2 Corintios 13 - Tayta Diospa Wilakuynin

Tayta Dios munashqanno kawayänanpaq Pablo yäsishqan

¹ Kananwanqa kimsa kutinami qamkunaman watukaq shamushaq. Tayta Diospa palabrancho kayno qelqaraykashqanta yarpäyay: <>.

² Qamkuna kaqman shamur jusalikuykaqkunata maynami nirqä jusalikuyashqanta kachariyänanpaq. Kananpis nawpaykikunacho kaykaqnömi lapaykita yapay kayno nï: Kanan kutimur saynöla jusalikuykaqta tarirqa manami kuyapäyäshaykisu.

³ Sayraqmi musyayanki qamkunata nishqäkuna Jesucristo munashqanno kashqanta. Jesucristupis manami mayqaykitapis jusaykipita sapäshunkisu. Saypa trukanqa jusalikuyta mana kachariyaptiki munayninwanmi corrigiyäshunki.

⁴ Munayniynaq runano cruzcho wanuptinpis Tayta Diosmi munayninwan payta kawarisimush. Saynölami noqakunapis Jesucristuman yärakur kikiläkunapitaqa munayniynaq kaykarpis Tayta Diospa munayninwan qamkunata corrigiyäshayki.

⁵ Jesucristuman rasunpaypa yärakuyashqaykita o mana yärakuyashqaykitapis kikikikuna tantiyakuyay. ¿Manaku tantiyayanki Jesucristo qamkunawan kaykashqanta? Payman mana yärakuyaptikiqa manami qamkunawansu kaykan.

⁶ Rasunpaypa payman yärakurqa Jesucristo kachamashqanta tantiyakuyankimanmi.

⁷ Tayta Diosta manakuykäyä nishqäkunata chaskikur jusalikuykunata kachariyänaykipaqmi. Manami munayyuq kayashqäta tantiyayänaykipaqsu manakuyä, saypa trukanqa munayniynaq kayashqäta yarparpis Tayta Dios munashqanno kawayänaykipaqmi.

⁸ Sayno niyä Tayta Diospa ali wilakuyninta imapis mana sapänanpaqmi. Paypa wilakuyninta pïmaypis chaskikuyänantami munayä.

⁹ Saymi Tayta Diosta manakuykäyä lapanchöpis pay munashqanno kawayänaykipaq. Pay munashqanno kawayaptikiqa munayniynaq kayashqäta runakuna yarpäyaptinpis kushikuyämi.

¹⁰ Kay qelqamushqäkunata cäsukuyaptiki qamkuna kaqman chämushpä imatapis mananami niyäshaykinasu. Manami lakikasinäpaqsu apóstol kayman Tayta Dios churamash, saypa trukanqa shakyäsir yanapänäpaqmi.

Carta ushanan

¹¹ Wawqi panikuna, imaypis kushikuyay. Tayta Dios munashqanno kawayänaykipaq jukniki juknikipis shakyäsinakuyay. Mana chikinakuypa juk shonqula kawayay. Sayno kawayaptikimi kuyapäkuq y ali kawayta qomaqninsi Tayta Dios imaypis yanapäyäshunki.

¹² Jukniki juknikipis qaqlaykikunacho musanakuyashpayki winchinakuyay.

¹³ Kaycho kaykaq lapan wawqi panikunapis salüduntami qamkunapaq apasikayämun.

¹⁴ Señor Jesucristo, Tayta Dios y Espíritu Santu imaypis kuyapaykuyäläshunki. [Amén.]