2 Corintios 3 - Tayta Diospa Wilakuynin

Corintucho taq wawqi panikuna recomendación cartano kayashqan

¹ Sayno niptï ama yarpäyaysu chaskikayämänayki raykula parlayashqäta. Saynöpis ama yarpäyaysu chaskikayämänaykipaq recomendación cartataraq nistäyashqäta. Wakin runakuna recomendación cartata purisiyaptinpis qamkuna chaskikayämänaykipaqqa manami nistäyäsu. Saynöpis juk markaman chäyaptï chaskikayämänanpaq manami qamkunapita recomendación cartata nistäyäsu.

² Saypa trukanqa kikikikunami shonqükunacho qelqaraykaq recomendación cartä kaykäyanki. Say cartataqa pïmaypis liyiyanmi.

³ Saynöpami runakuna tantiyayan wilakuyashqäta chaskikur Jesucristo qelqashqan carta kayashqaykita. Say cartataqa manami tintawansu qelqash, sinöqa imayyaqpis kawaq Tayta Diospa Espïritunwanmi. Saynöpis manami parara rumichösu qelqash, sinöqa shonquykikunachömi.

⁴ Sayno kaykäyashqaykita musyayä Jesucristo salvamashqanpita Tayta Diosman yärakurmi.

⁵ Wilakuyänäpaq manami yachaq kayashqämansu atiënikuyä, sinöqa Tayta Diosmanmi.

⁶ Paymi yanapäyäman mushuq pactupita wilakuyänäpaq. Say mushuq pactuqa manami leykunapa munaynincho kawanansipaqsu nikämansi, saypa trukanqa Espíritu Santu tantiyasimashqansino kawanansipaqmi. Leykunapa munaynincho kawarqa wanushnömi kawansi. Espíritu Santupa munaynincho kawarmi isanqa mana ushakaq kawayta tarinsi.

Moisés qelqashqan leykunapitapis Jesucristupa wilakuynin mas ali kashqan

⁷ Parara rumicho qelqaraykaq leykuna runakunata salvananpaq mana kaykaptinpis say leykunata Israel runakunaman Moisés chäsiptin qaqlan fiyupami chipipirqan. Say chipipishqan elaqaqla kaykarpis fiyupami chipipirqan. Saymi Moiséspa qaqlanta rikayta kamäpakuyarqansu.

⁸ Moisés apamushqan leykunapis sayno kushikuypaq kaykaptinqa ¿manaku Espíritu Santu apamushqan wilakuy mas kushikuypaq kaykan?

⁹ Mana salvakunansipaq kaykarpis say leykuna ali kaykaptinqa salvamänansipaq kaq wilakuy mas alimi kaykan.

¹⁰ Say leykuna Espíritu Santu apamushqan wilakuyman manami tinkunsu.

¹¹ Saymi ushakänanpaq kaq leykuna kushikuypaq kaptinpis Jesucristupa mana ushakaq wilakuynin mas kushikuypaq kaykan.

¹² Sayta musyarmi mana mansariypa wilakuyä.

¹³ Manami Moisésnösu Diospa wilakuyninta wilakuyä. Payqa qaqlanta vëluwan sapakurqan chipipiynin elaqaykashqanta Israel runakuna mana rikayänanpaqmi. Saynöpami leykuna ushakänanpaq kashqanta mana tantiyayarqansu.

¹⁴ Moiséspa qaqlan saparashqannömi Israel runakunapa yarpayninkunapis saparaykaqno kaykan. Saymi punta kaq pactuta liyir kananyaqpis tantiyayansu päsaqla kashqanta. Jesucristuta chaskikurraqmi shumaqna tantiyakuyanqa.

¹⁵ Moisés qelqashqan leykunata liyirpis manami kananyaqpis tantiyayansu.

¹⁶ Señorninsita chaskikurmi isanqa tantiyakuyanqana.

¹⁷ Señorninsiqa Espíritu Santumi kaykan. Señorninsipa Espïritunta chaskikurmi librina kaykansi.

¹⁸ Librina karmi Señorninsita rikaqno kaykansi. Saymi runakuna rikamashpansi kikin Señorninsita rikaqno kaykäyan. Saynöpis Señorninsiqa Espíritu karmi waran waran yanapaykämansi kikin kashqanno noqansipis kanansipaq.