2 Corintios 2 - Tayta Diospa Wilakuynin

¹ Nawpata qamkuna kaqman shamur lakikasishqäno yapay lakikasiyta manami munäsu.

² Qamkunata lakikasiptïqa ¿pïlanaraq kushikasimanqapis?

³ Saymi shamunäpa trukan cartalata cartakamushkä. Manami munashkäsu shamuptï lakikasiyämänaykita, saypa trukanqa lapansipis kushikunansitami munashkä. Musyarqämi qamkuna kushikuyaptiki noqakunapis kushikuyänäpaq kashqanta.

⁴ Jaqayashla kaykäyashqaykita yarparmi say cartata qelqamur fiyupa lakikushpä waqarqä. Manami lakikuyänaykipaqsu cartakamurqä, sinöqa qamkunata seqaypa kuyashqäta musyayänaykipaqmi.

Contran sharkuq runata Pablo perdonashqan

⁵ Conträ sharkuq runaqa manami noqalatasu lakikasimash, saypa trukanqa qamkunatapis lakikasiyäshushkankimi.

⁶ Say runata corrigiyashqayki alinami kaykan.

⁷ Aläpa mana lakikunanpaq perdonar shakyäsiyay.

⁸ Saymi qamkunata ruwakü payta kuyar ali nawikikunapa rikayänaykipaq.

⁹ Say cartata qamkunaman cartakamurqä say runata corrigiyänaykipaqmi. Saynöpami musyayta munarqä cäsukayämashqaykita o mana cäsukayämashqaykitapis.

¹⁰ Say perdonayashqayki runata noqapis perdonämi. Noqa perdonanäpaq mana kaptinpis qamkuna raykumi Jesucristupa nawpancho payta perdonashkä.

¹¹ Musyansimi Satanás imaykanöpapis runakunata jusalikasinanpaq kashqanta. Saymi say runata perdonaptinsi jaqayäsinakuyman Satanás jitarpamäshunnasu.

Troascho Pablo lakikushqan

¹² Troas markaman Jesucristupa ali wilakuyninta wilakuq chaptï manami ima sapapis kashsu.

¹³ Sayno kaptinpis qamkuna kaqpita Tito mana mayakämuptinmi fiyupa lakikurqä. Saymi Troascho qoyänäpa trukanqa Tituta ashiq Macedonia provinciaman päsakurqä.

Tayta Diosta Pablo agradëcikushqan

¹⁴ ¡Tayta Diostami agradëcikü! Paymi Jesucristucho kayaptï imaypis yanapaykäyäman. Saymi wilakuyaptï maysaychöpis runakunata tantiyasin Jesucristuta chaskikur payta reqiyänanpaq.

¹⁵ Jesucristupa wilakuyninta wilakuyashqäqa inciensupa ali mushkuyninnömi Tayta Diospaq kaykan. Salvakuyänanpaq kaqkunaman y mana salvakuyänanpaq kaqkunamanpis chaykanmi.

¹⁶ Mana salvakuqkunapaqqa melanaypaq asyaqnömi kaykan. Salvakuqkunapaqmi isanqa kuyaylapaq mushkuyno kaykan. Sayno kaptinqa ¿piraq kikilanpita Jesucristupa wilakuyninta wilakunman?

¹⁷ Wakinkunaqa imatapis chaskiyänan kashlami Diospa wilakuyninta wilakuykäyan. Noqakuna manami paykunanösu kayä, sinöqa Tayta Dios kachayämash kaptin y noqakunawan pay kaykashqanta musyarmi Jesucristupa jutincho lapan shonqükunawan wilakuyä.