2 Corintios 4 - Tayta Diospa Wilakuynin

Tayta Diospa wilakuyninta Pablo wilakushqan

¹ Tayta Dios kuyapäyämashpan wilakuyninta wilakuyänäpaq churayämash kaptinmi conträ sharkuyaptinpis lakikuyäsu.

² Noqakuna manami imatapis lutankunata ni penqakuypaq kaqkunata rurayäsu. Manami pitapis engañaykäyäsu ni Tayta Diospa wilakuyninman ituykasilar kikïkunapa yarpaynïkunata yapayäsu. Saypa trukanqa wilakuyninta pïmaypis musyayänanpaqmi Tayta Dios munashqanno kawayä.

³ Sayno kaptinpis infiernuman qaykush kayänanpaq kaqkunaqa wilakuyashqäta manami chaskikuyansu.

⁴ Sayno chaskikuyansu kay pasacho kaykaq dios yarpayninkunata upatakäsish kaptinmi. Saymi Jesucristupa wilakuynin aksino kaykaptinpis paykunaqa mana rikaqno kar say wilakuyninta tantiyayansu. Jesucristuchömi Tayta Dios imano kashqantapis tantiyansi.

⁵ Manami noqakunapa munaynïcho kawayänaykipaqsu wilakuyä, sinöqa Señor Jesucristupa munaynincho kawayänaykipaqmi. Noqakunaqa Jesucristuta sirvir qamkunapa ashmaynikinölami kaykäyä.

⁶ Sayno kaykäyä chipipiykaq aksitano ali wilakuyninta shonqükunaman Tayta Dios churamush kaptinmi. Sayno churamush kay pasata kamar sakaycho asikyay kananpaq nishqannölami. Saymi Tayta Dios imano kashqantapis Jesucristucho shumaq tantiyaykäyä.

Imano nakarpis Pablo wilakushqan

⁷ Say ali wilakuyqa shonqükunacho kaykan mitu mankacho seqaypa väliq riquëza kaykaqnömi. Noqakuna mitu mankanöla karmi kikïkunapa podernïkunawansu wilakuyä, sinöqa Tayta Diospa poderninwanmi.

⁸ Saymi imano nakasiyämaptinpis mana ajayaypa wilakuykäyä. Ima rurayta mana kamäpakurpis manami aläpaqa lakikuyäsu.

⁹ Chikiyämaptinpis Tayta Dios manami kachariyämansu. Conträ sharkuyaptinpis Dioslamanmi imaypis yärakuykäyä.

¹⁰ Maypa aywayaptïpis Jesucristo nakashqanno nakayashqätami runakuna rikayäman. Payta cäsukurmi wanuymanpis cäsi cäsi chäyä. Saynöpami runakuna tantiyayan wanuypita salvamänanpaq Jesucristo munayyuq kashqanta.

¹¹ Jesucristupa wilakuyninta wilakushqäpita wanusiyämayta munayaptinpis Jesucristo noqakunawan kawaykashqanmi musyakaykan.

¹² Saymi wanuy tumapäyämaptinpis mana ushakaq kawayta tariyänayki rayku wilakuykäyä.

¹³ Tayta Diospa palabrancho kayno nirmi qelqaraykan: <>. Say qelqaraykashqannölami noqakunapis Tayta Diosman yärakur wilakuyninta wilakuykäyä.

¹⁴ Payman yärakurmi musyansi Señor Jesucristuta kawarisimushqanno kawarirkasimashpansi nawpanman pushamänansipaq kashqanta.

¹⁵ Saymi imano nakarpis salvakuyänaykipaq wilakuyä. Saynöpami wakin runakunatapis Tayta Dios kuyapar salvaptin maysaychöpis payta agradëcikur alabayanqa.

¹⁶ Saymi Tayta Diospa wilakuyninta mana ajayaypa wilakuyä. Awkinyash cuerpunsi lasaptinpis shonqunsichöqa waran waran mas maqtanömi kaykansi.

¹⁷ Kay pasacho kashqansiyaqla nakarpis gloriacho imayyaqpis kawanansipaqmi kamarikuykansi. Say kawaymanqa manami imapis kay pasacho kaqkuna tinkunsu.

¹⁸ Manami kay pasacho kawanalansipaqsu yarpachakunsi, sinöqa gloriacho kawanansipaqmi. Kay pasacho kawayqa ushakaqlami kaykan. Gloriacho kawaymi isanqa mana ushakaq kaykan.