¹¹ Señor Jesucristo juzgamänansipaq kashqanta musyarmi payta mansapakur wilakuyninta imaykanöpapis wilakuykäyä. Rasunpaypa payta sirviykäyashqäta Tayta Dios musyanmi. Saytaqa qamkunapis tantiyayankimanmi.

¹² Sayno nikä manami yachaq kayashqäta sumäsirsu, sinöqa Tayta Diospa wilakuqnin kayashqäta tantiyar kushikuyänaykipaq y pipis conträ parlaptin favornï sharkuyänaykipaqmi. Say conträ sharkuqkunaqa yachaq tukurpis janan shonqulami Tayta Diosta sirviyan.

¹³ Löcu kayashqäta niyaptinpis Tayta Diosta sirviyänä raykumi löcu nishqapis kaykäyä. Ali yarpayyuq kayashqäta niyaptinpis qamkunata yanapäyänä raykumi ali yarpayyuq kaykäyä.

¹⁴ Imano niyämaptinpis noqakunaqa Jesucristo kuyamashqansita tantiyarmi wanuy kaway payta sirviyä. Sayno sirviyä Jesucristo lapansi rayku wanushqanta musyarmi. Noqansi rayku wanuptinmi lapansipis jusalikuypaq wanushnöna kaykansi.

¹⁵ Manami kikinsi munashlansita rurar kawakunansipaqsu Jesucristo wanush, sinöqa pay munashqannöna kawanansipaqmi. Payqa wanurpis noqansi raykumi kawarimush.

¹⁶ Sayno kaptinmi Diosman mana yärakuq runakunanöqa pipaqpis lutanta yarpäyäsu. Nawpataqa noqakunapis mana yärakuq runakunanölami Jesucristupaq lutanta yarpäyarqä. Kananqa manami saynönasu yarpäyä.

¹⁷ Pipis Jesucristucho karqa mushuq kamash runanami kaykan. Unay kawayqa päsashnami. Kananqa lapanpis mushuqnami kaykan.

¹⁸ Sayno kanansipaq kikin Tayta Diosmi kamakäsish. Paymi Jesucristo noqansi rayku wanuptin perdonamashkansi. Saynöpis lapan runakuna paywan amistayänanpaqmi wilakuyninta wilakuyänäpaq churayämash.

¹⁹ Say wilakuyqa kaynömi nikan: Jesucristuchömi Tayta Dios karqan runakunata jusalikuyashqanpita perdonar kikinwan amistananpaq. Say wilakuyta wilakuyänäpaqmi churayämash.

²⁰ Saymi noqakunaqa Jesucristupa wilakuqninkuna kaykäyä. Wilakuqnin karmi Tayta Dios ruwakuykaqno Jesucristupa jutincho pïmaytapis kayno nir ruwakuyä: ¡Tayta Dioswan amistakuy!

²¹ Jusaynaq kaykaptinpis lapan jusansitami Jesucristuta Tayta Dios jitapash. Saymi jusayuq runano noqansi rayku wanuptin paycho kaptinsi jusaynaqtano Tayta Dios chaskimansi.