2 Corintios 12 - Tayta Diospa Wilakuynin

Revelacionkunata Pablo rikashqan

¹ Alabakushqäwan imata mana jorqurpis kanan wilayäshayki Señor Jesucristo revelacionkunata rikasimashqanta.

² Jesucristuman yärakuq reqishqä runatami chunka chusku wata qepatana kimsa kaq ciëluman Tayta Dios aparqan. Isanqa manami musyäsu cuerpuntin aywashqanta o jaynilan aywashqantapis. Saytaqa Tayta Dioslami musyan.

³ Cuerpuntin aywashqanta o almalan aywashqanta Tayta Diosla musyaptinpis

⁴ paraísuman apashqantami musyaykä. Saychömi pipis mana wiyashqankunata wiyarqan. Say wiyashqankunataqa imano tantiyasiytapis manami kamäpakunsu.

⁵ Say runa jana pasaman chashqanpita alabämanmi. Kikïmi isanqa alabakushaqsu, sinöqa munayniynaq kashlätami wilayäshayki.

⁶ Alabakuyta munarqa rasun kaqtami alabaküman. Sayno kaptinpis santuna kashqäta runakuna yarpäyänanta mana munarmi alabaküsu. Manami alabakushqäta wiyarsu pipis ali runa kashqäta yarpanman, sinöqa imano kawashqätapis rikar y imata parlashqätapis wiyarmi.

⁷ Jana pasacho rikashqäkunapita mana alabakunäpaqmi Tayta Dios kamakäsish fiyupa nakanäpaq. Say nakayqa cuerpücho kasha jatiraykaqnömi kaykan. Kikin Satanás kachamushqan nakaynöraqmi fiyupa nakasiman.

⁸ Say nakaypita jorqamänanpaqmi Señorninsita kimsa kuti manakurqä.

⁹ Manakuptïmi nimarqan: <>. Sayno nimaptinmi say nakaywan nakar fuerzaynaq karpis kushikü. Fuerzaynaq kaptïraqmi Jesucristo yanapaykäman.

¹⁰ Saymi qeshyarpis, ashliyämaptinpis, pishïpakurpis, chikiyämaptinpis y imano nakarpis Jesucristuta sirvir lakiküsu. Fuerzaynaq karpis fuertimi rikakü.

Corintucho kaq wawqi panikunapaq Pablo lakikushqan

¹¹ Löcuno alabakur parlanäpaqqa kikikikunami ashipäyämashkanki. Alabakunäpa trukanqa qamkunami alabayämankiman karqan. Kikiläpita imatapis rurayta mana kamäpakurpis say apóstol tukuqkunapitaqa mas aliraqmi kä.

¹² Apóstol kashqäta tantiyakuyänaykipaqmi qamkuna kaqcho nakarpis admiraypaq milagrukunata y señalkunatapis rurarqä.

¹³ Isanqa wakin markakunacho gastükunapaq wawqi panikunata manakushqänöqa qamkunata manami manakushkäsu. ¿Imanirtaq saypita jaqayash kaykäyanki? ¿Mana manakushqäsuraq jusä kash?

¹⁴ Kamarikushnami kaykä qamkuna kaqman yapay shamunäpaq. Kananwanqa kimsa kutinami shamushaq. Manami kikïpaq imatapis ashirsu qamkunaman shamushaq, sinöqa qamkunata kuyapar yanapänäpaqmi. Musyashqansinöpis manami pï taytapis wamrankunata manakunsu, saypa trukanqa yanapanmi.

¹⁵ Saynölami noqapis qamkunata manakunäpa trukanqa imäkunatapis ushashaq y qamkuna rayku wanunäpaqpis listu kaykä. Lapan shonqüwan qamkunata kuyapar yanapaykaptï ¿imanirtaq noqapita jukniraqyash kaykäyanki?

¹⁶ Musyayashqaykinöpis manami mayqaykipa umaykitapis nanäsishkäsu. Sayno kaptinpis wakinnikishi nikäyanki muchuqkunapaq niq tumpala kikïkunapaq qellayta shuntaykäsiyashqäta.

¹⁷ ¿Imanirtaq sayno yarpaykäyanki? Tantiyakuyay. ¿Imaylaqa qamkunaman kachamushqä wawqikuna mayqalanpis engañayäshurqaykiku?

¹⁸ Juk wawqitawan Tituta qamkuna kaqman kachamuptï manami imatapis sakyayäshushkankisu. Tito mana sakyapakuq kashqannömi noqapis sakyapaküsu. Paywanqa say yarpaylami kaykäyä.

¹⁹ Kay cartata apasiyämushqäta liyir capaz yarpäyanki sapakuyänaläpaq qelqayämushqäta. Kuyay wawqi panikuna, manami sapakuyänäpaqsu qelqaykämü, sinöqa tantiyakuyashpayki Tayta Dios munashqanno kawayänaykipaqmi. Jesucristuta sirviq karmi Tayta Diospa nawpancho qamkunata yäsikä.

²⁰ Qamkuna kaqman shamur lutanta ruraykäyaqta tarinäpaq kaqtami lakikü. Saynöpis lakikü sayno kaykaqta tarir qamkunata olqutupänäpaq kashqantami. Capazchir qamkunata tarïman rimanakuykäyaqta, chikinakuykäyaqta, rabyäsinakuykäyaqta, jukpa washanta rimaykäyaqta, jamuränakuykäyaqta, rabyapänakuykäyaqta, runa tukuykäyaqta y mana alikunata ruraykäyaqta.

²¹ Capazchir melanaypaq kaqkunata, fornicación jusata y chïnäkur waynäkur puriykäyashqaykita kachariyashkankisu. Jusalikuykaqta tarir qamkunapita Tayta Diospa nawpancho penqakunäpaq kaqpitami lakikü.